Malsawm tlak nun

Hlawhtlinna te, chawimawina te, hmingthanna leh ropuinate hi duh duha neih theih a ni lo a, theihtawp chhuah hnua neih theih chauh a ni a, thawhrimna tel lo chuan heng ang nun te hi a neih theih loh.

Nunin a zir loh chuan hlawhtlinna tlangchhipa ding thei tur mi hi mi hlawhchhamah an chhuak fo a, chawi­mawina tam tak dawng thei tur mi hian hmingchhiatna tam tak a hlawh chhuah phah fo bawk a, mi hmingthang tak ni tur leh mi ropui tak ni tur hi tuma hriat hlawh loin an awm fo. Tuna kan nun kan hman danah hian nakina kan la nih tur a innghat tlat a ni.

Hlawhtlin duh chuan hlawhtlinna dawng tlaka a thawh­rim a ngai.

Malsawmna dawn kan duh vek a, dawng tur pawn theihtawp kan chhuah fo. Malsawmna erawh kan beih hah ang leh, kan thawhrim ang huin kan dawng lo fo. Thawkrim a, taima na na na chu tlachhamin a awm chuang lo ang.

Phal taka midang ṭanpui nana kan sum leh pai te, kan thil neih ang ang te kan theh chhuah a, Pathian leh kohhran tana kan sum te kan hlan a, kan pe chung pawn kan ṭawngṭaina chhanin a awm lo fo a, khaw-tlang tana thahnem kan ngaihnate pawn rah duhawm a chhuah lo fo.

Kan nun dan leh kan awmdan lam ngaihtuah hauh lova kan thil ṭha tih te leh kan ṭhahnem ngaihnate avangin Pathian malsawmna dawng turah kan inngai mai ṭhin.

Kan thil ṭha tih avang te, ṭhahnem kan ngaihna avangtea Pathian malsawmna hi dawng ngawt tur kan ni lova, malsawmna dawng tlaka kan nun leh hun kan hman chauhin 'Pathian mal­sawmna' hi kan dawng dawn a lo ni.

Ram hruaituten Pathian malsawmna dawng tlaka ram an kaihhruai a ngai a, an nun an uluk a ngai bawk. Ram hruaituten malsawmna dawng tlaka ram an kaihruai a nih ngat chuan ramin hma a sawn lo thei lo ang.

Malsawmna dawng tlakin kan nun hi hmang ila kan chhungkuain hma a sawn ang a, khaw­tlangin hma a sawn ang a, ramin hma a sawn bawk ang. Malsawmna dawng tlaka kan nun loh avang te, kan hun kan hman loh fo avangte hian a lawm kan nunah malsawmna kan dawng loh fo. Kan eizawnnaah, kan zirnaah, kan thil tihna hrang hrangah hlawhtlinna kan chan loh fo a, dinhmun pangngaia kan din theih loh phah fo.

Malsawmna dawn duh chuan mal­sawm tlakin a nun a hman a ngai a, mi hlawhtling ni duh chuan hlawhtlinna chang tlaka a beih a ngai bawk. Lei lam thilah pawh midangte hmangaihna dawng duh chuan mite hmangaih tlaka a nun a hman a ngai bawk.

- Nawlchunga Chinjah Meisatla, Siaha