Congress buai rukna ri ret ret

Congress hi tun hnaia buai an ni lova, hman deuh aṭanga buai tawh, an Minister inruat aṭanga buai ṭan tawh an ni a, chu buaina belhchhah tur chuan an contract sem danah an buai leh a, tunah Assembly inthlan dawnah an buaina a lang chhuak lian ta a, an buai dan hi a ril hle a ni tiin a hre chiangtute chuan an sawi.

A ruh langin sawi ta ila, kum 2013-a an tlin chiah khan Cabinet Minister pakhat chu MLA fângah an han paih thla tawp mai a, tichuan a lungawi lo hle a ni. He MLA hi MNF lamin an kawm fova, chawte pawh an ei khawm zauh zauh a, BJP lam pawhin an kawm nel hman hle a ni awm e. A tawpah Congress lamah bawk a din hmel a, a rilru nâ erawh a la dam lo.

Congress Minister thil­ti­thei tak pakhat hian con­tractor chuam a nei a, chu nen chuan mawi lo khawpin an inzawm a, chu mite thil tih holam te te thleng chuan a zui duk duk a, tichuan chu contractor chuan Congress lam ṭangte ai mahin Congress sorkar hnuaiah hna a hmu thei a, mahse he contractor hi an han belchianga MNF a lo ni ru reng si. Congress hotu leh worker ṭhenkhat lam lungawi lovin he Minister-ah hian an ṭuan ta a, he Minister lian tak ve si hi Bhawan lamah a tlang tla lo em em mai a, tunah hian dinna pawh a la nei mumal lo an ti.

Tunah hian Congress mi hlun leh senior zinga mi pahnih hi an kum a upa tawh nen chawlh tir tumna a lian hle a, tun thleng hi chuan a thlaktu tur heng senior te lungawina tur ni bawk hi candidate an la hmu lo. Hei hi an buai ru em em bawk niin a hre chiangte chuan an sawi.

MNF lam hian an can­didate tur 80% chuan tifel tawh a, an la tih fel loh 20% awm velah hi chuan an la buai hle a, party chhungah khi a awm tawh a, candidate puan ruala MNF chhuahsan tur mi hrawl tak tak an inphum ru tawh a, heng mite chhuah ai chuan MLA ticket an pe leh nge nge mai thei niin an sawi bawk.

ZPM hi boruak hniam tak aṭangin sang takah an invawrh a, inthlan a hnaih meuh chuan an hniam leh salh salh tawh niin an sawi bawk.

- C Vanlalvena, Dinthar