Ti ve leh thawr ila...

1. Mi ram angin kan economy hi corporate, indus­try, business a innghat kan ni ve vak lo a. (producing state kan ni lo a, consuming state kan ni, ti zawng pawhin a sawi theih ang) Kan innghahna ber chu sorkar sum che vel hi a ni. 

2. Sorkar sum dinhmun kan hriatpui ve lo na a, thil pawimawh tak mai chu mipuiah sum leng vel a awm theih dan tur hi ngaihtuah a ngai. Mipui nawlpui, a rethei ber berte leh hmun kilkhawr bera chengte thleng phak tura sum leng vel a awm a ngai dawn a. Chuti a nih loh chuan rethei leh hausa kar a zau zual ang a, thingtlang chengkera chengte dinhmun a chhe zel ang tih a hlauhawm. 

3. Kan rama company hote, commercial bank-te hian Covid-19 laka invenna leh a dona leh a kaihhnawiha hman turin Mizoram sorkarah (CMRF) an thawh ve tur a ni. Hna lianpui pui - kawngpui siam/ buiding sak/ lei dawh hna te an rawn thawk a, makta­duai tam man an supply a ni. Mizoram sorkar vanga hausak te pawh an ni hlawm.  

Heng company te hian an thawh duh loh chuan tun hnuah sorkarin hre zui reng ta se. Commercial bank pawh hian pawisa an thawh duh loh chuan an hnena account neite hian sum la chhuak chur chur mai se la, CMRF a sum chhung lut ṭha MRB, Apex Bank leh SBI ah te han dah daih mai se la, kan harsat lai pawha min pui duh lote chu duhsak a ṭul lem bik lo ang. 

4. March thla tawp lam aṭang khan Covid-19 beh­bawma hman turin Chief Ministe’s Relief Fund (CMRF) ah miin pawisa an thawh ṭan a. Pawisa thawhtute leh an thawh zat hi sorkarin a puangzar reng a. (DIPR website-ah a la en vek theih). Mi inphal tak tak, thla khat hlawh pe te, pension hlawh pe te, khawlbawm aṭanga pe te an awm nawk mai. An inpekna a ropui hle. 

Chutihlaiin, thawh ve awm ngawih ngawiha ngaih vawiin thlenga la che ve duh lo an awm nual mai. Sorkar hmasa hun laia duhsakna dawng nasa, contract (hna) lian tak tak thawk te, a ṭhen chu vairam company te, chhiah pawh awl hial te; supplier lian pui pui cheng maktaduai tam man supply ṭhin te; zu zuar hausate bakah tun sorkar thara contract hna lian tak tak thawk chho mek te, sorkar duhsakna dawng mek supplier etc., hian Covid-19 dona leh a kaihhnawiha hman tur hi thawh ve chur chur teh se. Heng consultant/contractor, enterprise te hian an lo hlep tawh aṭang 10% tal hi rawn thawh ve ta se cheng vaibelchhe tel fe a tling ang. 

5. Sorkar hnathawkten an hlawh aṭangin sum an thawh dawn niin a lang. Sorkar laipui pawhin a hnuaia thawkte DA pung a hman sak dawn. Ngaihtuahna lo awm ta chu, kan MLA rual, hlawh thar hmang ta te hi an che ve dawn em? tih hi a ni. Sorkar hnathawkte an chet takah chuan anni pawh hian MLA hlawh thar te hi la lo ngam rih ta se, an hlawh thar Arrear-te hi CMRF ah hian han chhung lut ve ta se. 

A ṭul a nih chuan zin chhuah te hi insum rih se, an hlawh pun ruala an zinna senso DA pung chin tal te pawh hi la lo ta mai se... hun harsa kan tawh lai hi chuan an hamṭhatna dawn te pawh hi insum deuh ta se. Minister-te pawh hian lirthei pakhat (A nih em loh pawhin pahnih) aia tam lo kawl se. Heng bakah hian MLA fund (MLALADS) pawh hi tihtawp rih mai a ngai ta in a lang. 

6. Hun harsa kan tawk a, thup rual lohin sum harsatnain min tlakbuak mek a ni. Sorkar hian inrenchem dan tur mumal tak (austerity measures) rawn duang vat se. Eirukna leh hlemhletna lam tel miah loha kal tum tur a ni bawk. 

7. Sorkar laipui aṭanga sum hmuh tur a kiam duai dawn tih a chiang tawh. February thlaa Mizoram budget pharh tak pawh kha ennawn a ngai ngei dawn a. Sum harsatna ngaihtuah chungin (Budget deficit tlem thei ang ber turin) ruahman ṭhat a ngai ang. Entirnan, puipunna luai luai a remchang rih lawkin a rinawm lo bawk- Sports, tourism, etc., dah tawh sa ṭhenkhat te kha a dangah siamrem ni ta se. Health sector te, agriculture & allied sector te, MYC te, industrial sector, etc., hi vulh deuh a ngaiin a rinawm.