Felna leh rorelna dik – a kang chat ta em ni?

Tun hnaia Mizoram khawvel kan thlir chuan Kuhva, Champhai Deputy Commissioner leh Mizoram Sorkar kan hrawn mek te hian kan rilru a luah a, zawhna tam tak kan nei a ni. Chung zawng zawng lo awmna chhan – rorelna dik leh felna chungchang hi Zawlnei Amosa bu behchhanin kan ram mamawh a nihzia ziak ve ang.

Amosa hun lai khawvel

Amosa hi zawlnei ropui leh hmasa ber pawl a ni a; a hming awmzia chu ‘kengtu’ emaw ‘phuntu’ emaw tihna a ni. Zawlnei sikula kala zawlnei hna zir ni loin ran rual a enkawl laiin Pathianin zawlnei ni turin a ko (7:14). Amosa hun lai khawvelah hian Israel ram – chhim leh hmar te chuan an hausak vanglai tawngin an chhehvel hmelma te pawh an hneh a. Sakhaw lamah pawh an puithiamte chuan inthawina an uar a, Jerusalem pawh sipai te’n vengin mipui pawh an hausa hle a ni. Mipuii’n Lalpa ni ropui tak mai an nghah lai takin zawlnei Amosa hian Israel mipuite chu an sualna sima an hawi kir loh chuan hrem an ni dawn tih sawiin a vau.

Lal leh mipuite chuan nawmsip­bawlna lam uarin an dan tam tak an bawhchhia a. Hleih neia ro an relna chu Pathian duh loh zawng tak a niin an sim loh chuan hrem an ni dawn tih kan hmu. Mi rethei leh harsa zawkte rap beta rorelna leh dik lo taka mi retheite thil neih an laksak te chuan Pathian thinurna a tawng baw dawn tih Amosa hian a sawi a, sim turin mipuite a ngen a ni.

Tun Mizoram khawvel

Hna inchuhna khawvel, theihtawp chhuah tak meuh meuh hnuah pawh duhsaktu neih ngaihna ram, sum leh pai neihna tura thil dik tawk lo tih hreh lohna khawvelah kan cheng mek. Mi dik tak tan chuan engmah hi sawi ngam a ni lo a, a nihna ang anga en liam thiam chu mi fing leh mi ṭha, thawhpui nuam leh mi pangngai nia ngaihnaah kan awm ve mek e.

Sum leh pai ngah tuma hnathawh, sum dawn leh inpeipun tum te hi sual a ni ngawt lo a, hmasawnna leh Pathian malsawmna kan dawnna tur pawh a ni. Chutih rual erawh chuan dik tak leh ṭha taka hausak tuma hmasawn tum erawh chu kan tlin lo a, kan buai zo ta a ni. Bible-in min kam ai chuan pawisa-in min kam hi kan duh zawk.

Kan chhe ta vek em?

Chhe vek lo e, Mizo mipui tam zawkte hi dikna duh, Pathian ṭih mi kan ni. Mahse a dik lo zawkte leh a hausa zawkte hian min thunun tlat a, chu kalphung chu zawm ve mai loh chuan dam khawchhuak zo dawn loa inhriatna rilru hian min tuam tlat a, mi tam tak chuan chu kalphung chu kan zawm a ni. Pawisa neihna tura thil dik vak lo tih hi thil dik tak tiha retheih reng aia ṭha zawk leh fuh zawka kan hriatna rilru leh kan kalphung nghet ni chho mek hian min awpbet a, kan tuar ta tlawk tlawk mai a ni.

Mi dik huaisen, Pathian ṭihten an theih dan danin dikna an au pui a, Pathian zarah hnehna pawh kan la chang ngei ang.

Tun boruakah pawh hian dikna duh hi a tam zawk kan ni, kan theihtawpin kohhran te pawhin dikna hi ding chang se tiin kan inzirtir a, kan tlangaupui reng a ni. Kan pi leh pute aṭanga dikna duh, Kristian zirtirna laipui chhawm nungtu Mizote kan nih avangin dikna hi kan nunpuiin kan la beizel dawn a ni.

Nang leh kei kan pawimawh ber

Ram leh hnam tana mi pawimawh ber chu nang leh kei hi kan ni. Rorelna dik leh felna te pawh kan nunpui hmasak tlat chuan roreltu leh thuneitu te pawhin dik lo takin ro an rel ngam loin an thei lo. Dik lo taka hausa nia kan hriat te, kan thiamna leh kan theihna ni lo – tute emawin min duhsak avanga hna neih te hi duh lo tak tak ila. Chutianga tih tum sorkar, mimal leh pawl te hi dodal tlat ila, dik lohna min zawrh ngam lo, thil dik lo min tihpui theih loh mihring hi ni ṭheuh ila, dikna chu a lo awm ngei ngei ang.

Keimahni lam hi thil dik lo hmanga tih lungawi theih, sum leh pai hmanga lei theih, sual ti tura thlem theih leh thurualpui theih kan nih chhung chuan kan ram leh hnam hian dikna a nei thei ngai lo ang.

Kohhran hruaitu atan mi dik lo kan duh lo a, mi dangte pawh dik taka thil ti turin kan beisei ṭhin. Chuti anga mi kan beisei ang chiah chuan keimahni pawh hi inbeisei ila, thil dik lo leh ṭha lo ti lo tura mahni infuihin kan ram leh hnam pawh kan siam ṭha nghal ang. Kan sual reng a nih phawt chuan hremna hi kan pumpelh dawn lo.

Rorelna dik leh felna lui hnar, sum leh pai thianghlim lo leh sualna chi hrang hrangin a tih kang chat lek lek tawh hi nang leh kei hian dikna leh rinawmna hmangin hna thar siam ila. Kan chhungkua, kan ram leh hnamah hian luipui kang chat ngai lo angin lo luang reng rawh se.

- Rinfela Zadeng