Ram leh Hnam thil a ni

Tuna Mizoramin Champhai lam an hawi ṭhup a, an ngaihven ṭhup hi DC Transfer leh Kuhva smuggling ngawr ngawr aia pawimawh zawk, a chhan lian/ zau zawk a la awm.

Kum 15 kal ta vel aṭang khan an sum lakluhna a dik lo a ni tih hriat tak tak hausa thut thut Mizoramah an pung nasa a. Kan sawi sep sep a, kan kawk ru a, khawtlangah pawh an tuitla lo tlangpui.

Amaherawhchu, hun a kal hret a, hengho hian sum­dawn­na pangngai lian pui pui an rawn din ta thluah thluah a, tunhnaia Aizawla sumdawng rawn lian thar tam zawk hi hetiang hi an ni deuh vek emaw tih tur a ni.

Kan pawl zah­awm pui pui te, kan event lian te an rawn sponsor a, charity lamah te an inhmang a. Rin loh pui puiten fakna thu an chhakchhuak a, political party tinah an inphum ru a, sum thawh hnem thei thei an ni bawk si.

Kan khawtlang leh Politics thlengin an thunun nasa chho ta viau mai a nih hi.

Mizo ṭhalaiten kan ngaimawh tlang a, do let dan tur kan hre chiah si lo. Kan insawh kan insawh a , chutih lai chuan tun kan issue hi a rawn lang a, dik lova hausa thutte nekchep theihna chance niin kan hria a, Zoram khawvelah a boruak a alh ta hluai mai a nih hi.

DC transfer issue emaw, Champhai lam Issue emaw ringawt a ni lova, ram leh hnam issue a ni.

Dikhlel taka sumdawng hausate laka kan khawtlang, kan politics, kan ram leh hnam chhanchhuahna bul ṭan turin Mizo­ram mipuiten Champhai mipui min thlir ta ṭhup mai a nih hi.

Mi tlem te te avanga ṭhenkhatin a khaw nawta min hmuh dik loh mek lai hian dikna kawnga Mizoram hmakhua sialtu kan nihna chance hi i bawh­pelh lo ang u.

- Samuel Laldinthara