Reiek tlang bawlhhlawh thian fai

Reiek lal te zingah Lalluaia Sailo hun aṭang tawh khan faina leh thianghlimna kawng­ah nasa taka ṭan la ṭhin khua kan ni a. Lal fing leh ropui tak chuan a khaw rem danah modern town planning-te hre ve lem lo mah se, kangmei laka him theih nan thler mumal tak a siam a, in leh in inkarah hmun awl zau tawk tak a neihtir zel bawk. Khaw taima leh intodelh kan nih theih nan taima taka hnathawk turin a khua leh tuite a zirtir a, amah ngeiin a bawhzui bawk ṭhin.

Ṭhalai in-a awmte chu an feh loh chhante a zawt a, an dam ṭha a nih chuan tlai tawh mah se feh turin a tir liam zel mai ṭhin a ni. A lalram chhung intlawhpawhna kawng fai leh nuam a ngai pawimawh a, a sakawr chunga chuang chunga a hawl phak chin chu a tihfai tir vek bawk ṭhin.

Thing leh mau, nung­chate humhalhna kawngah hma a la nasa a. Reiek khaw chung/ tlang lamah phei chuan vaibel-dawn tiat lek thing sah pawh a phal ngai lo. Heng ngaw ṭhate hi tuihna leh boruak ṭha min petu an nih avangin thing leh mau, nungchate nasa taka humhalhna hmunpuiah a siam a ni.

Faina ngaipawi­mawh khua niin kar khatah vawi khat tal mahni in leh a vel then­faina hun hmang ṭhin khua niin, inchhung bungbel pawh fai taka enkawl ṭhin khua kan ni. Khaw fai inelna a awm hma pawha khaw fai tak ni ṭhin khua kan ni. Tunlai khawvel changkanna, hmasawnna leh awl­samna hian bawlh­hlawh a ken tel tam tak em avangin tunhma anga kan faina kha kan phak ta lo tih hriain nasa taka ṭan lak thar mek zel a ni.

Kum 1995 hnu lama motor kawng ṭhain a pawh hnu hian Reiek khua hian tlawhtu a lo ngah ta ve hle mai a. Nitin-a tlawhtu zat hi chawhrualin mi 20 dawn lai ang vel a lo nih tak avangin bawlhhlawh tladarh pawh a lo tam ta a.

Tunhma-a Reiek tlang leh a chhehvela bawlhhlawh awm ngai lohna chu bawlhhlawh senghawi loh tamna hmun a lo ni ta. Reiek khaw mipuite hian keimahni bawlhhlawh chu inching fel thei mah ila, mikhual sulhnu erawh khawtlang huapa thenfai ngai kan lo neih tak avang leh nitin bawlhhlawh ṭawiral thei lo a lo pun tak zel avangin faina kawnga rilru thar kan put theihna a nih beiseiin ni 15 September, 2018 khan bawlhhlawh thenfai hnatlang runpui neih a lo ni ta hial a.

Reiek khawchhuak leh sorkar department ṭhenkhat mai bakah environment humhalh leh ven him kawnga mi ṭhahnemngai engemaw zat-in hna­tlang hi an rawn pui bawk a. Reiek khaw lu aṭanga Reiek tlang inkar-ah bawlhhlawh ṭawihral thei lo chi, cement bag aia lian bag 50 chuang daih chhar khawm a ni.

Mizote pawh kawng hrang hrangah hma kan sawn nasa a. Bawlhhlawh chung­changah pawh nasa taka hmasawn tum zel tur leh Reiek leh Reiek tlang leh a chhehvel faina ngai pawimawh ṭheuh turin mi zawng zawng kan sawmin kan ngen a ni.

Reiek hmuna prog­ramme nei tur reng reng chuan Bawlh­hlawh senghawi dan tur ruahmanna fel tak rawn nei lawk zel turin kan in ngen bawk a ni.

- C. Lalchhuanmawia