Sorkar hnathawk sum thawh tur chhinchhiah kher hi

Tunlaia inhnialna lian tak pakhat chu Covid-19 dona tura May aṭanga December thla, 2020 chhung sorkar hnathawk a lian aṭanga a te thlenga Group A, B leh C-te hlawh aṭanga 10% leh Group D-te hlawh aṭanga 5% thawh tura tih hi a ni. Hei hi tih luihna awm lo, mahni phalna anga thawh tur tih ni si en nawn a ni tur leh, chu aia hriatthiam harsa tura a thawhtute hming kha a ziaha ziah luh tur, chhinchhiah thlap thlap tura tih a ni hi a ni. Hei hian sorkar hnathawk lu a tihai dawn niin ka lo thlir ve tlat mai, engnge i ngaih ve dan le?

Heti zawng hian ngaih­tuahna ta la: Rama leh Liana chu inkawm chawt mai an ni a, UDC ve ve an ni a, sorkar office-ah ṭhian ṭha tak an ni. Rama chuan in sakna tur loan a lak bakah bike leina tur loan a lo la tawh a, a hlawh aṭanga loan rul chungin chhungkua a enkawl a, a fate 3 chu English Medium School lamah a kal tir mek a ni. 

Rama hlawh zat chiah hlawh ve tho Liana chu tlangval a la ni a, loan pawh a la ve lova, chhungkaw khawsak nuam pangngai taka sei lian a nih vangin a hlawh a kham em em bakah lirtheite pawh a lei thei a ni. Rama leh Liana hi office khata thawk, rank inang, hlawh zat pawh inang an ni na chung hian sum lama an harsat dan hi a inchen lo teh mai asin. 

Chief Secretary, Mizo­rama sorkar hna­thawk hotupa ber hovin sorkar hnathawk pawl hrang hrang chuan Covid-19 dona atana sum pek an han rel ta a, sum thawh duh lo bik nih chu a nuam lovang, a rel puitu hi Chief Secretary aia hniam deuh te chu ni se ngaihdan dang deuh sawi ngam pawh an awm mai thei a ni, mahse CS meuh bulah chuan May to December pawisa thawh kha an titlu ta a ni. Mahse, ni khat bak a rial hman lova sorkar hnathawk chu an Whatsapp group leh an office lamah an han titi ṭan ta. May to December pawisa thawh an lo inhuam tak tak lo tih a chiang chho leh ta a ni. Liana tan chuan pawisa thawh a harsa lova, amaherawhchu Rama tan chuan loan chi hnih rul bawk leh naupang sikul kalna leh chhungkaw khawsakna nen a harsa ta a ni.

Tlangval inchawm thei Liana chuan pawisa lo thawh ta bik se an 'chhinchhiah' kulh dawn a, mahse sorkar thlawp loh vang pawh ni lova pawisa thawh thei lo Rama chu chhinchhiah ve loh a ni dawn ta a ni. Hei hi kan sorkar hna­thawkte buaina ka hrilhfiah ve thiam dan a ni. 

Chhinchhiah kher hi pe tura inphutna a niin ka hria, keima mimal ngaihdan a ni.