Champhaiin MLA a nei lo em ni?

Hman ni mai khan Lunglei District kha MLA nei lo ang maiin an MLA te kha RTPCR chungchangah khan an bo daih tawh a. Lunglei hmangaihtu Lunglei ṭhalai rualin RTPCR an nawr lai khan a ṭhen phei kha chuan Lungleiin RTPCR a mamawh loh thute an sawi hial a ni.

TrueNAT khawl an lei belh thul, kha­tiang thil kha khaw chhak lamin an hma­chhawn leh mêk a, Champhai District chhunga MLA zawng zawngin Kuhva tawlh tuk chungchanga ṭawng­kam khat pawh an nei ngam lo hi chu a va han zialo tak em!

Mizoram hian ram hmangaihtu ni lo, party hmangaihtu hlir politician a nei a nih chuan eng hi nge pawh politics kan khelh chhan hi le?

Tuna Lunglei Dis­trict MLA zingah hian zahawm tak tak mai ni lo mimal tak pawha principle nei tura ka lo ralkhat ngaihte pawh an awm ve a, mihring pangngai thlirna aṭangin RTPCR an mamawh tih kan hriat pawh kha an Pute an hlauh vangin an au pui ngam lo.

Lunglei mipui (politician ṭawngkam ah phei chuan voter an ni) tan pawha an au ngam loh chuan MLA an nih kha a sawtna a awm lem lo, MLA LAD Fund chu tu pawhin an sem thiam. Lunglei tana au ngam ngeiin sem se a ṭha ang. He thilah hian MNF, Congress leh ZPM lam ka sawi ve lo; party atchilhna te hi ka dem a ni.

Champhai mipuiin a ruka an nin em em chu 'pêm thar hausa rual' an tih te, tun hnaia khawpuia sum­dawnna hmun ṭha zawng zawng lei zo tute, phaia a hmun ṭha lai lai kudam sakna atana lei zotu leh in sakna tur hmun ṭha lai apiang lei zotu mi hausa tharte hi an ni a. Heng mi zinga a tam zawk hi chu Champhaia mi awm hlun pawh an lo ni bîk der si lo.

Dan anga sum­dawn theih loh vanga tun hma aṭanga ABC leh Ajinomoto lakluh ang ni lova smuggling rim nama an chet hum hum hnu hian Champhai hian an nihna ṭhin rinawmna, tlawmngaihna leh huaisenna pawh an hloh zo ta. Champhai tlangval aia hausa Champhai tlangval thar an tam hnu hian a nei lo zawk mi huaisen pawh kha an ṭawng ngam ta mang lovin an sawi.

Hetiang karah hian Champhai hma­ngaih­tu bera insawi, Champhai MLA te kha khawnge in awm zawh tâk le? Champhai DC sawn hi chu a ve lekah ngai ta ila. Champhai hi Dan anga rorelna hmunah nge dah in tum pawisa nei apiangin an duh dan dana an khalh kal theih khawpuiah zawk?

District dangah DC leh Police thu a inrual ṭhap laia DC leh Police inkara District pawn lam mite inrawlhna awm nia sawi te hi Champhai MLA te hian in hmù lo der em ni le? Engpawhnise in duh lam emaw in duh loh lam pawh Champhai District MLA te hian in sawi ngam eih lo em ni?

Smuggler te in hläu nge in Party lam in dah pawimawh lutuk nge inthlan dâwn in ngaihtuah lawka ngawih in thlang ta?

Kan ram dinhmun en hian MLA te pawh in mipui thlavang an hauh ngam loh chuan kan hmabak hi thim thuah thum a ni mai lo maw?

- Lalremruata