A semtu nge thu zawk, sem tirtu?

Chief Minister Pu Lal­thanhawla chuan Serchhip RD Block chhung khaw hrang hrangah ‘Mizoram Rural Housing Scheme 2017-18’ dawng tura thlante hnenah Rangva a sem thu Vanglaini Dt. 5.9.2018 ah a lo lang a, a sem lai pawh tihlan a ni. Chief Minister hian tunhmaa a sawi dan ṭhin an sawiah pawh, “Isua chuan amah ringtute chauh a chhandam a, keini chuan min vote lotute pawh rangva kan chhipchhuan tir,” tia an sawi pawh min rin phah tir ta hial a, amaherawhchu, a sem a te hi tute nge an nih erawh chu ka va hre ve chuang lo.

A thuhrimah, thil sem dawng tura thlante hnenah CM-in a sem tih a nih lai khan tunge a dawngtu turte thlangtu ni ang aw, tihte ka ngaihtuah a. A semtu nge thu zawk, a semtirtu tih pawh hriat a chakawm mang e! Thil sema te kha tu ta nge tih leh a semtu khan ama ta nge a pek chhuah tihte pawh min ngaihtuah tir ta zel a. NLUP sem tihte pawh hi a lar hle a, NLUP scheme hnuaia trade hrang hranga an thil semte pawh hi mimal ta emaw, party bil ta emaw aṭanga sem ni lovin, Mizoram mipui zawng zawngin kan thawhlawm tlingkhawm sorkar kuta awm aṭang chauhin a ni a; hleih nei miah lova sem chu an tih makmawh a ni.

Rangva a ni emaw, NLUP/ NEDP emaw pawh nise a semtu turte hi Line Depart­ment-a mawhphurtu official-ten a dawngtu tura thlante hnena an sem hi kalphung pangngai a ni zawk. Entirnan, thlai chi, thlai ṭiak, sangha note, hlo tur leh a dangte pawh official-ten an sem ṭhin laiin; NLUP chu ruling MLA-te chauhin an sem ta mai te, Chief Minister hialin a sem buaipui hna a thawk ta te hi sorkar dan kalh a niin mipui zahlohna nasa tak a ni.

Thil sem dawng leh dawng lote kan inantlan vekna kawng chhia leh a dangte pawh hi Chief Minister leh MLA-te hian mawhah la ngam ve tawh sela, tun ai chuan hma kan sawn ngei ang.

Mizoram Congress sorkar hi a sorkar tirh phat aṭanga an hna hmasa ber chu sorkar hmasa sawichhiat te, sorkar hmasa thawh ṭhat zara tuna nuamsa taka an ṭhutna New Capital Complex building zawng zawng te, Referral Hospital building sak sa an luah sen loh, 5th IR Bn. mi sang rual te, term khat zet an luahtir leh building pakhatmah ban pawh phun belh loh, quarters chena an luah ṭhiap ṭhuap lai te, Medical College meuh atan pawh iaiawm loha lo ruahmantu sorkar hmasa hming lam rik hreh em em leh inpuhchhiat ringawt hmanga ram lak tum lo hian kan Politician-te hian midang thiltih ṭhatte hi fakin chawimawina chang hre ve tawh sela, tih hi ṭhangtharte ngaihdan pawh a ni.

An nih lohna chena mite puhchhiat a, indirect taka mahni insawimawi tum tawh lo hian kan ram hruaitute hian thufing zirtirna lar tak, “Chawimawi nih i duh chuan chawimawitu ni phawt rawh” tih chu hmang ṭangkai hram tawh sela. Ṭhangtharte entawn tlaka sulhnu ṭha hnutchhiah i tum ṭheuh ang u.

British ropuina chhan ziaktu pakhatin a ziah dan chuan, “Thil ṭha lo lang, mipui tana ṭha chu mi tihah an khek lova, a titu chu kei ka ni ang” an tih ṭheuh avangin hnam ropui zahawm leh nuamsa nih an hlawh a, Mizote pawh hian thil ṭha tih tur lo lang chu keiman ka ti ang, tih tum ṭheuh tawh ila, kan ram hian malsawmna ropui tak a dawn phah ngei ang. A titu ni lova, mi tihsa lo dawng vetu nih lama kan intlansiak chhung chuan ram ropui kan thleng lovang.

- R.Lalhmangaiha, Bethlehem Veng