NLUP Kutpui atan cheng nuai 80.90

Mizoram sorkar chuan kumin kumtir lam khan district hrang hrangah NLUP Kutpui a buatsaih a, he kut buatsaihna atan hian cheng nuai 80.90 a seng a ni. He kut buatsaihna atana sum sen zat hi eptu party MNF, ZPM, BJP leh PRISM-te hian tam an ti vak lo nge ni, an sawizui lo hle. Kan ram sum leh pai dinhmun thlirin, NLUP Kutpui buatsaihna atana heti zat sen hi ka lo ui hle.

NLUP lukhum leh pamphlet siamna cheng nuai 19 sen a ni. NLUP lukhum kha kut hawnni khan ka dawng ve a, a quality a ṭha lem lo hle. Khatiang ang lukhum kha vairamah chah dawn ta ila, a hlawm phei chuan Rs. 100 aia to loin a chah theih ngeiin ka ring. A to lamin han chhut ila Rs. 100 a chah thlen nita se, lukhum 5000 pawh siamtir se, cheng nuai 5 man a nimai.

Pamphlet kha chu hmun danga an sem ṭhin nena khaikhin pawhin a pangngai viau a, pakhat Rs. 10 hisapin siam angin han chhut ta ila, 20,000 pawh siam ni ta se, cheng nuai 2 man a ni tihna a ni. Tin, NLUP hlawhtlinna lam hawi pamphlet-ahte khan tarlan a ni hlawm a, kei ka lo ngaihdanah chuan NLUP hlawhtlinna chu a ziaka sem loin, a taka rawn lang chhuak chiah ka ngai.

Engzat chiahin nge pamphlet pakhat leh lukhum pakhat an order tih ka hre hauh lo a, mahse cheng nuai 19 zet pam­phlet leh lukhum siamna atana sen a ni hi chu a tam ka ti khawp mai. Hei hian a duhnaah chuan sorkar hian sum a nei tih a tilang chiang hlein ka hria.

Miscellanous expenditure huangah cheng nuai 11.08 hman ral a ni. Sorkar hi a inbuatsaih ṭha tawk lo em ni aw tih a awl khawp mai. Kutpui buatsaih turin department-te an inbuatsaih a, ruahmanna hrang hrang an siam a ni. Chutiang a nih laia cheng nuai 11.08 miscellanous huanga hman ral a la ni cheu hian ngaihtuahna a ti thui khawp mai.

NLUP thehlarna tura an tih nimaia ka ngaih NLUP lukhum leh pamphlet siamna cheng nuai 19 sen a nih laiin, advertisment bill atan chuan Rs. 63,000 chauh sen a nih leh lawi se, thil dangdai tak a ni. Sorkar hian NLUP hlawhtlinnate vawrhlar a tum viau niin a lang, a chhan chu lukhum leh pamphlet siamna atan cheng nuai 19 a seng ngam tlat.

Lukhum leh pamphlet-te hi kuta kalte bakin an dawn vak a rinawm loh. Chutihlaia chhungkaw tin deuhthawin an hmuh theihna tur chanchinbu leh cable TV lama advertisment tihna atana Rs. 63,000 chauh sen a ni leh si hi chu thil inhmeh lo tak a ni.

NLUP Kutpui kha NLUP hlawhtlinna phochhuahna atana tih a ni deuh berin a hriat a awm e. NLUP hlawhtlinzia kan sorkar hotute'n an sawi an sawi laia, NLUP hlawhtlinna pho chhuahna hmun sum tam tak senga buatsaih hi thil inhmehah kei chuan ka ngai thei lo. Thil hlawhtling tak tak chu sawi sawi ngai loin mipuiin kan hre mai.

NLUP hlawhtlinzia sorkar hotute'n an sawi fo a, mipui hriata a hlawhtlinzia hriattirna atana sum kan la seng ṭeuh ṭeuh a nih chuan a hlawhtling tawk loah a ngaih theih hial awm e. Sumdawngte chuan an thil siam chhuahte an fakin, a fakna atan sum tam tak an seng ṭhin. NLUP erawh sumdawnna a ni loa, a fakmawina atana sum hman ve vak chi a ni awm lo e.

Kutpuiah khan district hrang hrangah stall engzat nge hawn a nih chiah ka hre loa, stall 1000 pawh lo hawng ta se, kha kutpui kha kuthnathawk 1000 vel chiahin an thil siam chhuah leh thar chhuah an pho chhuah theihna kut a ni. Chuvangin, kha kut kha kuthnathawktu huap zo kut a ni lo tih a chiang hle.

Sorkar hian NLUP avanga hlawhtling tate'n an thil thar chhuah leh siam chhuahte mipui mit hmuhah pho chhuakin, hralh se an duh tak tak a nih chuan function-te siam bur bur kher loin, khawi lai field-ahte emaw stall siam sak mai se. Pamphlet leh lukhumte sem vak vak kher lo mah se, mipuiin kan pankhawm tho ang a, sorkar tan senso pawh a tlem zawk ngei ang.

- Malsawmdawngzela Hrahsel