Congress buaina tih kha

September 2, Vanglaini chanchin­buah khan Pu C Van­lalvena, Dinthar khan, “Congress buai rukna ri ret ret” tih kha thu awmze nei deuh, thiam taka thu khuh si khan a rawn ziak a, kha kha a source hriat ni kher lo mah se politics ngaihven deuhte chuan thudik awm sa an ti hmiah tawh a, a ruh lang deuh zawkin thual i han tum dawn ang hmiang.

Congress chhung­kua hi an inngeih lova, a bikin an hotu lian zinga mi Pu R Lalzirliana hian Pu Lal Thanhawla ni lo Pu Hawla lamhnaite hi a mil lo hle niin an sawi. Pu Zira hi Congress-ah mi pawi­mawh a ber zinga mi niin Vice President a ni a, Pu Hawla hi kum 80 a ni tawh a, a chawlh hunah President ni thei turah a in ngai a, mahse Congress lamah hian Pu Lal Thanzara leh Pu Zodintluanga te hi President thlak thei turin an sawi ri nasa ta zawk mah si a, Pu Zira dinhmun hi harsa takah an dah niin an sawi.

Hei hi chu thu­hran a ni a, hei aia ril zawkah hian thil inthup a tam hle mai a lo ni a, politics tuipui mi chuan an hre sa thung a ni. Pu Zira department chanah hian contract lian zawng zawng deuhthaw hi NECS hian an chang deuh vek a, anni hi Pu Robert Romawia te lam an ni a. Pu Zira leh Pu Robert hi an inzui hnai hle tih chu mipui pawhin an hriat a ni.

Pu Robert-a car tharte kha Pu Zira hian a hawng/ tlangzarh a, social media-ah miin fiamthu thawhna atan an hmanga a darh chuai chuai a, Cong­ress Minister ṭhenkhat leh Bhawan lamte chu an lo zak ru tawh a ni. State pachhe taka cheng chunga cheng vaibelchhe 1.26 chhiah awl pawh kha Pu Zira hian a phur puiin a nawr nasa tiin an sawi.

MP inthlan khan ṭangrual candidate-a Pu Robert-a a awm khan Pu Zira hi Pu CL Ruala tan khan a campaign ṭha duh der lova, Congress candidate aiin lehlam pawl candidate kha a hnimhnai zawk niin an sawi. MP inthlan zawh hlim khan Congress hruaitu lian zingah Pu Zira ban duhtu hi an lo awm daih tawh a, Pu Hawla hian a chhan hram hram zawk niin a hre chiange chuan an sawi.

Congress an sor­kar a, contract lian tham thawk thei te, consultancy firm hrang hrangte pawh an awm chunga Pu Zira Department - Home, RD, Agriculture etc-a hna lian apianga Cong­ress ni lovin an chang nalh nalh hi Cong­ress ho ngaih ṭhat lohna a rei tawh a, Bhawan lamah pawh he boruak hian nghawng a lo nei lian tawh tih Congress lama mi pawimawh chin chuan an hria ang.

Hei, hun a kal zel a, kan ti nek neka kum 2018 kum chawhnu lam a lo thleng leh ta a, ‘ber’ thla hial kan lo chuangkai ta. Inthlan boruak a rik meuh chuan Congress chhungkaw buai hian zual lam a pan a, Pu Zira hi a hma aṭanga a ruka a lo awn ruai ruaina lamah hian Congress ni lo BJP or MNF lamah a kal thut dawn niin tlang titi a thang ta chiam a ni.

Pu Hawla bawk hi mi thil thlir thui leh politics thiam a ni a, Pu Zira chhuah law law hi Congress tana ṭha zawka a ngaih chuan a chhuah tir ang a, a chhuah loh a ṭhat zawk chuan Congress Nomination Committee member ni phak Pu Zira hi a duhna bial a thlan tir chatin a rinawm, tih hi politics lam miril deuh te titi a ni leh ta a ni.

- Lalmuanpuia