Sira hnawl Senior

Kum tawpah MLA tur kan thlang chho dawn ta a, politics titi in a ngaihnawm vawrtawp a thleng ṭan ta a ni. Tun ang hunah hian rin dan sawi huai hun lai a ni, tlang titi aṭanga politician senior seat chang lo tur an awm nual mai a, titi kal lai chhunzawm pahin i han titi zui ve zel dawn ang hmiang.

Pu Hmingdailova Khiangte hi Cong­ress MLA term hnih ni tawh a ni a, amah pawhin din chhunzawm zel tumin ṭan a la la chhunzawm zel niin an sawi. Hetih lai hian a biala party dang candidate hlui an lawm lut si a, Congress hian hmel thar leh ṭhalai zawk dah tumna an nei a nih hmel a, Tuirial biala MLA nilai hi a chawl dawn a ang ta khawp mai.

Pu K Lalrinthanga hi tunah hian Serlui MLA a ni a, ani hi din leh ngei tum zinga mi niin an sawi a; amaherawh chu he bialah hian Congress hian MZP hruaitu hlui dah an tum tih hi titi a awm mek a ni. Champhai South lamah pawh Pu JH Rothuama hian chawlh a la tum bik lova, mah se Congress hian midang an dap kual nasa hle niin an sawi.

MNF lamah hian Pu Lalhmingliana Ex MP hi tunah hian bial nei lo thut thei angin an sawi. Pu Hminga hi 2013 MLA inthlan khan Aizawl North II-ah din tumin a bei nasa a, PC-in he seat hi an chan tak avangin ma chang ta lo.

Kum nga a vei a, kum 2018 inthlanah hming dang a ri leh a, he bialah hian AMC Councillor pahnihin Pu Hminga hi an chuh­pui a, MNF hruaitu liante hian pawn lam mite pawh Aizawl North II-a ding tur hian an dawr nasa hman niin an la sawi leh bawk a ni.

Pu Lalchamliana pawh hi MNF hian a duhsak loh zingah an dah a, a dinna bial an la zawn hmuh sak lo niin an sawi a. MNF Minister hming ṭha leh Spea­ker awm tawha ṭha ber zinga mi hi MNF hian a duhna bial an pe thei lova, Hrangturzo lamah Dr Thangtea’n rei tak a lo thlêk tawh a din ngam leh lohnaah dah an tum niin an sawi a, hei lo hi chu an sih hmuh vak lo a ni awm e.

Tin, Pu K Vanlal­auva hi MNF zing­ah “Chawl tawh rawh se,” ti an awm a, a bial vil ve deuhvah pawh midang midang an ti kual bawk a, Pi B Sangkhumi pawh hi an uksak duh vak loh zingah a tel.

Ṭangrual pawl hian an MLA neih chhun Pu Lalthan­liana hi a bial ngaia ding lo turin an ti niin an sawi leh zel bawk a ni.

- Robert Lalthansanga