MIMER-ah hian... MNF hi ngawi mai mai rawh se
MNF MLA chhuanvawr leh an general secretary Pu Lalruatkima, Falkawna Mizoramin medical college a neih hmasak ber, Mizoram Institute of Medical Education and Research (MIMER) dinna atana infrastructure zawng zawng chu MNF din deuh vek niin a sawi a, "MIMER din a nih theih nana infrastructure zawng zawng hi MNF hun laia din deuh vek kha a ni. Gate lian tak an siam bâk saw Congress sorkar hian building 10 pawh MIMER atan hian an sa lo, an sa a nih chuan sawi rawh se," a ti.
Tin, MNF Vigilance Chairman leh Health Minister hlui Pu R Tlanghmingthanga hovin hman ni khan MIMER hi an va tlawh a. Congress sorkar chu Falkawna Referral Hospital din kawnga MNF sorkar hmalakna chhunzawm duh loah a puh a; Falkawn Refferal Hospital (MIMER) building sak zawng zawng te chu cheng khat pawh revise lovin a tira sum ruahman angin an sa zo vek niin a sawi a. Congress sorkar chuan building pakhat pawh an sa ve lo niin a sawi.
Thil nuihzatthlak tak mai chu, “Tu nge building sa?” tih hi mipui zawhna a ni lova, “Tuin nge medical college din?” tih hi an zawhna a ni. MNF hunlaiin medical college an din thei lova, MNF hunlaiin Referral Hospital takngial pawh an kalpui hleithei lo; Congress hunah medical college hial a lo ding ta a ni. He thilah hi chuan MNF hian fing takin ngawih chuh se miin an sawi an sawi zui lo tur a ni ngai a, anmahni zawk an lo ṭawng chhuak ve chhen a, nuih an tiza tak zet zet a ni - anni hi.
Sorkarna siam ve ta chuan mahni hunlai ṭheuhin building chu an sak a ngai. Falkawna building-te hi MNF hunlaia sak a ni ngei ang, a dik ang. Chutah pawh zawhna chu, “Eng ang building quality nge an sak?” tih a ni a, building chhe tak an sa a ni.
Hei hi MNF ngei pawhin an pha bik lovang. Heti hi a ni a, building an sakte hi chhuan tur a ni lo, eng party pawh sorkar se, eng anga party chak lo ber pawh sorkar se building sakte chu a châkin an châk vek a, ‘acheivement’ a ni lova, sum siamna remchang ang hiala an hman ṭhin a ni.
Congress hunah medical college an din a, MNF hian an lawmpui theih loh pawhin lo ngawi mai mai se miin an sawi an sawi lo tur a ni a, MNF hian hming ṭhat ve ṭalh tumin, “Hemi chin hi kan tel ve na,” an lo ti kawi sawi vel a, mipui nuih a za a ni.
MLA ni lai tan phei chuan ngawih ve mai mai tur a ni a, inthlan dawn thlenga miin an nuihzat tur thu hi sawi sawi duh loh tur. Health Minister hlui tan phei chuan ngawih hmakna tur a ni a, “I hunlaiin engmah in thlen pui lo,” tia miin an nuih letna tur mai a ni si a. Chuvangin, mi hming-ṭhatnaa kan lawm ve thei lo a nih pawhin va insawi luh mai mai tum tur a ni lova, ngawih hi finna a ni a, ngawih hun hi hriat a ngai a ni.
- David Lalremruata