Hausak chhuanga politics khelte u...

Mizote hi pawisaa lei theih vek emaw min titu chu kan politician-te hi an ni a, an pawisa neih ngah chhuanga politics-a zuang lut tharte pawh an awm zel a, heng mite’n Mizo mipui min hmuh dan hi a thinurthlak a ni.

Political party pawh hian mi hming ṭha leh mi dikte hi an party candidate atan sawm lut se a hriatthiam theih a, chutiang pawh ni lo ‘mi hausa’ ringawt mai an han sawm lut hi chu hriatthiam a harsa ka ti ṭhin. Mi hausate hausak chhoh dan, tute nge an nih a, tun hmain midik leh mifel, mi hmingṭha an ni nge ni lo pawh ngaihtuah lova, party tana sum theh chhuak thei tur leh campaign na sum ngah deuh tur an han thur nalh nalh mai hian Mizo mipuite min hmuh dan a tilang a ni.

Candidate nih tum ṭhen­­khat chuan mipuite retheih­na remchangah lain sum hmanga tihlawm dan an ngaihtuah ngar ngar a, pawisa hmanga direct leh indirect taka lei an tum a, a lei tumtute hi an zak der si lo. Tunah hian politician pangngai mipuite sum hmanga lo thlem tawhtute ang thovin politician chhuak tharte pawhin hei bawk hi an chhunzawm leh ta a, a zahthlak hle a ni e.

Political party tinte hi thlir ila, an candidate tur sawm chhuahte hi han en ila, tun hmaa mi ropui ni lo, tun hmaa mi dik ni lo, tun hmaa mi thianghlim ni lo, tun hmaa mi fel tia sawi ni lo, tun hmaa mi ṭha ni lo kha tunah pawisa an lo nei ta a, kan duh ngai loh tur mi hming ṭha lote thlengin tunah chuan candidate atan kan sawm ta a ni lovem ni?

Hausakna hmanga politics khela mipui ‘lei’ tumtute u, Mizo mipuite hi a leia lei tur kan ni lo.

- Lalthanmawia (Mathana), Republic Veng