This is Cambodia

Eirukna leh hlemhletna hluar lutuk avanga nun­phung (way of life)-a an neih tawh tawpna, smuggling hluarna ram, khawvela drug route lian ber pawl, hetiang avanga hausaten sorkar an control tlatna, sipai 5 star general nihna pawh suma an leina (sorkarah donation an pe), mi hausa leh rethei inkar zau lutukna Cambodia ram­ah kum 7 zet zawt ka awm a. Civil war-in a lo sawp hrep tawh vang a ni pakhat bawk a, an ram inrel­­bawlna a chiri viau mai.

Buaina zawng zawng chinfel nana sum leklamna rama han awm a, mi rethei dinchhuah ngaihna hre si loin ruk ruk leh tualthah an hreh tawh miah lohna rama awm chu a rapthlak a khawp mai, inveng renga awm a ngai. Rorelna dik lo (injustice) engemaw lo awm ta se, an hmuh ngun tawh avang leh khawiah mah justice an hmu dawn lo tih an inhriat avanga rilru na taka "This is Cambodia" an tih chuai raih maina hmuna awm chu a nuam falua lo mai.

Hetiang ka hmuh vangte hi a ni ang kan ram hian hetiang hun a thlen ve ka hlau a, ka ṭan ulh tak em em ni. Kan ram chu hetiangin a la chhe hauh lo, mah se tun anga kan kal zel chuan heng hun hi kan thleng vat lo ang tih a sawi theih ta miah lo.

Mihring moral tlusawp ramah chuan an motodop (two wheeler taxi) driver te dream ber pawh, 'pawisa tam tak neiha hmei neih' a ni tawp mai. Mi hausa paho tih dan an hmuh tlat vang a ni. Kan Pastor Sairengpuia bike bo pawh police-in ni thum hnu velah an hmuh thu leh police station-ah US dollar 250 a tlan chhuah a ngaih thu an rawn hrilh a nih chu maw le!

Misualho leh police-ho inthurualin an lo insem a nih hmel a. Chutiang thu kan thawhpuite hnena ka sawi chuan, "A bike bo in hmu leh a in vannei alawm. This is Cambodia" an lo ti hmak mai.

Kan bul lawkah nitla vanvuaia US dollar 3 hlawha rim taka mi hnuaia inhlawh an awm laia ka student pakhat nitina ka tutor ṭhinte chhungin, ka haw dawnah min thlah nan restaurant-ah chaw min eipui a, zan khatah US dollar 1800 an han seng tehreng a nih kha. Chutiang rama mi rethei dinhmun rapthlakzia leh mi hausa an rilru a thlamuan chuan si loh dante thlenga ka hmuh khan ka awt lo khawp mai.

Hetiang ram ang democracy ni si Prime Minister Hun Sen-a, (khawvela Prime Minister ni rei ber a ni tawh maithei) thu chu thutawp ang tluk ni bawk si ram ang hi an awhawm miah lo. Mizoram hi chutiang kan nih ve loh nan mahni zawn zawnah ṭang zel ang u.

Ni 30 Visa neiin Phnom Penh airport-ah kan ṭum a, dan ang thlapa immigration kan paltlang hnuah chuta lo duty a seal chhutu chuan, "I Visa hi kum khat atan extend i duh chuan ka ti thei nghal a nia" tih paha lehkhathema a phone number min pe ru zauh a, min nuih suk kha ka la hre reng. Dan anga dil ngai loin khapa kha US dollar 250 pe ila kum khat visa min lo chhut sak thei mai dawn a lo ni. Chung zawng zawngte chu a dik lo tih hre reng mah se, a ram mipuite chuan 'This is Cambodia' tih bak an sawi thei tawh lo.

A hunlaiin an lo che miau lo, tunah chuan "Ani pawh a dik bik lo, ani pawn a ti ve tho" tiin an in kawh rawn tawh a, an tlai zo tawh a ni.

- Zaii Khiangte