Pu Zira sawm kha...

Vanglaini chan­chinbu meuhin an rawn ziah Home Mi­nister Pu R Lal­zirliana MNF-in MLA candidate atan an sawm thu khan Mizo­ram politics din­hmun dik tak a rawn phawrh chhuak chiang hlein a lang. MNF manganna in a vawrtawp a thleng tawh tiin ngaihtuahna a awm thei a, Congress chhungkua a keh chhia tiin ngaihtuahna a awm thei bawk ang a; kha kha party dangin remchanga an hman thiam chuan an ṭhat pui theih a rinawm a ni.

Home Minister ni lai, Congress-a Vice President ve meuh si political party dangin an sawm ngam a nih chuan ‘green signal’ an hmu tihna a ni a, hei hian Home Minister hi a awmna party-ah a nghet lo ru hle a, a rinawm tluantling lo tih a lantir nghal phawt a.

A chhan chu Cong­­ress hian Pu Tawn­­luia leh Dr R Lalthangliana hi sawm enah an en dawn lo reng reng a, MNF-in Pu Zira an sawm ngam hi an sawm hlawhtling emaw hlawhtling lo emaw Congress Vice President hi a nghing tih a lantir chiang viau a ni.

Tin, MNF hian anmahniin inrin­tawkna an nei lo tih a rawn lang chhuak ve leh chiah bawk a, a chhan chu an party-ah candidate nih duh ṭhahnem tak mi ṭha an awm laiin mi party mi an va awt tlat hi party an talbuai tihna a ni. MNF ruh tak lo ni ta la, i party chu kum 10 chhung opposition-ah in lo bet reng tawh a, sorkar ve i inrin em em tawh laia mi party-ah pawh in hmelma Congress mi in la sawm du du chuan i party chu, "Eheu, kan pute hian kan party mi leh sate aiin Congress mi an lo ring zawk a nih hi a," tiin ngaihdan i nei lo thei lo.

Pu Zira'n Vanglaini zawhna a chhanna, "A sawm thuah chuan ZPM pawhin min sawm, BJP pawhin min sawn, kan insawm tawn vek a ni maiah ka ngai," a tih khan a dinhmun dik tak a tilangin ka hria. Congress hruaitu dang Pu Zodintluanga, Pu Liansailova etc hi MNF hian sawm enah an en lovang a, BJP phei chuan an sawm ngam dawn lova, Pu Zira hi party hrang hrang hian Congress-ah a bet tak tak lovah ngaiin an sawm niin a lang.

Mahni Vice President pawh bet lo taka dahtu Congress chhungkua hi a buai ru hle tih a lang chhuak a, 'MP inthlan dawnin Congress tan campaign turin Pu Zira a che chhuak duh miah lo,' tih titi pawh a dik a nih a rinawm ta tawlh tawlh mai.

Congress sorkar laia a tuihang hawp a, sum tamna depart­ment enkawltu hi a thurualpui dangte nen kum 2018 MLA inthlanah Congress ep zawngin an ding ṭhuau a nih chuan Congress leadership fak hlawh tak ṭhin kha a lo tlabal ta hle a nih hmel a, MNF lah an mangang a kaw tawpah ṭangin an party mi paihin an hmelma party mi an sawm duk duk a ni thei bawk.

- Lalhlupuia, Mission Vengthlang