Kuhva tawlh rukin a nghawng
Kuhva hian kan social life hi a tichhe nasa em em a. Sorkar pisa babi te, babu te thleng thlengin an lo inrawlh nasa tawh bawk. An duty kalsanin zirtirtu tam takin an lo buaipui ve a. Zirlaiin lehkha zir ṭhulhin an buaipui ve leh bawk.
Gate a duty te pawh an hnawng a ni ang, car an nei ṭha thei em mai. Quintal za tel phurtu truck lian, ketaminu hoten kan kawng min dai chhiat sak vanga khualzin miten harsatna an tawh nasatzia te hi aw.
GST pe nia insawiten e-way bill lem siama zep ruk nei ṭun chunga chhiah an awl ruk nasatzia te hi kan hre hlawm ang a.
Champhai tui tlan ber, Tuipui hnara vai truck za rual leh a enkawltu vai zun leh ek thli tenawm zozai hi....
Gate an helna tura kawng ruk ṭhahnem tak an sial ten kan ramngaw/ thing leh mau an tih chhiat nasatzia te. In hmun lo ram to chakzia te, inflation nasat takzia te hi. Mi rethei tan chuan in hmun lei phak a ni ve ta lo.
Kuhva phurhna atana bank loan la a truck an lei sup sup avanga nakin lawka buaina tawk an tam turzia te. Security personel hrang hrang hnena thamna pek a nasat turzia te hi aw...
Mistiri leh labour chhawr tur an van tawhzia leh a awm chhun te pawh an rate a san takzia te. Mi rethei tan phei chuan in sak harsa tak a ni ta.
Champhai zawla kuhva kudam tam tak sakin buh hmun, leilet zawl a tih chhiat nasatzia te, ni danga tuiin a chim loh pawh a chim tak hial dan te hi ṭha lo tak a ni.
Sum ngah chapo, khawtlang tana ke pen duh si lo, mahni hamṭhatna tura ngal chak pui pui an tam takziate.
Han ngaihtuah neuh neuh chuan, Dan pela sumdawnna, kuhva ro phurh hi mi nawlpui chuan an ning a nih a rinawm. Chumi avang chuan huai taka bei let ngamtu Champhai DC pawhin ṭantu a ngah em em chhan hi.
- Lalhlupuia, Champhai