1st Principal Sainik Sikul Chhinchhip nen

Hman ni chu Sainik Sikul, Chhingchhip Principal hmasa ber an sawn dawn tih ka hriatin, thlah ve reng reng hi a khaw neitute bat ni tlata ngaiin ka len chilh a. A lo felin a lo polite zek mai.

Amah hi Lt. Col. Inderjeet Singh a ni a, thiamna lamah chuan M.Sc, M.Ed. a ni a, a nupui pawh, M.Sc., M.Ed tho a ni awm e. Fapa pahnih an nei a, an fate chuan St. Peter’s School, Chhingchhipah Class I an zir ve ve a ni. Hetiang a nih avang hian anmahni pawh an inti khawtual ve em em a ni.

A sawi dan chuan he Sainik Sikulah hian Class VI leh VII chauh hawn a la ni a, naupang 122 lai an awm a. He Sainik sikul hi India ram chhunga hmeichhe naupang luhna awm chhun leh a hmasa ber a la ni a, kumin hian Class VI-ah hian hmeichhe naupang 6 an lut ve a, mipa naupang chu 57 an awm a ni awm e.

He Sainik Sikul hi kum 2004 aṭang daih tawha a hmun tur pawh tih fel tawh, sum ngai tur pawh central sorkar lam chuan a pass fel vek tawh a. Mahse khatih laia Mizoram sorkar khan a sum tum ve tur ang te a pass ve theih loh avangin engmah hmalakna a kal thei lo reng a. Tlem lai deuh phei chuan Tripura state-in an state a dah zawk tur tein an lo nawr hial ni awm takin thu a thang.

Chhingchhip mi tlang chhuak deuhte phei chuan Governor hnenah te hial hma la turin an lo nawr tawh a ni awm e. Tichuan 2009-ah sorkar thar lo ding chuan Sainik Sikul din tur chuan hma a la leh ta a; kum 13 lai a lo vei hnuah, April 21, 2017 khan hawn a lo ni ta a, Chhingchhip mipui chu an lawm hle.

Kum hnih vel a lo her leh meuh chuan sikul puitling a ni ve dawn tawh a, a nghahhlelhawm hle. He sikul hi tuna a lan dan chuan sikul ṭha tak tur a ni a, an invawnna pawh a ṭhat hmel hle. Hmeichhe tana seat a lo awm leh zelte phei hi chu a vanneihthlak takzet.

An hmun a fai ṭha a, thil reng reng a nih tur ang thlapin a lo awm vek mai han hmuhte hian Sainik sikul nge nge tih loh rual a ni lo. Sainik sikul tih takah zirtirtute leh staff dangte hi hmun danga mi deuh vek an ni a, tin, sipai pawh eng emaw zat an awm. An mamawh lian ber chu SBI a niin, hei hi Chhingchhip khuaah a awm ve tlat lo. Engemaw hlekah hmun danga SBI dawra an kal zel a ngai.

Tin, Sainik sikul hian hnam dang mai bakah sipai eng emaw zat a keng tel a, tualchhung mite nen kan la inpawlh­sawp tulh tulh dawn a, chuvangin Ci­vil Magistrate awm theihna tura Chhing­chhip hi siam vat nise a ṭha hle awm e. Heng thilte hi kan Sainik sikul Principal hmasa ber, a sulsutu thlah paha kan inkawmna eng aṭanga ṭul ni thei ka han sawi a niin, thuneituten lo bengkhawn ve se tiin ka han ziak ve a ni e.

- Patrick Z, Chhingchhip