KAN HOTUTE DAN SIAM THAR HI

Lockdown kalpui zel dan tur, kan hotuten an rel thar dan kan lo hmu a, a hma aia hna thawh theih hun tam deuh zawk, mahse fimkhur taka la kalpui tho si angin dan thar an rawn duang chhuak niin kan lo hmu a.

An dan siam zingah, khaw inkar kawng inkalpawh theihna dan siamin, lirthei even leh odd number tlan theih hun an rawn siam a, chu chu Aizawl khawpui chhung tlan dan tur ni lovah kan lo ngai a.

Mahse chu dan thar chu kan hmuh hnu lawkah, Aizawl khawpui pawh even leh odd number a tlan tur angin whatsapp lamah an rawn vawrh darh a, tu thupek nge tih pawh sawi chian a awm loh vangin, an hre sual a ni ang tiin, tukinah ka lirthei even number nen ka tlan chhuak a, traffic police in min lo tiding ta tlat mai, he dan hi tu siam nge?

HNA THAWK RU IN TI A NI LAWM NI ?

Hripui leng hian ṭâm a rawn thlen dawn, chuvangin mahni intodelh theih ang angin hna i thawk ang u tiin, lo leh huante siam turin kan infuih a. Keini pawh kan theih ang angin, leipui huan siamin, ṭhahnemngai takin, ni tin kan lo feh chhuak ve tawh a, mahse kan pute dan thar siam aṭang chuan, kar khatah vawi 3 chauh hna kan thawk thei dawn ta.

Kan leipui neihna chu, lirthei hmanga kal loh chuan, kea han kal chi rual a ni si lo, taxi la dawn ila, up down atan Rs. 800/- lai sen a ngai dawn, kal loh a hlawk zawk. Mahni lirthei hmang chuan, petrol manah Rs. 80/- kan seng. Dik tak chuan hna thawh hi kan phur ve khawp asin. Chawhmeh man to takte hi lei ngai lovin thar chhuak ve ila tiin, hah pawh sawi lovin kan lo chhuak ve tak lawp lawp a, kar khata ni 3 chauh chhuak thei dinhmuna min dah leh tak siah chuan, bazar-a hralh tur thleng thlenga kan lo suangtuah vena pawh a tlawlh zo leh dawn ta a ni.

MI DANG PAWHA NGHAWNG

He dan mak tak mai kan siam hi, kan tan chuan dan sakei a ni ringawt. Keini ang bawka he danin a tihbuai ve hi mi tam tak an awm ang, vawiina ka hriat nghal chu, in saa inhlawh, veng danga kal ngai, mahni lirthei hmang 

ṭhin chu, a kal thei lo, kar tin ni hnih chauh a inhlawh thei tawh dawn a ni. Tin, veng danga anmahni in tur sa mek, hlawhfa pawh mi 4 chhawr mek chu, he dan hian a dan beh avangin, a hlawhfate a chawlhtir bawk.

A THEIH LAWM NI?

Pute u, in dan siam thar hi khawngaih takin lo en nawn leh teh u, sorkar hna thawk chauh ni lo, kut hna thawkte tan pawh, special permit inpek theih dan a awm lawm ni?

Aizawl khawpuiah hian, sorkar hna thawk ni lo, mahnia eizawng zingah ni tin inhlawhfa hi an tam ber. Inhlawh ṭhinte'n ni tina an inhlawh theih nan te, inhlawhna neituin ni tina hlawhfa a chhawr theih nan te, huan thlai chingtuten ni tina hna an thawh theih nan te, he hripui hlauhawm tak laka kan fihlimna tur dap chung zelin, kut hna thawktute harsatna tawh mek hi, min ngaithuah thlenpui hram teh u.

A thuhrimah, Public transport ai chuan mahni lirthei hman chu hripui lakah a him zawk lawm ni?

Sunday tlan phal loh hi eng nge a awmzia?