POLITICS LEH MORAL REFORM

“Mipui rahbeh ching sawrkar chu Sakei aiin hlauh zawk tur a ni” - Confucius

Thuhma: Inthlanpui kan hnaih ta hle mai. Kan ram Politician-te pawh an ṭang hlawm hlein a rinawm. Keini Mizorama cheng, Kristian deuh vek awmna state-ah hi chuan, Politics hi tu Kristiante berin emaw an luhchilh ngei ngei a ngai. Amaherawhchu, ka tel vena awm a ni em tih leh, Politics hi ram leh hnam ṭhatna tur atan chauh a ni tih kan hriat hmasak a ngai. Eizawn nana hman chi a ni lo. “Politics hi eizawnna hnaa hmangtu tan rinawm tluan chhuah theih a ni lo,”

- Louis Mc Henry Howe.

Politics hi tute nge ti ang?: Politics chu sawrkar emaw ram emaw chungchang ngaihtuahna tiin mawl thei ang berin hrilhfiah ta ila; he huanga zuang lutte hi, Politician-te ti leh mai ila a sual tam awm lo ve. India ram pum hruaitu te leh, Mizoram, Lal Isua ringtu rama chengte politics kalpui dan chu a inang tur a ni lo, tih hi kan hriat chian hmasak a ngai; chuti lo chu, ring lomi politician-te nen danglamna kan nei dawn lo tihna ang hial a ni mai. He thu ril hi tam tak chuan a danglamna kan hre lo ang tih a hlauhawm hle mai. Chuvangin, Mizorama politician ni tur chuan, ama nun leh ram a kaihhruainaah, Bible, Pathian thu thianghlim hi, innghahnaah a hman ngei ngei a ngai a ni; a chhan chu, khawvel mi ropui tak tak, Kristian ni bawkte hian Bible hi an tan eng, kawng leh kaihruaitu atan an lo hman tawh vang a ni. Hetiang hian lo sawi ila:

Great Britain a mi ropui chhuan taw­lawl William E. Gladstone-a chuan, “Ka hun chhung hian khawvel mi ropui 95 zinga 87-te chu Bible thu zawmtute an ni,” a ti. Mi ropuite rorel thiamna tuikhur hnar chu, Bible a lo ni. Ram hruainaa dinhmun a san poh leh, Mother Theresa anga, “Bible hi ka ṭhian ṭha ber a ni,” ti ve thei nih a ngai a ni. Bible chhiar hman lo khawpa buai Politician nih hi hlauhawm tak a ni zawk. Mizoram hian a mamawh ber chu, America President lo ni tawh, Herbert Clark Hoover-a sawi angin, “Tih tak taka Bible kawm mite hi an ni.” Bible chhiar hman lo hian WhatsApp en an hman zawk duh khawp mai nia! A theih hram chuan ni tin vawi thum tal (chang 2/3 mai emaw pawh) Bible chhiar/ kawm ngei a pawimawh takmeuh a ni.

China sipai hotu ber lo ni tawh, Chiang Kai-Shek-a chuan, “Bible chhiar hian ka nunah chakna min pein, ram rorelnaa ka phurrit min tihzan sak a ni,” a ti ngam.

Mi dang tana inpe Politician Mizo­ramin a mamawh: Khawvelah hian Politician, ram roreltu chi 4 an awm tih a ni. Chi khatna chuan, mi thunun ringawt (dominate) an tum a, mi dangten rorelpui an hrehin nuam an ti ngai lo bawk.

A chi hnihna chu, mi dang ngaihsak lo/ ngaihthah (indifferent) mi an ni a; ṭhian kawm ngeih an nei thei tak tak ngai lo bawk. A chi thumna chuan, mi dangte nen chuan hna an thawk (work with others) thei ve hram a, mahse mi dangte tel lo va, mi tana inpek emaw thawh emaw an peih tak tak si lo; chuvangin, mi ṭangkai tak tak an ni thei lo. A chi li-na chuan, mi dangte tan an thawk peih (work with and for others) a; ram roreltu daih rei leh hlawhtling tak takte chu an ni, tih a ni.

Hetiang politician-te hi an nun a hlimin an bula awm pawh a nuam bawk. Bible-in thu pek ropui ber a tih chu, “Mahni inhmangaih anga vengte hmangaih’” hi a ni (Mk. 12:31). A dik tak chuan, mi dangte tana inpe mite hi, a rah lawktu leh ṭhatpuitu ber berte an ni zawk chawk! Hetiang nun neitute hi alawm, ‘moral reform’ neitu kan tih chu!

