Omicron vs Mizoram Sorkar

Mizoram hi Covid 19 hripui vanga buai rei pawl kan lo ni tawh a, tunah Covid hri thar Omicron-in India ram a rawn luh chilh leh reng tawh mai si a, kan fimkhur thiam hle a ngai dawn a ni.

Covid 19 hri vanga India ram state dangah harsatna an tawh viau laiin Mizoram chu eng vang emaw ni tehreng ni kan fihlim rih viau mai a, khatih lai khan kan CM in Pathian a ṭih vang ni ang dawn dawn te khan sawi a awm hman a. Mahse a hnu rei vak loah hri hian min han luh chilh ve ta tak tak a, a buai rei ber pawl kan ni ta der mai a.

Mipui eizawnna a buai a, sorkarin chhawmdawlna a pe ṭha thei si lo a, CM relief fund a mipui thawh khawm sa sem bak sorkarin chhawmdawlna hriat tham tih theih a nei ta lo a, a hnuhnung kawl ek kan thai a ni ta ber kha a nia. Kan hmai a uar lo viau a nih kha.

Mizoram pawn aṭanga khualzin lo lutte chu Rapid Antigen Test (RAT) hmanga endik zel an ni tawh a, Covid-19 positive pawh engemawzat hmuh chhuah a ni. Covid chi thar Omicron hi a darh chak hle a, ram pum a buai leh ṭan der a. State tam zawkte hi chu hri leng laka fihlim angin an awm hman tawh a, hri kai hmuh chhuah thar pawh awm mang loin hun rei tak awm tawhin nun dan phung pangngaiah an kir leh ṭan a ni.

Mizoramah pawh positive thar hi kan pung chak leh ta riau mai a, hetiang a nih chuan mipui kan fimkhur lehzual a ngai tihna a ni. Sorkar chuan lockdown leh inkhirhna dan chi hrang hrang duan bak tih theih a nei lo tih kan hre tawh a, tuna kan kal dan anga mipui eizawnna tibuai zawnga kal hi chu sim ila, mitin hi fimkhur leh zual ṭheuh ila a duhawm zawk viau a ni.

Omicron vang hian Mizoram pawhin loh theih lohin buaina thar kan hmachhawn dawn a, kan lo him deuh zawk nan airport-ah pawh hian endik hna hi uluk lehzuala kalpui a ngai dawn a ni.

Ram pumah Covid hri kai an pung chak leh viau a, Mizoramin Covid vanga buaina lian zawk kan tawh tawh lohna turin sorkar hian lockdown leh eizawnna tibuai thei thil lam aiin state pawn aṭanga lo lutte endik hna hi khauh zawkin kal pui se.

Mipui lam erawh eizawnna leh nitin khawsak tibuai tam lo zawnga in khuahkhirhna pawh kalpui a hun tawh a. Hmai tuam leh a kaihhnawih invenna lam in hriattirna hi uar zawka puanzar ni thung se, mipui leh ram tan a ṭha awm e.

- Lal Nun Nema Khiangte