Inthlanpui kan hmachhawn tur hi

Ber thla kan chuang­kai a ni leh ta der mai. MLA thlan kum a lo ni leh ta. Hetih rualin party dang dang pawh an phawklekin tuallai ti ti-ah pawh inthlan lam lo chu sawi tur a awm ta meuh lo a ni ber e.

Hetiang dinhmuna kan din mek lai hian mi ṭhenkhat chuan mahni khaw chhuak ngei candidate ni sela ti an awm a, a ṭhenin chumi party candidate lo chu vote loh tur ti ang rengin an sawi bawk. Ṭhenkhatin zu khap bur ngam tur lo chu vote loh ni se te an ti a, kan khaw tana hmasawnna min thlen tur ngei lo chu thlan loh tur ti pawl an awm bawk.

Eng ang MLA nge kan thlan ang tih hi kan bial ṭheuh mipui kaih harh nan sawi ngai riauin a lang.

Kan party hruai­tuten MLA tura an candidate ṭheuhte hi chu mi fel tawk tak chu an ni vek ang tih chu tlang hriat a ni. An fel dan erawh a inang vek kher awm love. Ṭhenkhat chu an hotute tih lawm tum taka khawsa, ṭawngna lama an Chief Minister hming lam ri tel reng

ṭhin chi an awm thei a, hetiang mite hi chuan an bial mipui aiin an hotu ber tih lawm an tum tlangpui a, an bial aiin an hotu ber rawng bawl an hmasak zawk zel ang. A ṭhen chuan Pu Jagjivan Rama dan takah mahni pumpui tihpuar hmasak phawt a, chumi hnua a bial mipuite hrai puar chauh tum chi an awm leh ang. Hetiang mite pawh hi mi hlauhawm tak an ni ngei ang.

A ṭhen leh chuan lal ṭhutthlenga an ṭhut tawh chuan a mipuite hre chang tawh hauh lo, biak pawh huphurhawm khawpa mi inchhut ngen khum chi an awm leh a. Hetiang mite pawh hian mipui aiin anmahni an indah hmasa tlat a, chuvangin thlan ngam chi zia zang an ni lo.

Hetiang a nih lai hian mi tlemte zawk chuan an bialte hma­ngaih tak taka hma­ngaih, an chhiat an ṭhat pawha pawh taka awmpui a, mirethei bakberh ber pawhina an pawh ngam leh an chibai ngam an awm leh a. Mirethei ber pawhin an harsatna an sawi pawh ngun taka ngaithla a, an harsatna share pui a, tih sak ngei tum tlat mi an awm leh a. Heng mite hi chuan an mipuite hmangaihna dikin an hmangaih a, an bial tan thawh tak tak an tum tlat a ni. Hetiang mite hi thlan tlin ngei a ṭha.

Ṭhenkhat chu har­satna leh mangan­na han thlen pawha an party mite hlau hmasa tlat, party ngaihdan la hmasa a, unit pre­sidenti recommend-na ngiat tlat ching te pawh an awm. Heng mite hi chu mipui rawngbawltu ni lovin party rawngbawltu an ni. Hetiang mite sorkarna siam chu ‘mipui sorkar’ ni lovin, ‘party sorkar’ a ni zawk ṭhin. Harsatna leh manganna han thlen a, mi lo lainat tak tak, a siamtu party pawh vengthawng hman lova hma la nghal mai chi an awm leh bawk.

Heng mite erawh hi chu mipui aia ding, ‘mipui sorkar’ dintute niin, democracy lung­phum dik taka vuantute an ni. Hetiang ang mite ngei hi tun kan inthlan turah pawh thur chhuak thiam ila, kan ram chu ava nuam dawn tak em!

Kan rilru a kan pai reng tur chu ‘mipui sorkar’ nge din kan tuma ‘Party sorkar’ tih a nih tak chu. Kan sawi eng aṭang khian rilru siam ila, tichuan kan duh chu kan thlang thei ang.

- Patrick Z, Chhingchhip