ANNI LEH KEINI

Mizote hian kan tihphung leh kan nihna-ah midangte aia belhchian dawl lohna kan ngah hle a. Chu chu kan hnam dinhmun chhe taka min dintirtu hi a ni a. Insiamṭhat tum ahnekin hetiang kan nihna hi haiderin; a belhchian dawl lo zawngin kan kal nasa tawlh tawlh a; chhiat lam kan pan zel a, a manganthlak tak meuh a ni. Midangte nena kan inan lohna langsar deuh tun hnaia thil thleng ṭhenkhatte hi i han thlir teh ang u.

1. May 20, 2020-a Covid 19 Lock Down boruaka 10, Downing Street-a ‘Dinner Party’ an neih thu chu an zinga tel ve ngei kâ aṭangin a rawn irh chhuak ta a. Prime Minister Boris Johnson leh a nupui Carrie pawh an lo tel ve ngei a ni tih hriat a nih tâk zelah chuan Opposition hruaitute chuan House of Commons-ah ngei Johnson-a chu báng turin an nawr ta siah siah mai a. Tihtheih dang a neih loh avangin thupha (apology) a chawi ta mawlh mawlh mai a ni. A bân dawn leh dawn dawn loh chu hunin a la rawn lantir ang.

Keini ve thung erawh chuan Covid-19 Inkaihhruaina kan siamte chu kan bawhchhe chamchi a. Dan siamtute chu a bawhchhe zing ber ber an ni a. “Pathian hminga” bawhchhiat zel duhtute âu âw pawh a ring tawlh tawlh a ni. Dan zawm pawimawh thu sawi leh bawhchhiat chanchin a kalkawp deuh reng a ni ber mai.

Dawtsawi Centenary lawm thei nia kan hriat thu kan sawi hnuah pawh thupha chawi chu sawi loh an la sawi belh zelin an huaisar tawlh tawlh emaw tih tur a ni a. Bâng tura nawrtu phei chu Opposition lam aṭang pawhin an awm miah lo a ni.

2. SP Maurya leh Dara Singh Chouhan chuan U.P. Cabinet Minister an nihna an bansan rup mai a. Anni hi hnam hnufual zinga mi ni-a, an hnam an lo changkan ve theih nana thawk tura Minister nihna pêk an ni a. An beisei anga Sawrkar thiltih chuan an hnam tana ṭhatna a neih tâk si loh avangin an bang ta a ni. Minister nihnaina dinhmun sang, hlawh leh hamṭhatna tam tak a pekah an lungawi mai lo va. An hnam ṭhatna tur zawngin an bang ngam ta a ni.

Kan Minister-te pawh hi an bial mite leh chuta ṭanga ram pum hmasawn nana thawk tur an ni a. Amaherawhchu an Minister nihnate chu an bial mite leh ram pum mipuite hmasawn nana hmang lovin anmahni mimal leh an party tan an hmang ta zawk ṭhin a. Chutah chuan an lungawi tâwk ta em em ṭhin a. Chu chu kan chhiatna bul leh hmâwr a lo ni ta a ni.

3. Sawrkar hnathawk, a huna hlawh la thei lote thâwm pawh a na sâwt khawp mai. An duh taka an thlan tlin Sawrkar hi an tih tur an tih loh avanga an bân phût ngam àwm tak an nih laiin; chutiang thleng chuan an kal bik lo. An thil phût hi tihhlawhtlin a nih loh chuan inthlan leh huna an ‘vote’ tawh loh tur thu chiang takin hrilh se, an thil phûta an hlawhtlin theihna kawng ṭha ber a nih hmel e. Pawisa hi a hman lohna tura hmang lo va, a hmanna tur taka hman ni se, hetiang harsatna hi a thleng lo tur a ni si a. Arvind Kejriwal chuan, ‘ka ti ang’ a tih chu a ti a. Inthlan leh dawnah, ‘Ka tiha in lungawi chuan min vote leh ula, in lungawi loh chuan min vote tawh lo mai rawh u,’ a ti ngam a. Ka ti ang, a tihte chu a tih deuh vek avangin mipui an lungawia Modi-a hova beihpui an thlâk khum chung pawha an hneh loh a ni ta a ni.

Tihtur ṭha tih hi hmasawnna leh changkanna a ni a. Tihtur tih loh hi hnungtawlhna leh chhiat leh ṭha hriatna thlenga tlakhniamna a ni a. Chu chu kan nihna hi a ni a. Entawntlak kan hmaa rawn langte hi entawn nachang kan hriat beiseiin hetiang thu hi ka rawn chhuah a ni e.

- M. Lalmanzuala