Hna hi a vâng takzet em?

Hmanni deuha PUC-in ziak mite biangbiakna an neih tuma Pu Vanneihtluanga thusawi kha ka rilruah a cham fo mai. Khami ṭum khan Pu Vanneihtluanga khan college zirlai za rual pungkhawm kha an en vang vang a, “In zir chhuah hunah, BA/ BSc in pass hunah enge in tih ang?’’ a tih kha. Kei tak ngial pawh hian sikul naupang uniform haa an tleh dul dul ka hmuh chang hian ka mang an ti ang ṭhin. Hengho hian lo zir chhuak ta teh reng pawh nise enge an thawh tih hi ka ngaihtuah fo a, an hma lam hun ka ngaihtuah hian a beidawn thlak ka ti ṭhin.

Sawrkar hna vanzia kan hria a, tuna zirlai zawng zawng leh zirchhuak tawhte hi sawrkar hian hna a pe vek seng lo tih hi chalkawlh pen anga chiang a ni a. Chutih rualin zirlai tam zawk hi sawrkar hna thawh tum, sawrkar hna lo chu hnaa chhiar lo kan ni tlat a, chulai tak chu a buaithlak lai chu a ni ta. Sawrkar hna chauh kan tin zawn avangin hna a vang kan ti a, hnathawh mumal nei lovin kan tangkhang ṭhuap mai a nih hi.

Kan ramah hian chhungkaw chawmna tham, innghahna tham hna thawh tur hi a vâng tak zet em? Hmanni lawkah Muslim te’n an kutpui Id-Ul Zuha an hmang a, High Field-ah ringawt pawh a sing tel deuh thaw an pungkhawm a, an bungbu var suau suau a nih kha. Khang muslim zozai te kha kan rama tih tur nei loa rawn awm mai mai an ni lo a, hna thawh lai nei, chumi hmanga nupui fanau chawmte an ni vek mai. An zavai deuh thaw khan kan rama in saa inhlawh an ni deuh vek ang.

Thla thar det ban hma leh Lal Isua lo kal hma hi chuan in sa tawk hi engtik lai pawhin an awm reng dawn a, Mizo ṭhalaiten in sak hna thawh kan tum loh a, cement mistiri hna hi kan sit tlat si chuan heng Karimganj vai ho hian kan ramah hna thawh tur an hmu reng dawn tihna a ni. Chuti a nih chuan hna van hrim hrim vanga thawh tur hre lo ni lovin kan duh ang hna thawh tur a awm loh vanga hna hmu lo hi kan lo ni lek mai ang a?

Lehkha thiam tan leh thiam lem lo tan pawh Mistiri hna hrim hrim - thing mistiri a ni emaw, lung mistiri an ni emaw, cement mistiri hna pawh nise hna ṭha tak a ni. Hmanni deuh khan lung rem tur chhe te ka nei ve a, Lung mistiri ka’n zawng chu an lo vang phian mai. Ka hmuh chhun chuan hna thawh lai a lo nei a, a hna tawhna pa hnenah chuan ni hnih khal lek pawhpen ka dil ṭawk ṭawk mai. BA/ MA hna hmu lo kan in pelh suau suau lai hian lung mistiri chuan thawh sen loh hna a hmu asin.

Nikhata a rate chu Rs 750 a ni a, chhun ei tur kan la tum sak bawk a. Chuti a nih chuan thla khatah cheng sing hnih dawn a hlawh thei tihna a ni a, chu chu chhungkaw chawmna tham a ni. MA val, private sikul-a thawkte ai chuan thing mistiri te, lung mistiri te hian a letin an hlawh ṭha zawk tihna a nih chu. Mistiri hna te hi kan ngainep deuh tlat a, thiam enah kan en lo a, vai ho thawh tawkah kan dah deuh tlat mai hi a pawi a ni.

Sawrkar hna a vâng a, sawrkar hna hi kan hmu vek dawn lo tih kan chian rau rau si chuan thawh tur awm ang ang thawk thei tura rilru kan siam mai hi a hun khawp mai. Thawh hreh nei miah loa thawh tur awm ang ang a dapa a han dap takah chuan thawh tur hi chu a la awm zelin ka ring tlat. Puan tah te hi a hlawk a, a hlawk tih hre reng mah i la kan nula te hian Burma nula thawh tawkah an dah tlat zel.

Puan taha thla khata cheng sing tel lakluh ai chuan show room leh mobile phone dawr changkang nghah a, thla khata cheng sang li nga lek hlawh kha an duh zawk tlat a, chu chu changkang zawk tlatin an hria a ni.

Kan laina hnai nu pakhat chu dawr hrang hrangah polythene bag pe kualin a inhlawh ṭhin a, nikhatah cheng zanga te a hlawh ṭhin. Chutiang hna te chu kan nula tam tak hian kan thawk duh kher lo ang, lehkhathiam thawh atan chuan kan sit bakah mi dawra han vah kual vel kha an zak a ni mahna.

Hna awm apiang hi thawh hnial lo ila, hna hnuaihnung leh thawh duh loh hi nei lo i la, thawh tur chu a la awm zel mai lo’ng maw? ‘Vawkpui pawh a vah a vah chuan ek ṭhing a tawng nge nge’ tih a nih kha. Zawn zawn a, dap dap a, a awm apiang thawh hreh neih lem loh chuan hna hi chu a la awmin ka ring tlat. Kan ṭhalai te’n thawh ena kan en loh avanga hnam dang in saa kan chhawrte kuta kan ram sum luang ral zozai te hi uiawm tham a ni.

Sawrkar hna chauh kan beisei a nih chuan engmah thawk chhuak lo leh top-up man tak ngial pawh thawk chhuak lo hian Hualngo dar kek zuar ang maiin ni tla vanvuaiin kan thu tum vuau reng mai ang.

- K Lalrinchhana