ZPM hi ka ring lem lo

Pu Lalduhoma hian inthlan dawn apiangin min bum ziah a, sorkarna siam thei tur ang maiin boruak a nei lian a, vote an chhiar zawh meuh chuan amah ngei pawh a tlin zawh loh chang hi a tam zawk a niin a lang. Tunah hian Zoram People’s Movemnet (ZPM) tiin invuah mah se tun hmaa Pu Duhoma ang tho kha a la nih chuan rin a harsa ka ti.

Pu Duhoma hual veltute hi kan hriat chian vek an ni. Mi langsar tak tak an awm. MLA hluite, central service officer chawl tawhte, pastor te, editor langsar te, mi hausa leh hmingṭha tak takte an awm khawm a ni. Tun hmaa ZNP leh pawl dang thawk ho ngawt ai chuan an rintlak hmel a, mahse Pu Duhoma ho hian inthlan vote chhiar hian beisei an phak lo leh khut ṭhin a ni.

Mizo mipuite hian Pu Duhoma hi kan duh lo em em pawh a ni lo, kan ring lo zawk niin ka hria. A chhan chu tling tur angin a khawsa hma thei lutuk a, a tling dawn emaw tih tur khawpin a kal vuk vuk a, inthlan dawnah chuan a hawi vah tawh mai a, mahse a tling lo mai pawh ni lovin a awn lam party hrim hrim hian tlin hi an hnaih ngai lo.

Tin, amah bawmtute pawh hi han bihchiang ila mi thar chu tlem te an ni. Hmna Pu Duhoma ṭhiante tho. Tun hmaa a thawhpui ṭhin te, a lo hlawhtlinpui zawh lohte kha an ni. Inthlan dawna thawm nei, inthlan zawha reh hmak, inthlan a hnaih leh dawna rawn langsar leh thut ṭhinte ang kha an nih avangin rin an hara a ni.

Ram an veizia chu tlang hriat a ni. Thil hrang hranga mi hlawhtling leh zahawm tak tak an ni tih pawh kan hria a, mahse mi ṭha ber anga inchhal hian midang ring zo lovin politician ni sate ṭha lo taka ngaiin an rawn inlar a, hetiang hi chu mipuiin an ring zo tak tak bik lo a ni tih chu a lang tawh a ni.

Mi ropui tak takte pawh hi politics-ah chuan an lo talbuaiin an lo che sual tawh ṭhin a ni. Tuna ZPM lama mi ropui leh mi ṭha, mizo hnam pumpui pawhin kan naihsante hi ZPM an nih tak chiah hian an hlutna an hloh nghal a, hei hi politician nih man an pek chu a ni. Khawi party-ah pawh lut se chu tho chu an chan tur a ni. Mizorama buaithlak tak awm chu party-a an luh rualin mi ṭha tak pawh hi kan rinna a tlahniam a, kan party lo lama an luh phei chuan an luh rualin misualah kan chhuah nghal mai a, hei hi tuna ZPM ho chan hi a ni. Tun hmaa ngaisangtute kha Congress leh MNF-te an lo ni a, tunah chuan an ngaisang tawh lo mai ni lovin an sawi chhe tawh. Hei hi politics chu a ni mai a ni.

MNF sorkar hnuhnung ber kha kan thlir kir teh u le. An MLA leh Minister-te kha mimalin han chut teh u, Kohhran Upa leh Kohhran Upa ni lo kha an inzat thuak ang. Mi fel hlang deuhthaw an ni hetia en chuan. Eirukah kha sorkar kha a fihlim em? teuh lo mai. Mizorama sorkar ding tawhah chuan a hmingchhe ber pawl a ni. Mawng sawh dawpin an tla. An Chief Minister ni lai Pu Zoramthanga kha bial pahnihah a dinga a tla ve ve, chumi hnuah 2013-ah pawh a la tla leh ta a ni. Hemi awmzia chu khawtlang leh kohhrana mifel leh mi langsarte hi politics-ah chuan eng vak an ni lova, ram rorelna zawnah chuan mi ropui an ni bik lo tih MNF khan an lantir daih tawh a ni. ZPM hian tunah hian mi ṭha, sakhaw mi leh mi fel an nei nual mai a, heng mite hi politician ṭhankin tawhte ai hian ram rorel kawngah an ṭha kher lo ang.

Tunah hian kan inthlang ṭep tawh a, vote hmuh tam a pawimawh ber. Vote hmu tam turin mi leh sa ngah a ngai. Pu Duhoma leh ZPM hian mi leh sa an ngah lo. Inthlan hnuhnung bera ZNP leh MPC vote hmuh zat kha chhiarkawp dana belh dik thlap theih chu ni se MLA pali panga chu an hmu ve mial thei a, mahse sorkarna chu hla tak a ni, hla tak.

ZPM hi insawi lianin an boruak hi sang tak angin lang mah se, kei chuan ka ring lem lo. Sorkarna siam tur hi chuan party lian sa pahnih bak hi rin tur an awm tak tak lo.

- Vanlalngaia, Champhai