Retheite hnena ‘thilphal’ dan tenawm
Mizoram Assembly inthlan lo awm turah hian hmuh peih loh leh tun aṭanga ngaihtuah pawha ka ngaihtuah zui peih loh hi a awm a, chu chu sum leh theihna (dan piah lam) hmanga intitling leh turte leh an chhungte khawsa zia tur hi a ni.
Tuna Mizorama Minister pakhat hian amah kawmtute hnenah kum 2013 inthlana pawisa a hman dan a sawi a, chu pa chuan zep hauh lovin, “Kan biala candidate zawng zawngin sum kan chelek vek a ni,” a ti e, tiin an sawi a, a sawitupa hi Minister-in a hrilh ngei mihring hi a ni.
Mizoramah hian sum an chelek lo emaw kan ti a, MPF-te hian ven theih chen nei mah se ven theih loh leh an ven hmaa sum chelek hi a tam ta hle mai.
Bial pakhata MLA din tum chuan an ṭhalaite ko khawmin ‘thil ṭha’ a ti tlut tlut a, eng eng emaw a siamsak a, inhlawhna a siam a, langsar thei turin thil a ti kual a, chu bial chhungah chuan in a luah a, a motor pahnih vel hi a dah tawp mai a, tlin ngei ngei tumin hun rei tak chhung chu a lo bei tawh.
He MLA candidate tur hian khawpui aṭanga thingtlang lama in luaha a awm chilh chhan hi bial a hmangaih vang lam ni lovin ‘MLA tlin’ a duh vang mai mai a ni a, a sum neih sa hmangin inlei tlin a tum a, ‘sum sem’ tih hming pu si lovin a pawisa a chelek a, mipui hneh a tum a ni hei hian.
MLA nilai pakhat chuan MLA fund an neih sa chu inthlan dawna sem atan a vauchher a, heta sem han tih hian pawisa faia sem ni lovin pawisa hmanga mipui tihlawm kual a tum a ni. Mi pakhat ve thung chuan a din tumna bialah ‘inhlawhna’ tih hming puin mipui a ko khawm a, tichuan ni khata hlawh ṭhin pangngai aia tam a pe ham ham mai a, hei pawh hi inlei tlin tumna bawk a ni. MLA-a din tumna hmunah kher ‘inhlawhna’ siam hi MPF khap hmaa sum semna a ni. Pawisa hmanga miretheite tihlungawi tumna a ni.
Tun hnaia sorkar sum hmanga rangva semte hlei hlei hi sum hmang bawka intihtlin tumna a ni a, miretheite retheihna remchanga hmanga, “Inthlan dawnah rangva kan pe anga kan tilungawi anga kan tling leh mai ang,” tihna rilru tho a ni. Miretheite retheihna chu sum (rangva) hmanga va lei an tumna a ni.
Miretheite inthlan dawna hmangaih thut a, pawisa hmanga thiltithei taka lan tumte hi miretheite hian min hmangaihtu tak tak an nih leh nih loh kan hriat hran a hun tawh a ni.
- Lalthanseia, Mission Vengthlang