ENGTIN NGE NI ZEL DAWN?

 Dt.8.5.2020 (Thursday) khan Vairengte Police check gate a Screening point ka zuk tlawh a, hnam dang driver leh handyman tam zia chu 'Phung velh' an sawi ang mai a ni e. Heti ringawt chuan kan sorkar duh dan ang ngei hian hnam dang driver kan chawk luhte aṭang hian kan hri do mek covid-19 hi kan la chaw lut tel ngei dawn niin a hriat a. Tunhnaia sorkarin online hmanga ni tin mamawh leh mamawh ni chiah lem lo lak luh dilna awlsam taka a phalrai tak vang nge ni heti tak mai a, hnam dang lo lut hi an pun leh tak viau ni ang le? Vairengte police check gate-a lirthei luh dan record aṭanga a lan danin tunkar chhung ringawt pawhin chawhrualin ni tin motor 100 vel a lut a, hetiang a nih chuan hnam dang driver leh handyman te hi a tlem berah mi 200 vel lut reng ang an ni a, kar khata ni 6 chhung pawhin mi 1200 vel lut ang niin hei hi temporary ILP kalpui lai ai pawhin hnam dang Mizoram a lo lut hi an tam ta zawk hial niin a hriat a ni. Hetiang a nih reng chuan kan hri do mek hian min la luhkhung ngei dawn niin a hriat a, nuih a za thei mawlh tawh lo a ni e. Tunah hian kan ṭhenawm state-a he hri veite leh Silchar-a hri vei pun dan enin sorkar hian hetiang lo deuh hi ruahmanna a siam a hun tawh tak zet a, hnam dang driver lo lut lova bungraw inbanleh emaw tihtlem emawa a kalpui a hun tawh tak zet a ni. 

Eng nge lo thleng dawn?

A nih leh tuna sorkar ruahman ang hian state pawn atangin ni tin mamawh (Essential commoditities) leh mamawh ni lem lo (Non Essential commoditities) hi lut reng ta se eng nge lo thleng ang? He zawhna hi chhan har lai ber leh rin thu bak sawi theih loh a ni a, mahse, thil chiang tak erawh kan zoram dinhmun enin hri leng mek covid-19 hian a ram chhûngah chuan mi 1 bak vei kan la awm lo a, hei vang hian he hri rawn luhna tur chiang tak chu ṭhen-

awm state leh ramri atangin a nih hmel a, chu ta luhna chance sang ber chu heng bungraw phurtu mizo leh hnam dang driver lo lut te 

aṭang hian a ni dawn a, ni tin motor 100 vel lut se, driver leh handyman nen mi 200 chuan he hri an vei leh vei loh hriat miah loh leh hri thehdarh thei lo lut hi a him chiah em le?

He ti lo deuhin a kalpui theih loh em ni?

 Thei teh reng mai, state khat sorkar ve lem chuan a duh phawt chuan ruahmanna mumal tak siamin a kalpui thei ngei ang. Interstate-a bungraw inbanlet hi a harsat thu sorkar hian a sawi a, hei pawh hi thil harsa lutuk a ni lem loh niin a lang a, hetia inbanlet lova motor a tlang parh parh hian kan nawmchen duhte mamawh engkim zu leh ruihhlo a lut ruih ruih reng thei a, banlet ni chiah se chu Essential commoditities phur luh kara Essential ni lem lo lo lut manchhuah tur ṭhahnem tak a awm ngei dawn tih hi a chiang a, hei hi duh lotu kan awm angah te pawh a ngaih theih awm e.

State sorkar hian duh tak tak se chu Vairengte godown ruak tam tak hi a hmang nghal thei a, venhimna leh ruahmanna tha tak hmangin bungraw phur inbanlet hi a kalpui thei a ni. A phur kualna man a san phah anga thil man a to phah dawn anga a ngai hi ngun taka ngaihtuah chuan a dik lem lo a, Vairengte dai thleng a rawn phur man hi an pe mai tur a ni a, Vairengte aṭanga a phur lehna man pawh a hrangin a pek leh mai theih bawk a, Bagha/Silchar aṭanga Vairengte thleng a phûrna man dik tak pek hian a to belh viau dawn lo a, tlem chuan a senso chu tam hret lo thei lo a, mahse, to phah viau chhan tur a awm lem lo tih kan hriat a ṭha awm e. Hetianga kan tih chuan hnam dang driver te Vairengte pelin an lo lut dawn miah lo a, ramriah khan hrang hranga uluk taka kan duty bawk chuan a ram chhung hi chu kan him dawn tihna a ni.

