Kan ṭawngkam hman hi
Kan ṭawngkam hman ṭhin hi chhut chian a ngai hle ṭhinin ka hria; a bikin Politics thilah. Mi sawi duh vak chu a ni lo mai thei a, mahse ṭulin ka hre si a, kan tarlang teh ang. Mi ṭawngkam pawh ka hre zeuh zeuh tawh.
Congress - Vaipawl: Hei hi ṭawngkam upa tak kan hman lar pawl tak a ni. Mahse thil pawi a ni thei em tih hi chhut a ngai. Congress hi vaipawl a ni lo a, Political Party hming a ni. India ramah kan awm a, thil kan tih leh kan sawiah hian inpumkhatna kan lo tihchhe thei em tih in zawh fo a ngai.
Mizoramah he party zawm hian, Congress party an lo din ve a ni mai a. Sakhua ang zawng leh hnam ang zawnga tih vak vak hi a ṭha ber em? Central lam an hruaitute pawh Hindu an ni tih fo te pawh hi a ṭha lo. Pawi kan sawi fo em aw tih hi kan chhut fo a ngai. Vai ho ṭawngkam aṭang hian hnam khawih thei ang zawnga ṭawng hi a vang deuh.
Sakhua leh a ṭha lo ang zawnga lokal pui duh an awm chuan, mimal thu a ni. An tum chu ram siamṭhatna tur leh ram inrelbawlna tura din a ni. Ram tan enge an thawh tih hi en zawk tur a ni. Kan ram kan hnam a him em tih en zawk tur a ni. Congress party-ah Hindu kulmuk an awm chuan, Congress party-ah Kristian kulmuk awm ve mai tur. Kan ngaihtuahna hian thiam taka thil tih ve dan tur zau tak thlir dan thiam ve rawh se.
BJP - Hindu: Hei pawh hi fimkhur a ngai. A chunga kan sawi ang hian BJP hi Hindu pawl a ni ngawt bik lo a, Political Party a ni. Kal fir an lo awm chuan a ṭha ngei mai. Mizoramah pawh lo zawm ve-in, he party hi an lo din a ni mai. He BJP-ah hian Hindu chawilar tum leh kulmuk an awm chuan Kristian kulhmuk tah hian awm ve mai tur.
Mizorama BJP party te hian Hindu chawilar an tum ka ring lo. Kan ram, kan hnam leh sakhua veng him turin ṭan an lak vek zawk ka ring. India ramah kan awm a, in pumkhatna hi kan vawn him ve reng a ngai. Tunlaiah ram leh hnam humhalh tur chuan fin ve a ngai.
Tuna kan mamawh chu ‘Kristian Congress,’ hmun dang/ state danga Congress ten an entawn tlak kan neih a ngai. Tin an ngaihsan leh zah tura kan awm a ngai. Chutiang bawkin BJP-ah pawh hmun danga BJP ten an entawn tlak, Kristian nun keng tela awm a ngai. Ram kaihhruainaah te leh corruption lamah te pawh. Chutih hunah chuan he Kristian state hian ngaihsan kan hlawh ang. Kan Missioanary te hna thawh pawh a chak ang.
Inthlang ramah hian Political party hi thlauthlak theih a ni lo, kan thiam ve a ngai. Pathian hna thawh erawh chu ka sawi phak lo. Thiam takin i ṭang khawm ve teh ang u. Ka sawi hi a dik vek kher lo mai thei. Thlir dan chi khat mai a ni e.
- Vanlalruata