Damdawi khuahkhrihna dan ṭhenkhat

India ramah hian damdawi leh a kaihhnawih dan hmanga enkawl, bithliah leh khuahkhirhna hi tam tak a awm a, ruihhlo khuahkhirhna lam chu lo dah ṭha ta ila, mipui nawlpuiin kan hman ṭhin damdawi khuahkhirhna chungchang tawite i han tarlang teh ang.

Kan hriat angin damdawi (allopathy/ modern system of medicine) hi a hlu a, a siamchhuah a hautakin, mipui hman theih a chhawp chhuak tur hian hun rei tak a hman a ngai a, sum tam tak sen a ngai ṭhin a ni. Mithiamte thiamna leh tha leh zung sen ral zawng zawng leh hun hman ral zawng zawng nen chuan damdawi pakhat hlutzawng ringawt pawh hi a sum hlutna anga chhutin vaibelchhe chuang takmeuh meuh a ni awm e.

Mipui tana him leh ṭha thei ang bera duanchhuah a nih a, nunna chhantu leh natna laka kan him theihna atana ṭangkai ber pakhat ni si hi hman khawloh a nih erawh chuan nun tichhetu, ruihhlo ṭha lo tak a ni leh daih thung. Damdawi enkawl dan dik lo, a hmanna tura hman loh emaw a hman dan a dik tawk loh chuan damlo hma hun atana pawi, a natna tizualtu emaw thihna hial thlen theitu a ni bawk.

Damdawi hi thil holam tak leh hlu tak ni lo se damlo enkawl a, damdawi chawhtu medical doctor kan mamawh kher lo anga, a hman hmanin damdawi kan eiin mi kan chawh suau suau mai dawn a ni! Chutiangin damdawi siamchhuah leh a enkawlna, a hman dan dik kawngah pawh pharmacist kher kan mamawh lo ang, chutiang zel chuan hriselna lama thawktu dangte pawh. Damlo damna atana a laimu ber pakhat damdawi enkawl leh hman kawngah kan fimkhur a ngai em em a ni.

India ramah hian damdawi leh a kaihhnawih reng reng mihring leh ranah dik tak leh ṭha thei ang ber, him bawk sia siamchhuah a hman a nih theihna turin khuahkhirhna dan mumal tak, The Drugs & Cosmetics Act 1940 leh The Drugs & Cosmetics Rules 1945 a awm a, a ṭul dan azirin ennawn a siamṭhat (amend) ṭhin a ni. He dan hian a huam zauvin zir tham fe tak tak a awm a, mipui tlanglawminin kan hriat atana pawimawh tam tak zing ami, damdawi chi hrang hrang bithliahna chungchang kan tarlang dawn a ni.

Schedule H Drugs: Damlo enkawlna atana damdawi hman tam zawk hi Schedule H hnuaiah hian dah a ni a. Hemi hnuai a damdawite hi medical doctor chawh (prescribe) chauh a hman tur a ni a, damlovin a mamawh zat chiah, doctor lehkha a inziak ang zat chauh pekchhuah tur a ni bawk.

A tirah chuan damdawi chi 510 he schedule hnuaiah hian dah a ni a, tunah chuan damdawi chi hrang hran 536 a awm. Rulhuthlo aṭanga thak damdawi, luak danna, antibiotics chi hrang hrang, pum damdawi, steroids leh damdawi hman tlanglawn zawng zawng deuhthawh hi schedule H hnuaiah hian a awm.

Schedule H1: Schedule H drugs zingah hian hman fimkhur ngai zual bik damdawi a awm a, doctor leh mipuiin ṭul lo leh dik loa an hman khawloh avanga damlo tan leh nakin hunah damdawi hmanga damlo enkawlna kawngah nghawng duhawm lo a neih theih avangin damdawi ṭhenkhat chu schedule H1 hnuaiah dah a ni a. He schedule H1 hnuaia damdawite ṭangkai leh hlu em em vek a ni a, mahse hman khawloha ruihnana hman theih, tun leh nakin huna mihring nun tichhe vek thei damdawi leh natna hrik, bacteria avanga natna enkawlna a tunlai khawvel chawkbuaitu, damdawi ngam loh leh damdawiin a thah theih lo natna hrik resistant bacteria (anticbiotic resistance) a punlun zelna tur venna atan antibiotics sang ho telh a ni.