 Tihdam aiin inven a tha zawk

 Vanneihthlak takin Mizoramah he hri vei hi 1 chiah an awm rih niin a hriat a, chu pawh engkawl dam a ni tawh a, a lawmawm tak zet a ni. Hetihrual hian 1 lek kan neih pawh enkawl dam leh a harsatzia leh Sorkarin sum a sen nasat tawhzia chhut hian invenna hi sorkar hian a ngaipawimawh hle tur a ni dawn lawm ni? Tuna risk la chunga hnam dang driver chawk luh vak vak hi a him lo tih kan hriat theih nan tlem han tarlang ila. Hnam dang driver zingah he hri vei pakhat, la hriat chhuah si loh chu lo lutin screening pawh paltlang vekin bungrua a phur pawh a pekna task force ten uluk taka lo vilin, social distance pawh lo kalpui mah se, he driver haw lam hian khaw karkawnga awm ṭhinte inah thingpui leh chawte lo lamin ngaihzawng ang deuh Mizo te lo nei palh ta se, chiang takin heng an chawlhna leh an physical contact te hi chuan an kai dawn a, heng mite hian khawchhungah mamawh lama an kal hun a awm leh ngei dawn si a, khawchhung mi ah kaidarh lehin kan ramah hian mi 100 vel kan kai hunah chuan heng mite enkawlna senso hautak turzia leh a mipui nunna chan tur zat ngaihtuah hian sorkar hian invenna hi a ngaipawimawh hmasa tur a ni dawn lâwm ni?

 

Bungraw inbanlet emaw bungrua lut hi sorkarin a titawp thei rih lo a nih pawhin... 

Heng nitin mamawh leh mamawh lem lo phurtu mizo leh hnam dang driver te hi sorkar chuan an chet vel danah ruahmanna a siamsak tih chu kan hriat vek a rinawm a, mahse, tuna an ruahmanna hi ṭha tho mah se, a taka hmalakna a tam lovin driver kal leh haw lamte hi an duh dan danin an la awm tih theih a ni a. Hei vang hian heng lirthei lo lutte hi sorkar hian a hlawma luhtirin kan police te escort-na hnuaiah kalpuiin an haw lam thlengin escort zui se a ṭha awm e. Heng motor lo lut te hi an kalna tur azirin felfai tak escort dan tur pawh sorkar hian ruahmanna siam se, a haw leh turte pawh khawi hmunah emaw innghahkhawmtirin lo escort haw thlap se, he hri hi tun ai chuan kan ven hneh ngei a beiseiawm a ni. Hri laka kan himna hi sorkar hmalaknaah thui tak a innghat a. Hetihrualin mipuite pawhin sorkar thawhpuiin khaw hrang hrang task force te leh mipuite pawhin sorkar hi i thawhpui zel ang u. 

Hetihlai hian khawpui lama mi ṭhenkhatte'n ramri venga tlawmngaia duty te leh kan Police duty te rilru tihnual thei tur zawnga vaiho hi lut ru 

ṭhin leh venghim tawk lo anga social media-a rinthu kan sawi vak vak ṭhin erawh kan sim a hun tawh tak zet a, anniho hian theihtawpin, nang leh kei kan him theih nan zan pawh mu ṭha lovin ramri an veng tih kan hriat a ṭha a, engtin emawa lo lut ru palh an awm a nih pawhin indem viau hun a ni lem lo a ni. Tin, ramria tlawmngaia duty te hian VLTF te kaltlanga mi inphal leh sorkara sum an hmuhte hmangin an ei leh in turte an dawng ṭhin a, heng mite pawh hi sorkar hian tun aia ngaihven deuh thei se a duhawm tak zet. Tun dinhmunah chuan ramri lamah sorkar hi nasa zawka insawrbing a hun tawh tak zet a ni. Hetihrual hian, kan hri do mekah hian politics ṭha lo hmanga sorkar puh chhiat tumna leh inchirhtheh tawnna erawh awm lo se la, hemi kawngah hian theihtawp chhuahin hma la tlang ila, kan ṭanrual ṭhat chuan he rama hri lo lut tur hi kan veng hneh ngei ang. Engpawhnise, nang leh kei erawh fimkhurin a ṭul tawpah lo chuan pawn chhuak lo ila, kan chhuak a nih pawhin mask vuah ṭheuh ila. Hetihtualin kan intodelh theihna tura kan nitin hnathawh ṭhulh chuang si lovin thianghlimna leh kan hriselna i vawng zel teh ang u.