Politician, Kohhran tana rinawm (loyal) anga ram tana rinawm kan mamwah: Mizorama kan inpuhmawh kualna leh kan inchirhthehna ber chu, ‘a sawi angin a nung leh si lo,’ tih hi a ni. Tin, Kohhran hi kan dah sang hle a; Kohhrana rawngbawltute phei chu an ni tin hnaa rinawm leh taima bik turah kan beisei ṭhin; kan beisei anga an ni tin hnaah rinawm chuang bik lo va kan hmuh hian, kan sawi chhiain kan rel ta ṭhin ni berin a lang. Pathian thu sawitu thu sawi lo ngaithlatute beisei dan chuan, Pulpita a thu sawi ang kha a ni tin hnathawhnaa tilang turin a ni.

Ringtute hi Kohhrana rawngbawltu kan ni emaw ni lo emaw, Kristian kan nih tawh chuan, Pathianniah emaw kar tluan hnathawhnaah emaw danglam chuang lo va, Kohhrana kan rinawm ang thoa rinawm zel turin kan inbeisei a ni.

Chutiang chuan, Politician-te pawh hi kan beisei a ni. He lai nun tak hi ka sawi uar duh chu a ni ta ni. Biak In leh a hung chhunga kan rinawm ang leh, Kohhrana kan intukluh leh rinawm (loyal) peih ang tho hian, engah nge kan ni tin hnaah kan rinawm leh tho theih loh ang? Entir nan, sawrkar office-a thawkte tan hian rinawm tak leh taima taka office hna thawh (practise) hi a awl bik a; tin, rem pawh a remchang bik a ni.

Chutiang chuan nung ta se, an nun a hlim zawk bawk ngeiin a rinawm. Mahse, hei tak hi an tan harsa an tih lai tak a ni thung niin a lang si. Kohhrana an rinawmna ang tak kha, office-a tih lan loh theihna tur a awm dawn em ni? tih hi zawhna pawimawh tak a tling. Hei lai nun ṭha, langtlang thei neih hi alawm, ‘moral reform’ (rilru puthmang dik) nei kan tih chu!

Mizo Politician-te hian Vai Politician-te an tluk thei: He ṭawngkam hi tun hnai maia vai Politician, Atal Bihari Vajpayee, PM hlui thih aṭanga ka rilrua lo piang a ni ve tlat! Kan ram Politician-te hian a hma lama kan sawi, mi dangte tana politician ni ngam ngat se chuan, an dam lai leh an thih hnuin entawn tlak leh fak hlawh tur an ni ve ngei ang.

A B. Vajpayee-a chanchin ha hipa mite sawi nia lang chu- ‘Ṭum thum Prime Minister a ni a; External Affairs Minister a nih lai khan khawvel ram dangte nen inlaichinna ṭha a neihtir a; PM a nih chhung khan a remhriatna avangin India ramin hun khirh tak a paltlang a ni,’ tihte a ni.

Man Mohan Singh-a, Prime Minister lo ni tawh hi, ‘Politician sawisel bo’ (clean politician) tih khawpa mi hming ṭha a ni. Finance Minister a nih laiin, ‘New Economic Policy’ a duang thar a, India chu Information Technology-ah a zuanin a zuan phah a ni,’ tih a ni bawk. Heng mi ropuite hian, mi dangte tan an politician ngam a ni tih a ni. An rilru puthmang, (moral) a dik thawkhat ni ngei tur a ni.’ Kan ram Politician-te hi engah nge, India ram pum chu sawi loh, Mizoram tan chauh pawh thil chhinchhiah tlak tak tak an tih theih loh bik ang?’

Tlangkawmna: Kan ram Politician-te hi an fak tlak hlein ka hria; a chhan chu, mi tam tak tih peih loh leh tih thiam loh tan an inpek vang a ni. Kan ram rorelna chang tawhte leh chan tumte hian, kan ram hi eng dinhmuna ding nge ni a an hriat ang aw? Tlu chhe mek nge, tlu chhe dawn? Pathian thu lamah la ta ila. Mizoram politics dinhmun hi Jerusalem leh Jeriko khaw inkara suamhmang tawk (Juda mi?) ang lo ni ta se, ṭanpuitu (Samari mi?), rilru puthmang dik pu (moral reform) nge, Puithiam/ Levia chi (Kohhrana rawngbawltu?) ṭanpui duh ta lote kha?

G.B.Shaw-an, “Politics thuthlung chhala kan inpeknate hi, mi challangte Pathian biak taka kan biakna hmai­thinghawng atan mai a ni,” a tih ang kha chu, kan ram tan lo ni lul suh se. Nichina kan sawi mi chi 4 zinga a chi li-na ang, mite tana thawktu/ ṭanpuitu ang kha kan Politician-te hi ni thei se; Mizorama awm chu, Aw, a va nuamin a va hlimawm dawn em!

- Rev. K. LungMuana