STATE PAWN AṬANGA KAN CHHUNGTE LO HAW TUR HI

Ram chhung hmun hla zawka tangkhang, sawrkarin a hruai haw tur zingah kan tu leh fate an awm ve em?  Sawrkar thu chhuah angin mahnia pindan leh toilet hran nei thei tan Home Quarantine dil theih a ni a, VLTF 

aṭanga remtihpuina neite chu home quarantine pek theih an ni dawn. 

Odisha state chhung Ganjam District khaw­pui pakhat Berham­pur-a Missio­nary thu ziak leh, Silchar mission compound-a missionary pakhat thu ziak aṭang hian lo ngaihtuah zui ila. VLTF te tan Home quarantine hi remtih chi a ni dawn em tih i lo zir dawn teh ang. 

Odisha state chhung Ganjam district hi April thla tawp thleng khan Covid-19 chung­changah Green Zone a ni. May thla tir aṭang­in state pawn lama hna­thawk leh zirlaite an haw khawm ta a. Zin hawngten hre lova hripui an hawn chu a pung ta phut mai a. April thla tawp thlenga green zone district ni si khan May ni 8-ah chuan cv-19 positive mi 47 an nei  tawh. May ni 9 chhun laia chanchin thar chuan an district-a Covid 19 kai chu mi 83-ah a pung chho tawh tih a puang a ni. 

Silchar mi hri kai thar 2 pawh Ajmer aṭanga sawrkarin mi tangkhang a hruai haw zinga mi an ni. Ajmer aṭang hian bus-in mi 46 phurh haw an ni a, an zinga 10 chu an lo positive si a, Assam state pawhin positive a neih belh phah ta nual a ni. Bus-a chuang zinga Silchar mite hi quarantine lohvin an in lama hawtir an ni a, an tifuh lo hle. DC pawh an thlak phah hial nia sawi a ni. 

Mizoramah pawh tunhnaiah ṭhenawm state aṭangin ni ṭha­hnem tak hruai haw an ni a, quarantine vek an ni hi a lawmawm hle. An zingah hripui vei an awm loh chuan a lawmawm lehzual ang. Tunah hian ram chhung hmun hla zawka tangkhangte hruai haw leh turin sawrkarin hma a la leh dawn nia hriat a ni a, a lawmawm hle. Hetih rual hian lo haw leh turte chungchangah hian fimkhur a ṭul hle mai. Inven lawk theih dan tur zawng zawng hmangin, lutuk awm lova fimkhur chunga ruahmanna siam a ngai niin a lang. 

Hruai haw tur zinga home quarantine dil tur chuan dil lâwk a ngai a ni awm e. An dilna hi LLTF/ VLTF ten an in chhung awm dan uluk taka endika remtihpuina an pek hnuah chauh sawrkarin phalna a pe dawn niin a lang. 

LLTF/ VLTF mawh­phurhna a sang hle. Ram leh khawtlang himna ngaihtuahin fimkhur takin thutlukna siam se a duhawm hle.