Ram leh hnam humhalh: MPF hmalakna thlawp tlat

June 21, 2006 aṭanga din Mizoram People Forum (MPF) chuan a ṭha zawngin hna a thawk zel a. Politics siam ṭha tûrin nasa takin hma lain; khaw tin, veng tinah indin thar zelin tlawmngai pawl hruaitute leh khawtlang pa râwn (prominent citizen) ten an uap tlat thei hi a lawmawm hle.

MPF chu eng nge a nih?: Kan ramah rorêlna ṭha leh dik a awm theih nân te, remna leh muanna kan neih zel theih nân te, hmasâwnna ṭha leh mipui zalênna a awm theih nân Mizoram People Forum hi din a ni a, tih bik awm lo pâwl thianghlim; politics siamṭha tura mi zawng zawng thawhhona a ni a, a duh apiang tan tel theih a ni.

Kan ram dinhmun thlirin MPF chuan ram kalsiam siamṭhat a duh a, a chhe lai siamṭhat chu hna pui bera neiin, “kan ram politics hi kan ral thlir ngawt thei ta lo ve. Politics a dik loh chuan mipuiin kan tuar a, kohhran a nghawng a, a siamṭhatnaah kan râlbâng thei lo. Sawrkar ṭha kan neih theih nân zawlnei hna kan thawh a ngai a ni” a ti a ni ber. Sam 37:3-na “He ramah hian awm la, rinawmna um zel rawh” tih chu innghah nâna hmangin hma a la mup mup a. Hei hi kan ram leh hnam tana ro hlu a ni tak meuh mai.

India ram entawn (role model) kan ni thei: Kum 2008 MLA General Election zawha National Newspaper lian ten MPF an hmuh dan an ziah te kha a ngaihnawm hle. Khatih hunlaia Election Commission’s Special Observer for the Mizoram Election - Pu Debasish Sen-a’n Mizorama MPF te thiltih dan a hmuh khan, “state dangte pawh hian entawn se aw” a ti vawng vawng te kha a lawmawm ngawt nia.

Kum 2013 MLA General Election pawh MPF hmalakna avangin harsatna lutuk awm lovin tluang taka kan nei thei te kha a man a va tam em! Times of India reporter Shantanu Nandan Sharma khan MPF hmalaknain inthlan campaign zalênna a tizim deuh niin a hria a. MPF leh Political Party te thawhhona thuthlunga candidate te ‘zu leh ruihtheih thil dang laka fihlim’ tih leh ‘mipat hmeichhiatna kawnga sawisel kai lo’ tih hi Election Commission-in a khap hran loh avangin kan ti lutuk deuh niin a ngai a; nimahsela, kan hnam nun leh kristianna nena tehin a nih dan tur tak a ni zawk a. MPF ṭangkaina leh hnathawh erawh a fak hle thung. Ram leh hnam tâna thil ṭha lo vengtu (moral guardian) ang hialin a ngai a ni. (The Times of India 24.11.2013)

Chhanchhuah ngai tam tak an awm: Politician te zingah ram leh hnam hum­halh nâna mahni hrehawm pawisa lo, mi ṭha tak tak an awm. Chung mite chuan zah an phur a ni. Zahawmna hi hlawh tam leh hna sâng chelhah a innghat ber lo va, hlawh chhuah tur a ni ang. Politician pamham leh mi dang chanâi ei zo hreh hauh loten mi ṭha te hmel a tibal leh ṭhin hi a pawi ngawt nia.

Kan ramah hian a dik a dawk pawh thlu lo va party politics ruih chilh eng emaw zah an awm. Mi â nia inhre hauh lo, fing chuang si lo tam tak an awm. Sum leh therhlo uma, zah pawh dawn hauh lova chhun enga he ram rawk mek an awm. Ṭhu mai mai hman kan ni lo ve. Chi bing leh hnam bil ang zawnga candidate siam tum an awm loh nân kawng dik kawhhmuhtu awm a ngai a. Party Unit ṭhenkhat, candidate hova ruai ṭheh dur dur tur emaw ti pawl te hnenah eirûkna hnâr a ni tih hrilhfiah a ngai a. Candidate te hnena sum leh thil dang dil ching te hnenah ram leh hnam hmelma a ni tih zirtirna ṭha pek a ngai bawk. Chung mite chuan thil dik leh dik lo an thliar thiam lo va, ṭanpui an ngai a ni.

