A puak darh a va tihzia

MNF Nomination Committee thu­chhuak a 'leak' kha thil mak ber zinga mi a ni a, kha khan MNF inrelbawlna ṭhat lohzia a ti lang chiang.

Mipui mimirin Congress Vice Pre­sident chung­changa ngaihdan an lo neih lawk tawh chu a rawn puak keh ve ta rup a ni.

Congress Bhawan lamin an Vice Presi­dent hi an ringhlel ru reng tawh a, a rinawmna hi party ah ni lovin pawisa neiah a ni tih hi an rin dan neih sâ a ni. Party Vice President ni ve meuh si, party rawn lova contract a pek dante leh party mi leh sâ aia party mi ni miah lovin a pawt kawi thei lutuk mai hi tlawmah an la ṭhin.

"Kan party mi leh kan party thurualpui dangte pawhin an thawk ve duh thova, nangni hi in invulh tlut tlut mai a, kan pu mah ni la tute hnathawhah emaw hi chuan a tuihang i hawp ve kan ring tlat," tia Zawhte ṭhi awrh tirtu an awm si lo a, MLA inthlan dawnah a puak ta dur a ni.

Politics-ah chuan keh chhiat leh keh darh hi a ṭha lo em em a, kan duh loh ber kan hnawh chhuah pawh hian vote a chhuah pui a, amah leh a chhungte leh a kid te an chhuah chuan politics thil pawimawh ber 'vote' a bo ṭhen a ni. Hei hi Congress President Pu Lal Thanhawla tluka hrethiam an awm lo. Amah beitute pawh a la lut leh vek thei a, tlem aiin tam hrim hrim a duh a, Chakma leh Tuikuk pawh vote an neih chuan a tlawn huam huam hreh lo a ni.

Pu Zira hi Lok Sabha MP inthlan zawh hlim khan Congress hruaitu lawk ṭhenkhat chuan party aṭanga paih an duh tawh a, thuthang pawh a awm a, "Phuahchawp mai mai a ni," tiin an han sawi mam a, phuahchawp mai mai a nih lohzia a takin a lang chhuak ta a, MNF-in candidate atana an sawm ngam tur khawpin a party ah a lo rinawm lo ru reng tawh a ni.

Term hnih zet Minister ni chunga Party a rinawm lo ru tlat leh chu chu hmelma MNF hmuh theiha tilang zuk zuk duh a ni hi a inhmeh lo a, MNF in an party candidate tur leh bial viltu hnawla Congress sorkara mi an han awt tlat mai pawh hi an tisual palh a nih chuan Hnam Runa mi rinawmten ha chang an ṭhial bap bap dâwn a ni.

Congress hian tum leh duh an neih chhun chu 'tlin' a ni a, MLA 21 nei tling tura rinawm ber an ni. An tlin lehna tur a nih chuan District tih puitlin tih mai mai hi chu an kalpui rawp rawp duh thovin a rinawm a. MNF hian hmelma party mi leh sâ candidate atana sàwm hi Sap ṭawnga 'suicide' an tih ang hi a ni thei tih an hriat a ṭha ang.

- Lalrinawma, Chanmari West