Coimbatore-ah bike intlansiak ka en

JK Tyre-FMSCI National Racing Championship 2018, Coimbatore-a neih mek chhim turin Vanglaini chuan he inelna huaihawttute lam aṭangin sawmna kan hmu a, kan hotuten kan chanchinbu aiawha kal tura min tih avangin keipawh phur takin September 1 khan The Zozam Times lama an infiamna huang ziaktu Mike Rokhum nen South India lama an khawpui langsar zinga mi pan hian kan chhuak a, September 2-ah intlansiak hi enin September 3 khan kan lo let leh a ni.

Infiamna chu
JK Tyre-FMSCI Na­tional Racing Cham­pionship hi a tawi zawnga hrilhfiah dan awlsam berah chuan bike leh car intlansiaka inelna hun a ni a, India ramah racing track ṭha tak a la tam loh avangin Coimbatore hmun hi hla deuh mah se inelna hmun atan an thlang a ni.

Car intlansiak lamah Mizote tel ve chiah lo mah ila bike lamah erawh Mizo tlangval leh rawlthar rual engemawzat an tel a, Rookie Cup tia a hming an pek, rider tuai tir deuhte inelna bikah tun ṭumah hian Mizo rawlthar paruk zet an tel a, senior rider ho inelna Gixxer Cup-ah Mizo pahnih an tel thung.

Mizo rider-te hi mahni inbengvar chawpa kal an ni lo a, Mizoram Motor­sports Association (MiMSA) ruahmanna leh buaipuia kal ṭhin niin MiMSA hotute inpekna leh buaina a fakawm a, kuminah chauh lo pawh India rama racing inelna lianthama tel tur hian heti lama tui Mizo ṭhalaite chu an lo hruai fo tawh ṭhin - MiMSA hian an thupui ber chu mipui rikrap zawng ni loa him taka bike intlansiakna tur hmun ngeia ruahmana intlansiakna neih ṭhin a, Mizote 'talent' phochhuah a ni.

Hello Nancy!

Bike intlansiak chungchang ziah lai laiin Mizo nula lamah 'peng' zawk a ṭul tlat a, he thu tarlang tel lo hi chuan kan article ziah kalh a kim dawn tlat lo. September 1-a Delhi kan pan hnu hian Delhi-ah kan thlawhtheihna thlakin Coimbatore lam pan tur Jet Airways-ah kan chuang a, hetah hian Mizo nula Nancy Renthlei kan tawng.

Hmel hlim leh nui sanga min lo chhawntu nula hian, "Mizo ve tho elaw in nih?" tiin zawhna min lo pe a, Mizo nih vang liau liauin vanneihna kan tawng nghal. He nula hian kan ṭhu fel hman chauh tihin kan chhawl hal tih rehna tur nimbu tui 'tui' tak min rawn khilai nghal a, passenger dangin an dawn ang ei tur pawh "Lo dawng su aw, a dang ka rawn pe ang che u," tiin an sem ṭhin pangngai aia tui leh tam zawk min rawn pe a, a khat tawkin min rawn ngaihven reng a, Pune-ah kan chawlh kawi zawk avangin he hmuna an chhuk dawn hian chithlum mum tam tawk tak min rawn hlui hlawk bawk!

Kha Mizo nulain min duhsak em em chhan kha kan hmelṭhat vang liau liau ti dawn ila, ka kalpuipa hmel ka enin a ni lo tih ka chiang em em a, Mizo tlangval kan nih vang chauhin min duhsak tih ka hria - Mizo nih hi ava nuam em aw, ka ti thar leh ṭhin. Nancy, kan lawm e.

Tlangval tan chona!

Ni e, bike intlansiak karah chona siam a ṭul tlat. Kan zinkawnga Nancy kan tawn bakah hian kan thlenna hotel Le Méridien-ah Mizo nula pahnih ngawt Lalrinfeli leh Lalnunfeli te kan tawng a, Aizawl aṭanga hla em em khawpuiah, five star hotel-ah Mizo nula kan tawn hi kan ring lo hrim hrim - anni pawh an fel hle.

Ka sawi duh tak chu hei hi a ni. Zinkawngah hnathawka awmbo Mizo pathum kan tawng a, hmeichhia vek an ni, tih hi a ni. Ram pawna hnathawka awm bo kawngah te, chhel kawngah te, sum hai luh kawngahte hian Mizo tlangval, chhel awm zawk nia langte hian Mizo nula zawk hi kan phak lo niin a lang a,

ṭan kan lak a ngai hle mai.

