RAM ECONOMY SIAMTHARNA HUN RANGKACHAK - Covid-19/Lockdown

Tunlai Covid-19 vang hian khawvel ram tam berah chuan Economic Recession or Depression (ei leh bar/sum leh pai lama tlakchhiatna) a thleng ngei dawn, a thleng tan mek a ni a.Keini Mizoram tan erawh Economic reformation or Independence or Economic Nationalism din thar nana min bengharhtu (wake-up call) ah hman hlauh theih ni ngeiin a lang a, sawitur tam taka awm zingah point tlem tarlang ila -

1) Lock Down chhungin ram (state) pawn atanga vegetable te lakluh a rem loh avanga khawpui (Aizawl, etc) mipui mamawh zual phuhru turin Vegetable Supply Chain buaipuituten motor trip 150 chuang lai ramchhung mite tharchhuah chu hun rei lo te chhung (April-ah) an la khawm thei a ni a. Tin, an pekna/hralhna (demand side) lam chu Local Task Force ten an lo buaipui zelin mamawh zualte hnena pek an ni zel tih kan hria a. Hei hi a Kristian principle em emin Mizo nun ze mawi lantirna a ni zel tih kan hria.

2) Developmet Economist te chuan development hi sum neih teuh lam ni loin mihring nun kawng peng hrang hrang, social moral, physical and mental lam te, sakhaw nun vawn leh mihring hriselna leh hlimna te rualkhai takin an ṭhang tur a ni an ti ṭhin a. Tirhkoh Paula zirtirna (tlachhamte phuhrukna) (IIKor : 8:14) dungzuiin khawpui chhung mipuite thlai ei tur mamawhte phuhru turin Zokhaw lam miten an thlai neihte Aizawl veng hrang hrangah te an rawn pe hlawm a; tin, an thlai pek veng mipuite lah chuan Zokhaw mipui mamawh tur nia an hriatte an lo hlan/pe ve deuh zel tih kan hria. Hetia hlim taka mamawhte kan inphuhruk tawnna hi ram hmasawn dikte kawng zawh ni awm reng pawh a ni a, chutiangin, Task Force ten anmahni theihtawk theuha hripui ven nan leh social life vawn nun nan ṭhahnem ngai taka an thawkte hi hmasawn dan dik leh mawi tak a ni bawk a ni.

3) Kan CM leh Agri minister te chuan keimahni kan intodelh nan te buh leh bal chin uar lama hma la nasa turin mipuite min fuih reng bawk a.

4) Ram mipui leh khaw tam ber chuan tun April leh May thla chhung vel aṭang hian mahni theih leh remchan dan zela thlai (buhbal) chin lam kan bei uar hlawm hle a ni.

A! Ram mipui Economy din ngheh a, Economic Nationalism dinthar hun ṭha Mizoram hian kan dawng a ni ber a ni ti ila a dik hle awm a ni. Amaherawhchu, Economic Reformation or Independence chu hetia kum khat maia hlawhtling nghal vek chi a nih loh avangin ram hruaitute leh mipuite hian ziarang nei deuha kan beih zawm zel ṭul tur chi a ni a. Tunah hi chuan POLITICAL WILL, tum ruhna neia thawh nghal a ṭul a. Tuna kan sawrkar hian Development Board hrang hrang a neihte zinga Concern Board te hi Co-ordination ṭha tak neia thawhhotir nghal thuai a pawimawh in, chu chu a ṭangkai em em dawn a. Ram mipuite hi chu kan economy dinthar turin kan inhuam lai tak, hun remchang tak ni ngeiin a lang.

Ram mipui (Aizawl) nitin thlai ei tur mamawh (demand) zual ngaihtuah tura hnawhsarum deuha ‘Vegetable Supply Chain’ siam kha a pawimawhin a ṭangkai hle tih kan hria. Tin, Zokhaw lam mipuite pawhin kan ram neih remchang apiangah buhbal/thlai hmun siam lamah ṭan kan la uar hlawm ta hle bawk a. Tichuan ram chhunga kan thar ve theih te, state pawn, vairam aṭanga kan lakluh vak vak ṭhinte (chemical damdawi an hman vangin cancer nei kan tam phah te an ti hial) titawp emaw, control dan fumfe tak hmanga mamawh zual lakluh chauh ni ṭhin se. Kan ram chhunga tharchhuaktute a ṭul dana ṭanpui (transport subsidy, etc) zel a ni ang a, ramchhung miten keimahni tharchhuah ngei, thlai thar hrisel zawk hmanga intodelh zel chu kan chhunzawm zel thei dawn a ni. Gandhi pawh khan ram dang puante chu India mite tana lei tur awm lo turin hma a la a, tichuan, India mite chuan la/puan dehchhuahah an intodelh ta mai bakah thawnchhuah tur an nei thei ta zawk a ni. Tin, Trump-a pawh hian China siamte hnawlin ‘made in USA’ a vawrh larin a kengkawh a, America ramah chuan employment lam a tam phahin ram economy pawh a ṭhang nasa hle a. Gandhi leh Trump te hian Political Will, Economic Nationalism an nei chiangin an hmang nghal a, an hlawhtling a ni tih kan hria.

Keini pawh hian tuna Covid-19 lockdown te hi Economic Nationalism or Economic Independence kan neih nana min bengharhtu (wake-up call) atan hman ngei a finthlak e. Kan Chief Minister leh Agri Minister, etc. te ngei pawh hian thlai chi hrang hrangte tharchhuak tam tura tan la turin mipuite min fuih uar ta hle mai a, Political Will hmanga kan tharchhuah ve theih lakluh khap/control lamah pawh hmalak a ṭul bawk a ni ber mai. Tin, tun hun May thla pawh hi thlai chi thlak hun a la nih zel bakah, buh (leilet) hmun siam phei chu June thla hi hun remchang a ni a. Chubakah, kan sawrkarin Development Board 10 chuang a neih zingah a ‘Concern Boards’ – Agri, Horti, Vety, Commerce, Industry etc. te co-operation tha tak neia a thawhtir chuan Mizoram Economic dinhmun chu chawikan dawrh a ni thei hial dawn lawm ni?