Zoramin zalenna a sual leh dawn
Pu Laldenga (Fam) kaihhruaina hnuaiah India ram rorelna a ta tal hranga zalenna nei turin thi leh thau pawlhin Zofate’n silai pu meuhin zalenna kan lo sual tawh a. Independent state ni lovin India ram bungkhat/ state ni turin kan insual chhuak thei hram a.
Politics hmanga mawlna, atna leh retheihna te umbo ve tumin nasa takin hma kan la ve a. Mahse vawiin ni thlenga kan politician te’n mittui tla deuh pur chunga an party tana an au hla ropui neih ropui ber nia la lang cheu chu, “Zofate’n lei rem kan rah ve theih nan,” ti chunga an party fakna leh an manifesto ṭawngṭai hnan hi a la ni cheu reng mai. Supply leh contract lian tham thawk theite an len thur thur laiin miretheite chu an bet tlawk tlawk mai ni lovin, rangva bandel hnih khat leka an vote leisak theih tawkah ngaiin an dah hniam ru hle lawi bawk a.
Eiru thei an hausa thur thur a, kan Chief Minister lo ni tawhte pawh an eiru ngei nia hriain anmahni hekna te pawh a ri rum rum a. Eiru te leh eiru lian man leh hremna tuar ta te chu kutzungṭang thliaka chhiar tham pheuh pheuh chauh an ni lawi si. Party hrang hrangte chuan an khingpui party te thil tih dik loh leh eiru ngeia an hriat thu hahipin mipui bengah min hrilh ru lung lung chungin dan anga an chungah rorelna lekkawh a nih theih nan corruption case file erawh an nei ngai der thung lova. Opposition an nih laia thlan lal an nih huna an rorel leh ram hruai an tum dan sawi ri huau huautu te’n lalna an chan tuk la la in midang kihhnawh then tur a lo tamzia thu min tlangau khum mai ni lovin, kum nga kum sawm zet ro an rel hnu-ah pawh mi kihhnawk an thenfai hman loh thu sawiin mipui tana hnathawk tak tak turin term dangah khawngaihna vote an dil leh hluam hluam a.
Kum 5/10 chhunga mi bel zen phai hnu tikhat leh thiam lo te hian hmasawnna thar min hlui tur an hre lo tih kan hmu chiang telh telh thung a nih hi. A tak taka thawk hah peihte thlantla hruk hul sak a, an thawhrim rah leisak chur chur tum lam aiin vote zawn nan a thlawna thil sem min tlangau khum hluah hluah a. Chu chuan nasa takin Zofate hi thatchhiatna khurah min hnuk pil riai riai ta a ni. Mizoram leh zofate hian retheihna, mawlna, zalenlohna ata zalenna kailawn min zawhpuitu tur mi huaisen leh a ngaihna hria kan va mamawh tawh tehlul em.
Mi tlemte pawh han awm khawm ila, corruption in Zoramah leh Zofate thinlungah zung a kaih ngheh tawhzia kan sawi duar duar a. Party tinte chu mipui sum tichingpentu-ah in puhtawn hrep mahse an inngaidam thiam leh viau ṭhin lawi si. Tuinnge Zawhte chu ṭhi behtir dawn ta ang le?
Zoram hian suahsualna, retheihna, hlemhletna leh ram hmangaih loh na lak ata min chhanchhuak turin Zalenna a sual leh a ngai ta. Zoram hian zalenna hi a sual leh dawn a. Chumi tihlawhtling ngam hi ṭhalai lehkhathiam, a ngaihna hria leh huaisen tam tak an awm ta fur mai. Kumin kum tawpa Assembly Election (MLA inthlan) ah hian zalenna thar sual chhuak turin bengsikin in ngaihtuah tlang tawh ila.
Kum nga chhung phun bul bul hnu-ah pawh kum nga dang phun leh mai hi kan hmabakah kan lo ngaih ṭhin hi he inthlanna hian chu kan ngaihdan ni reng tur leh kan dinhmun leh chanvo chatuan ni tur emaw kan lo tih ṭhin hi a rawn thlak danglam vek thei tih hi hre chiang thar leh i la.
Zofate’n kan mit hmuh ngeiah hmasawnna tak tak kan chan ve theih nan kumin MLA inthlannaah hi chuan ram hmanagaihna tak tak nen mi dik, a ngaihna hria leh thawk ngam tura huaisen thlang chhuak turin ‘zalenna sualna awlsam ber’ pakhat, he inthlanah hian ram neitu leh a hmangaihtu kan nihna hi a takin i kalpui ve tawh teh ang u.
- PC-a Lalnghinglova, Chhingchhip Camp: Delhi