Kuhva tawlh rukah eng vangin nge MKHC an ngawih reng?

Mizoram kan vanneihna chu Kohhran pawl chak tak Mizoram Kohhran Hruaitu Committee (MKHC) kan neih hi a ni. He pawl hi thil lian tham engkimah an inrawlh ṭhin a, an ngaihdan hi sorkar pawhin a zah a ni.

MKHC hi chu an inrawlh lohna tura ngaih thleng pawhin an inrawlh tawh chuan sorkar chuan a hlau hle ṭhin a, amaherawhchu Mizoram pumin kan khel luai luai dan lova sumdawn­na smuggling lian tak Myanmar aṭanga kuhva rah dan lova a ruka tawlh luh chung changah hian MKHC hian thu a chhuah miah lo. A ral thlir mai mai a, MKHC hian thawhlawm nghawng thei thilah hian thu a nei ngam lo em ni? tih hi Whatsapp lamah chuan an khel ta luai luai mai.

Kohhran hian 'huang lo a dai' tih turin a lo kal tawh ṭhin a, a chang leh zirna pang­ngai a buaipui a, a chang­in HIV te a buaipui a. Media lam te a buaipui ve leh daih a, zaipawl intihsiak te an buatsaih a, a chang leh politics ngialnganah inrawlh anga sawi turin MPF kal tlangin thil a ti ṭhin a, mah se kohhran ṭawngkam dik tak mai chu "Kohhranin huang lo a nei lo" tih hi a ni. Kohhran mipuite ṭhatna turah chuan kohhran hi a inrawlh ṭhin a ni.

Tun hnaia MKHC inrawlh­na miin an sawisel chu Covid-19 do naah khan a ni a, sorkar lamin a sawm avangin an tel ve a, MKHC chuan kan la tawn ngai reng reng loh, anmahni pawhin a ngaihna an hriat bik loh hripui leng chungchanga invenna lam rorelnaah ring an rawlh ve ta a, a relna apiangah koh tel an ni ta zel a. Social media lama inziak ang phei chuan kohhran hruaituten Chief Minister hmuin engtik lai emaw ni phei kha chuan Lockdown puang turin an va ngen tih kha a awm a. Medical team lamin lockdown an rawt duh tawh loh pawh khan kohhran hruaitu lam rawt angin lockdown te kha an puang niawm tak a ni, finfiahna erawh ziaka hmuh tur a awm lem lova, social media a nih vangin a dik vek kher lo thei a ni.

Thil dangah pawh rem leh rem lova inrawlh ṭhin Kohhran hi eng vangin nge kuhva rah a ruka tawlh luhna smuggling lian takah hian a ngawih reng ni? MKHC hian hlauh a nei a nih loh chuan hetiang taka thil dik lo, ram dan bawhchhiatna lian tak, tangka sum ngainatna avanga dan bawhchhiatna hi a en liam dawn em ni?

Central YMA takngial pawh au chhuak tawhin YMA member chu kuhva tawlh rukah inrawlh lo turin an ngen a ni. MKHC hian kohhran member (eng kohhran pawh) hi, "Kuhvaa a ruka sumdawnna hi India dan pui kalh tlat a ni a, dan bawhchhiaa sum tuaknaah hian kohhran member te inrawlh loh tur a ni a, inrawlh in lo awm pawhin tel ve tawh lo turin kan hriattir a che u," tiin thu an chhuah ngam lo em ni?

I Timothea 6:10 ah chiang takin, "Tangka sum ngainat hi sual tinrêng bul a ni si a; chu chu ṭhenkhatten an awt a, rinna chu an kal bosan a," tiin a ziak. Champhai District leh hmun danga cheng Myanmar kal tlanga kuhvaa a ruka sumdawnnaa tel te hian dan bawhchhia an ni tih an in hria a, mahse ruihhlo a nih loh avangin sualah an pawm phal lo- dan an bawhchhiat loh vang ni lovin sum an ngainat vang a ni.

Sual tinreng bul chu Bible hian a ziak chiang em em a, nimahsela MKHC chuan thil danga thawm chhuah reng siin he sumdawnna dik lo hi a dem zawngin emaw, inzirtirna nei zawng pawhin eng thu mah a chhuah lo. MKHC hian hlauh a nei em ni? Engvangin nge tun ang ṭha leh sual indona, dik leh dik lo indona, dan zawm leh dan bawhchhiat inhnialna awmah hian ngawih an chuh tlat?

MKHC hian an la ngaih­tuah hman lo a nih pawhin an ngawih hlen chu thil thiang a ni lo. 'Dik leh dik lo inhnialna' awm mekah hian MKHC hian kohhran mipuite hi khawi nge dika khawi nge dik lo a zirtir ngam dawn em? Heti khawpa moral tichhe thei thil hi Social Front dina zirtirna kal pui tlut tlut ṭhin Synod hian a do ngam em le? Synod hian huaisen takin Presbyterian Kohhran member chu dan lova sumdawnnaah an in hnamhnawih tur a ni lo, tih hi an chhuah ngam em?

Bible hian inngaihna suala tlu a huat ang thova 'sual tinreng bul' a tih chu tangka sum ngainatna hi a ni. Hei hi kan Kohhran hian a en liam a nih chuan, Social Front programme in an ngam chin siam ṭhat tumin hma la buai duh tawh suh se, sual tinreng bul zawk pawh an do ngam loh chuan.

MKHC hian kan ram tlukchhiatna ni mek, dan lova sumdawnna smuggling lian tak kal mek hi tuna an beih ngam loh chuan kum 10 a ral chuan kan tlai tawh ang. He sumdawnna khawihtute hi kil tinah hruaitu ni tawhin pawisa ngah takin an awm ang a, chutah chuan moral reform tih te, corruption do tihte kha rawn sawi buai duh tawh suh u, a tlai tawh ang. Kan Evangelist rual te, kan Kohhran Upa rual leh pastor rual zingah huaisen taka a diklohna ziaka dah ngam te hi kan nei lo em ni le?

Zu chu do ngam, zu do chu Pathian lam ṭang nihna ang hiala inngai, inngaihna suala tlute hmu hniam em em siin Bible ziak ngei sual tinreng bul hi kan do ngam dawn em? MKHC lam hian an lo chhiar ve ngei ka beisei tak zet zet a ni.

- Mahmuna, Bethlehem Vengthlang