Deciding factor tur tunge?

Tun ṭum inthlanpui hian danglamna tak a nei a, ṭum danga kan tawn ngai loh, politics huang pawn lam, Kristianna leh Hindutva chungchang­in kan ngaihtuahna a la nasa a. BJP hian hma­sawnna min thlen theih ngei kan ring a, mahse engtiang takin nge kan Kristianna a nghawng dawn tih lai hian kan ngaihtuahna a tibuai a ni ber.

Kohhran hruaitute pawh an ṭawng chhuak ta zauh zauh bawk. Inthlanah BJP hi ‘key player’ an ni fo a, Mizoramah hian sawrkarna siam thei khawp MLA an neih rinawm chiah lo a, party lian pahnih an inbeih tawk dawn em avangin MLA tlem te tal neih a, CADC anga sawrkar siam theitu ‘deciding factor’ nih an tum leh ngei ang.

BJP hian an ideology ‘Hindutva’ chawilar an tumna leh Kristianity an ngaih theih lohna hi an zep buai peih lo tial tial dawn tih chiang taka sawi theih a ni lo. Hetiang kara kan ram, kan hnam, kan Kristianna chhana ding nghet tlat ngam tur political party hi kan rilru-in a dap a ni.

Pahnih INC leh MNF hian, ‘politics-ah ṭhian leh hmelma a awm thei lo?’ tih thufing an vuan tlat a, kan Kristianna tinghing thei thil lo ‘counter’ tur hian an ‘principle’ a chak tawk lo a ni. Engtikawng maha politics a BJP inzar zawm pui lo tura kan ngaih Congress (I) lah Mizoram bikah chuan CADC sawrkar siam dan aṭangin an party rilru puthmang kan hre tawh a. Kan ram, kan hnam, kan sakhaw himna atana belh tlak party lian kan tih zingah hian an awm ta tlat lo a, ZPM hian mipui beiseina an ti hlawhtling thei ang em?

Hetiang thil sensi­tive lutuka kan hnam leh sakhua a awm kum tak maia ZPM lo dingchhuak hi Pathian remruat a nih ngei a rinawm. Inthlan kum danga political party thar, ṭangrual lo dingte nen an boruak leh kalphung, hmalakdan pawh a danglam hle tih kan hmu thei a, an ti mai mai lo tih pawh kan hmu a, beiseina kan nei sang a ni.

BJP hian MLA an neih tam theih a rinawm lo a, ZPM tan pawh MLA 21 neih chu har tak tur a ni. Sawrkar siam turin MNF nge Conress? tih lam aia pawimawh a awm a, chu chu sawrkar in-

ṭawm siam ngai ta se, a ‘deciding factor’ ah BJP nge kan duh ZPM tih hi a ni. Kei leh ka chhungte hi chuan CADC anga legislator tlemte nei chunga BJP in veivir ang kha kan Kristian state-ah hian a thlen kan remti thei lo.

Thingtlang lam hi, Congress candidate hrim hrim vote tawp mai chi, neutral viau tawha ngaih pawh ‘MN ka sawi thei lo’ tih hla han ngaihthlak tir a, MNF ruh tak ni leh mai chi kan la tam a. ZPM hi rawn in candi­date pawh nise, uksak lem lo kan tam dawn. Aizawl leh District khawpui mipuite tal khan kan ram tana mi ṭha leh party ṭha tur chu kan hun tawn mek te thlirin, lo vote tling hram ula a ṭha ang.

- John Hmingthana Tlau