Min 'daih' lotu sorkar hnathawh tum leh tihpuitu lehkha zawnga kan phet suau suau lai hian kan Mizo nula fel tak takte chuan lunglen leh khawhar hnual suatin an din khawchhuahna tur an zawng a, chhungte pawisaa nula kan 'date' lai hian kan nula awm nem zawkte chuan an chhungte pawisa an thawn tawh zawk tih hi tlangvalten i hria ang u.

Tun ṭuma kan zinnaah chauh pawh ni loin lehkha zir leh hnathawka kan lo awm bo ve tawhnaah pawh Mizo tlangval aiin Mizo nulate hi ram pawnah hnathawk hmuh tur an tam zawk tlat. Hnamdang neih vanga Mizo nula pawngtawng dem leh ngawt ṭhin lo hian innghahna tlak ni turin tlangval ten ṭan la ang u.

Hello Coimbatore

Kan peng thui ta hret e, tunah chuan Coimbatore lamah kan let ang. September 1 zan hian hotel nuam tak, min sawmtu ten kan thlenna tura an lo ruahman sa Le Méridien-ah kan in pu lut a, khawvel khawpui 112 ngawta hmun nei, five star a nih avangin a hmun thlen hian hah a dam nghal sawng sawng thei.

September 2-ah intlansiakna hmun Kari Motor Speedway lamah min hruaitu tura ruahman sa motor hmangin kan inkhalh phei a, chanchinbu lam mi ringawt pawh India ram hmun hrang hrang aṭanga min sawm hnem avangin engkim an uluk a, a hmun pawh a nuam hle.

Intlansiakna lai takah 'Media Centre' an tih, media lam mi te awmna tura an buatsaih chu a awm a, heta ṭang hian duhthala nuamin intlansiak a en theih. He centre-ah hian in tur soft drinks leh zu leh beer thlengin a awm vek a, duh zat zat lamin a in theih a, ei tur lamah lah ei sen loha tam chhawpchhuah a ni bawk.

Heti taka zu leh beer thlenga a tam chung hian meng deuh phel phual emaw, duh aia ṭawng duh mah mah ang chi hmuh tur an awm lem lo a, hnamdang ho hian 'Zu hi an lo in thiam tak tak bik em ni dawn le' tih zawhna rilruah a awm veng veng.

Entawntlak

Coimbatore kan pan hma hian kan ticket, kan hotel thlenna tur leh a hmun kan thlen huna kan chet vel dan tur, uluk taka duan sa chu thawn vek kan ni a, a felfai sa hle.

Programme duan mai hi chu a harsa lo a, mahse a timing nen lam buaina awm miah loa an ti dik thlap thlap erawh an entawn tlak a, chumi chu nghak det ang aw, tih lam kha a awm ve chiah lo.

Coimbatore kan thlenin min hmuaktu motor a lo ding thlap tawh a, kan haw dawnin a hunah tak motor a rawn thleng a, racing-na hmunah a hunah tak engkim ṭan a ni a, an hnathawhah mitin an chiangin an entawntlak a, kan hun hman dan tur e mail hmanga min rawn thawn saah khan bawhchhiat an neih ka hre lo.

Him takin aw...

Vanglaini, September 2, Thawhṭanni chhuaka kan tarlan tawh angin JK Tyre-FMSCI National Racing Championship 2018, Coimbatore-a neihah Mizo tlangvalte an che ṭha takzet a, bike intlansiak thlenga Mizo ten hming kan chher ta hi a lawmawm hle.

Mizoram Motorsports Association (MiMSA) hnuaia rider chhuak zingah hian Lawngtlai rawlthar Jerome Vanlal­rengpuia chuan Rookie Cup-ah pakhatna dinhmun a luah a, Rulchawm tlangval PC Andy Lalhmangaihsanga chu pahnihna a ni thung. Thu lawmawm deuh chu round hnih tlanah Mizo rawltharte hi point hmuh a in an ve ve avangin champion puan lawk theih a ni lo a, tehna hrang hrang hman a nih hnuah qualifying lap time a ṭha zawk Jerome chu champion a puan a ni.

Gixxer Cup-ah Mizo tlangval Mal­sawmdawngliana leh Anthony Lal­awmpuia te an inlan bawk a, Gixxer Cup hi la tlan zawh loh niin round thumna la tlan leh tur a ni a, point-ah an inhnaih hlawm avangin Mizo tlangval pahnih tan beisei a la bo lo.

- John Zothansanga, Reporter, Vanglaini