MLA nih tum - Hmana mi leh tuna an nihna
Hmanah chuan mi pakhat chu pa fel tak a ni a, a lo fel chho zel a, mi zahawm tak a ni chho a, tichuan eizawnna leh finna kawngah a ṭhang zel a, ram hruaitu atan miin an it a, politics lam a âwn ve ṭan a, MLA candidate nihte a tum ṭan ta a.
Hman aṭang tawhin politics hi a tuina ber a ni a, huaisen takin politics a luhchilh ngam a, politician nih tumin bul a ṭah ta a. Tichuan party lamah a kula tai a ni a, a thawkrim a, a hun pum a seng a, eptu lama an awm pawhin a insawn mai mai lova, party-ah a rinawm tlat a, inthlan a lo hnai ta a, MLA nih tumin party-ah pawh beisei a nei ngam ve ta.
Hman deuhah pawh politics hi a rawn tive ûk a, a ngawihsan leh daih a. Mipiin an beisei sang a, pa ṭha leh zahawm taka nih vangin ram siamṭhatu turah pawh an ngai a, amaherawhchu inthlan a zawh rualin a politics tuina leh ram veina a tlahniam nghal a, a reh vang vang hnuah inthlan a lo hnaia a rawn tui thar leh ta a, MLA nih tumin a bei ṭan ta.
Hman deuhah chuan mi lian pawh a ni lova, sorkar hna a thawh lai phei chuan eiruk thilah te a hmingchhe hial a. Pu chuam neia inti milian a ni a, a zuan fuh em avangin a hausa chho a. pawisa nei na na na chuan politics pawh a luhchilh duh ta a, party lam pawhin pawisa ngah chu an lo duh nasa mai a, MLA nih a tum ngam ta hial a ni.
Party chhungah pawh an dah san vak ni bik lo kha an party an sorkar a, a pu zui berin hna ṭha tak tak a pe a, contractor a nihlai pawhin a hna a ṭha lova, nimahsela sum nei na na na chu party lam pawhin an hmu âwm ve vung mai a, candidate nih a tum ve ta a.
Tun hma deuh chuan mi hausa a nih loh piah lamah an chhungkua hi chhungkaw awm thei an ni ngai lova, amah hi chu mi bright tak a ni a, ṭhalai fel tak zinga mi a ni. A hausak chhan chhui chian tur awm si lovin a hausa hluai a, kawng hrang hrangah thiam takin a invawrh chhova, party lamin candidate atana an it tur hialin a rawn lar chho a, a in candidate dawn ta nge nge a ni.
Mizoin ṭhangkhat lian kan tih chu sawi loh, hun rei tak chhung politician a ni tawh a, MLA pawh a ni fo tawh. Politician na na na chu lal a kham thei lova, lansarh leh thu neih zel a duh a, hmana a ṭhat deuhlai pawha a ropui vak loh tehlul nen chawlh a la tum si lova, party lamin an chawlhtir ngam si lova, tar tawh takin a la ding leh nge nge dawn a ni.
- Rochungnunga