COVID19 AṬANGA KAN ZIR TUR

Khawvel huapin hripui Covid-19 a leng a, ram hausa leh ram changkang lo te pawh kan buai ve vek tho. Mi tam takin nunna an chan tawh. A sawh khawk nat dan tur ngaihtuah thiam a har hle. Eng emaw hnuah he hripui hi reh turah ngai ila, mahse a hnua Zoramin kan tawrh dan tur hi kan suangtuah ngam emaw! 

Ei lehbara kan into_delh lohzia tlang hriat a ni. Kan ei bel ber Punjab leh Haryana State-te pawhin hna an thawk thei bik lova. An leilet a an chhawr tam tak an haw darh ve si. Nakum lama kan ei tur hi chu a lo berah a chanve chuan a tlem phah ngei ang le. Khawvelah hripui a leng mek a (Covid - 19 Pandemic), a nghawng tur chu economic pandemic a thleng lovang tih tunge sawi thei le? Engtin tak Zoram hian ti ang imaw! Chuvang chuan ei leh barah engti kawng zawng tala kan ngaihtuah ve a ngai. 

Sorkar-ah innghah ngawt tur a ni lo. I fanu leh fapa khawpui lama lehkha zir leh hnathawka awm kha thingtlanga mite khan ko haw ula ei bar thawk chhuak turin ṭan lak a ngai e. Buh chang lo, vaimim, bal leh bahra hmun tal siam tir ve rawh, ei tur i neih theih nan. 

A zirna kum 2/1 bahlah kha pawi ti lutuk suh. Boruakin a zir chuan a zirna chu a chhunzawmna nikhua a tlai lovang. Aizawl leh District capital aṭangin puar leh fanna zawngin thingtlang zawkah an rawn vak lo ang tih a sawi theih ta lo e. Tih emah chuan kan mi hmasa hlawhtling tak takte kha ramtang chungin ani lehkha an zir ni. 

Khawpui, Aizawl leh District Capital a pawn lam mi tam lutuk hi a veiawm. Kan budget pawisa Zoram pawnah a luang chhuak hnem lutuk. Covid-19 denchhen hian Mizoten lesson thar i kai ang u. Hripui hlauva an khaw lama haw ta vai mistiri te hnathawh ai kan ṭhalaiten an thawh a hun ta. Sorkar hian ILP thar pe chhuak tawh lo se, Aizawl leh khawpui danga thawh tur awm hi kan ṭhalaiten i thawk ang u. Mistiri hna kan thiam loh deuh pawhin helper/ labour hna tal thawk turin kumin leh nakkum chu i in ruahman ve ang u. 

Khaw tinah hian hnathawk rual ṭhalai kan leng suau suau a, upa zawk thawh chhuah ringin. Ka duh dan takah phei chuan kum 2020 leh 2021 hi Higher Education (College, University) tan bik Education Holiday puang ila, nula tlangval zawng zawngin hna thawk suau suau mai ila. Thingtlang lamah buh leh bal thar chhuak turin thawk ila, khawpui lamah vai thawh ai thawk ve bawk ila, chutiang chuan kum hnih chhung hi chu hun hmang ve ta ila, he economic pandemic hi a ziaawm a rinawm. He hri leng avang hian Change i siam ang u.

YMA te pawh hian hnathawh uar kum puang se. Kan dam khawchhuah nan nun inthlak kan ngai e.