Party tinte kan fimkhurna tur a awm: MPF leh Political party te thawhhona thuthlung, Political Party tin President ṭheuhte leh MPF hotuten hming an ziak hnanah chuan hetiang hian a inziak:

“Social media hmanga dik lo taka thu thehdarh hi sawrkar dan in a phal loh avang leh a thehdarhtute chu na taka hrem theih an nih avangin tih hauh loh tur a ni. Dik lo taka thu thehdarh an awm chuan rang taka bawhzui nghal a ni ang a, a ṭul anga puanzar a nih bakah Election Commission- ah emaw CID-Cyber Crime-ah emaw hriattir nghal zel a ni ang.” (Thuthlung 3.5)

Fake account siam avangin Jail tan leh pawisa chawi theihna (IT Act Sec 66C) te; inpuhhmingchhiat vanga jail tân theihna (IPC Sec 499) te; hnam inpumkhatna tiderthawng thei sawi leh thehdarh vanga hremna - IPC Sec 153B te hi kan hriat reng a ṭha a, Tin, public meeting hi zan dar 10 hnu lam leh zing dar 6 inkarah neih phal a ni lo va, vote thlak hun tura ruahman hmalam darkar 48 chhungin neih phal a ni hek lo (Sec 126 of Representation of People Act, 1951). Party ruih chilh vang hian ṭul miah lo vah jail a tan theih tih hria ila.

Kan ram nghahfâk MPF: Kohhran leh sawrkar inlaichinna (Church and state relationship) H.Lalrinthanga ziakah chuan Aizawl leh Lunglei khawpui a mi chi hrang hrang; hnathawh inang lo tak tak mi 310 ngaihdan a lakkhawmah MPF hian Mizo te khawtlang leh Politics nunah min hruai ṭha ang em tih a zawhnaah chuan:

- 74.5% in ‘aw’ tiin an chhang a;

- 9.3% in ‘aih’ tiin an chhang;

- 14.6% in ‘ka hre lo’ tiin an chhang;

- 1.6% in ‘ngaihdan ka nei lo’

tiin an chhang thung.

Hei hian a entir chu Zoram mipuite hian MPF-ah rinna leh beiseina thûk tak kan nei tihna a ni a. Kan ram politics siamṭhatna tur atâna MPF hmalakna hi a ropui hle a. A kalkawng bumboh rap rap châng pawh a awm ang; nimahsela, ram leh hnam humhalhna atâna hmalakna ṭha ber zinga mi a nih tlat avangin kan chhem alh zel tur a ni ang.

MPF-a la tel lo te pawh tel vek tum ila: Mizoramah politics dik leh ṭha a awm theih nân thapui kan chhuah a ṭul a. Sawrkâr, kohhran leh tlawmngai pawl te ṭha taka kan thawhho a ngai a ni. Tharum thawh, invauna, inrikrâpna leh sum leh pai hmanga vote lei tireh tûrin kan ke pen rual a ṭul hle. Khua leh tui tha (responsible citizens) kan nih theihna tûrin rinawmna leh dikna inzirtîr a pawimawh reng a, chu chu MPF hian a keng zel a ni.

Nagaland Baptist Church Council (NBCC) pawhin MPF hmalakna an lo hria a, a hmun ngeiah Dt 5-6, September 2012 khan an rawn zirchiang a, a theih ang anga hma la turin ‘Working Committee on Clean Election’ te pawh an din ve ta hial a ni. State pawn aṭang mahin kan hmalakna a ṭha tiin an rawn zir a ni a, he ram leh hnam hmangaih a, siamṭhatna rilru pu zawng zawng te chu he thawhhonaah hian neitu chan chang takin kan tel zel tur a ni dawn lawm ni?

Kan inthlan tawha MPF hmalakna en hi an a lungawithlak a, kan ram leh hnam tana a ṭangkaizia hi ṭhangtharten research an la rawn bei ngei ang tih hi kan ring tlat a ni. Kan hma inthlan lo awm turah pawh hian state dangte entawn tham, zir tham kan ni leh thei a. Inthlanna thianghlim, dik leh felfai tak a awm ngei theihna tûr leh Sawrkâr Inrelbawlna Ṭha (Good Governance) kan neih ngei theihna tûrin Mizoram People Forum hmalakna i thlawp tlat ang u.

- Zonunsanga

Lehkhabu râwnte:

1. Mizoram People Forum Chanchin (2006-2016), Aizawl: MPF, 2016

2. Lalrinchhuanga, C. MLA Inthlan chungchang Dân (The representation of the people act, 1951), Aizawl: Blue Mountain Offset printer, 2018.

3. Lalrinthanga, H. Church and State relationship in the Mizo Socio-Political life 1952 to 2006. Aizawl: ISPCK, 2013.