Kan ram hruaitute hausak dan hi

Kuhva kan sawi mek a, thil tam tak zinga pakhat ve mai a nih avangin thil dik lo dang hi kan hmuh hmaih ang tih a hlauhawm. Ram hruaitute hausak dan lam zawk hi kan chhui a ngai.

Congress hruaitu kum hlun leh Chief Minister ni rei ber Pu Lal Thanhawla khan a ṭawngkam lar takah 'a vàn tla' tih kha a sawi ṭhin a, Hmartawnphunga fapa a nih vanga compensation hrang hrang an hmuh dan leh ama thawh chhuah ni hauh si lova malsawmna sum tam tak a dâwn kha a sawi ṭhin a ni.

Pu Hawla kha a dik ta vek e, tih sawi tur ka hre lova, Pu Hawla khan a dik lo a sawi mam tih sawi tur ka hre hek lova, mahse Pu Hawla kha chuan a hausak chhanah khan han kawh mai tur hi a hre ve tlat a, chu chu huaisen angreng tak khan (a dik leh dik loh chu kan hre ve phak lo) a sawi ngam tlat a ni.

Hri hian Pu Hawla hi eirukah a fihlim leh a fihlim lo tih chu a sawifiah lovang a, mahse a hausak chhana sawi tur chu a nei tih mai hi ka sawi chhan chu a ni.

Congress hunlaia Minister leh MLA te kha han bih chiang ta ila, thlahtu aṭanga mi hausa chhungkuaa sei lian pahnih pathum chu an awm ve, a tam zawk kha mi hausa chhungkua an ni bîk lo - an va han hausa tawntaw tehlul em si ve le! Khatihlaia Minister tuna tla ta te, tuna la Minister chhunzawm zel te pawh hi en ila, an thlà tin sum lakluhna (known source of income) aṭanga teha kum 50 pawha an neih phak loh tur an nei ta fur mai hi a ṭha lo hle a ni.

Chhim lama ADC hi kan va ral thlir hian sum ringawt atchilh, District Council hruaitute hausa thur thur leh mipui rethei si angin Aizawl lam aṭang hian kan va melh deuh bik, nimahsela Aizawl lam hian kan dinhmun dik tak kan hre lo zawk a ni. Kan MLA leh Minister-te hausak tawhzia hi kan hre chiang em le - mipui retheih sizia nen hian.

MNF Minister te hi kum 5 em pawh la minister si lova hausa tak tak an awm leh thluah tawh. Tuna a kal danah hi chuan an Department chan ṭheuha hna lian hi khawi consultancy firm èmaw an han pe a, a ṭhen phei chu Congress hunlai pawha hna hmu thei tak tak te tho kha an pe leh. A chhan chu a ziaka finfiahna awm thei si lo hian Minister te hi an rawn tilawm lêt ṭhin a, chumi inteltual khawm chuan kan Politician a vulh hausa a ni.

Tichuan kan contract hna a chhia a, MNF hian an tireh thei dâwn emaw tih laiin an uar zual deuh deuh a nih si hi. MNF Minister zingah mahni hming tel ve si lova firm ṭhenkhat hna pe thiam riau te an han awm a, a hmaa firm neih sâ hmang tawh lova firm dang daih hmanga mahse a pawisa kalna dang chuang si lo te pawh a hriate chuan an sawi leh ta.

Politician hausak a, mipui retheihna ramah hian Kuhva ni lo hi vei tur a tam asin. Kum 2023 inthlan awm leh tur hi beng sikin i ngaihtuah tlâng ang u. Politician hausakna ram hi kan siam ṭhat a ngai a ni.

- Lallungmuana