Schedule H1 hnuaiah hian damdawi chi 46 a awm a, ni 30, August, 2013 aṭang khan Government of India hi he bithliahna dan hi a hmang ṭan a ni. Hetiang damdawi reng reng hman chungchangah hian fimkhur a ngaih em avangin hman a nih reng rengin damlo hming leh awmna, damdawi chawhtu doctor hming leh thawhna, damdawi batch number leh expiry date, damdawi hman a nih nil eh thlate mumal taka chhinchhiah thlap thlap zel tur a ni. Schedule H1 damdawi zingah hian kan hriat lar zingah antibiotics kan hman nasat tak cefixime, cefpodoxime, meropenem, imipenem, levofloxacin, T.B. damdawite, alprazolam, zolpidem, diazepam, codeine te a tel a ni.

Schedule X: Schedule X hnuaiah hian damdawi hman mai mai loh leh ruihlo anga miin an hman nasat ho damdawi chi 16 dah a ni, khuahkirhna a nasa lehzualin doctor prescription lehkha pawh damlovin a hman hnuah kum hnih tal dahṭhat tur a ni a, fimkhur lehzual leh ṭul tawpkhawkah lo chuan hman loh tur a ni.

Tuna kan tarlan bakah hian doctor chawh kher pawh ngai lem loa damdawi leh chaw ṭha kan nei mai theih ho, heng paracetamol, antacids, hritlang damdawi thenkhat, ORS, multivitamins, multiminerals, antioxidants ho leh chaw ṭha dang dang te, damlo tana ṭangkai hospital leh hmun danga hman ngai chi ho chu Schedule K hnuaiah dah a ni a, damdawi leh chaw ṭha (food supplements) ṭhenkhat chu Over the Counter (OTC) drugs angin a sawi theih bawk.

Hetiang chanchin kan han tarlanna chhan chu damdawi fimkhur taka hman a pawimawhzia kan hriat thar lehzualna atan a ni a, a chunga kan sawi ang hian mumal takin khuahkhirhna leh bithliahna dan a awm a ni tih hria ila. Mihring taksa hi chau ṭhin, hliam tuar palh thei, natna hrikin a tihnat theih a ni miau si a, taksa tan damna dawi kan mamawh ṭhin. Damdawi hman a ngai a nih pawhin tawngpawng ngam lo ila, damdawi chawhtu doctor leh hman theiha siamchhuak leh chhawp chhuaktu pharmacist, damlo hnena petu nurse leh midang te, damdawi hmangtu damlo te, kan vai hian kan fimkhur tlan a ngai hle. Ṭul lova damdawi chawh leh mahni thu a lo inchawh leh lo hman ve ngawtte hi a pawi thui hle thei tih hre thar ila.

Pawimawh leh langsar tak chu mipui leh damlo tana tangkai em em damdawi hralhchhuaktu, damdawi dawr, pharmacy neitute hi an ni. Drugs & Cosmetics Act hian damdawi reng reng hi damlovin pharmacist kut aṭang ngeiin a dawng tur a ni tiin a tarlang bawk. Kan tarlan bakah hian thiamna leh zirna mumal pawh nei lo, tawnhriat vang emaw, rilru a lan tlat vang te, eng eng emaw rau dawn avanga midang damdawi lo chawh ve ringawtte hi sim a ṭha hle. Mahni zirna line (system of medicine) a tel va hauh lo chunga alollopathy damdawi (modern system of medicine) lo hman a damlo lo enkawl ve ngawtte pawh hi ṭha lo tak a ni.

Sawrkara dan kengkawhtu Food & Drugs Administration pawhin tan la zelin khauh zawkin dan kengkawh tharin kengkawh zel se, hriselna lama thawktu, thiamna inang lo mi chi hrang hrangte leh mipuite hian damdawi kan hman dan leh enkawl danah ṭan la thar zel ang u.

- Dr. C.Zothanmawia, Pharm.D. MBA Drug Information Centre, RIPANS