Golden Jubilee leh I&PR

Aizawl Centenary 1990 leh Gospel Centenary 1994 kan hman aṭang khan Mizoramah hian Rising/ Raising Day, Jubilee leh Centenary lawm kan in tih hmuh ta hle in a lang. Veng, khua, pawlho, zirna in leh kohhran thlengin kan uar ta viau a ni. Tangkaina tak pawh a nei a. Heng ni puala thisen pek emaw midangte tana luanchhuahna hun emaw kan hman ṭhin hi a langsar zualte chu a ni.

Eng champhaphak pawh hi lawm a nih dawn chuan a pawimawh hmasa ber chu pianni emaw din ṭan ni emaw felfai tak neih hmasak hi a ni. Chumi khami mual neih kum, vaimim thar lai, buhseng lai tih ang mai mai a innghah chi a ni lo. Jubilee/ Centenary lawm kan uar viau lai hian sorkar department ang zawnga hmang erawh hriat tur an tam vak lo. Pisapui hian kum 100na leh a hnuah kum 125na 2015 khan thawm na vak lovin an hmang tawh a. Hmanni lawkah Mizoram Police te chuan an Raising day leh Golden Jubilee an hmang ve a nih kha.

Mizoram UT a nih rual rual khan IGP hmasa ber IJ Verma, IPS chuan IGP leh Joint Secretary (Home) hna January 21, 1972 ah a zawm a ni. Chuvangin, he ni hi Mizoram Police bul ṭan nia ngaih a ni a, Mizorama Police Station awm ṭanna erawh chu kum 130 a chuang daih tawh.

Jubilee/ Centenary huaihawt dawn hian kum upat kan duh luat vang ni maw a hla thei ang ber kan chhui ṭhin niin a ngaih theih. Hemi ti chiang tur hian entirna pathum i han tarlang teh ang.

Mizote zinga thlang tla hmasa Sailo Lal, Rolura’n Chhipphir khua a luah ṭan chhut letin he khua hian 1997 khan an khaw kum 200 na an lawm daih tawh. A lawmna hmanpuitu CM Pu Lalthanhawla pawhin kum 200 tling khua lawmnaa a tel vawihnihna leh pakhat phei chu Mizoram pawn a nih thu a sawi nghe nghe.

Aizawl Theological College hian 2007 khan centenary an hmang tawh a. A Aw B kan neih aṭanga kum 14 na emaw hnu maiah college pangngai chu sawi loh theological college meuh a ding hman awzawng lo tih chu hriat sa a ni a. 1907 a Zosaphluia’n Pathian thu zirna mawlte Theological School hminga a hawn chu an din ṭan kumah an hmang mai zawk a ni a. Serampore University-in college putlinga a pawm chu 1965 a ni.

Mission Veng Biakinpui aṭangin January 27, 1952 (Pathianni) khan Kulikawn Kohhran a indang a. 2002 khan Golden Jubilee an hmang a, 2012 ah Diamond Jubilee an hmang leh bawk. An han chhui chian hnuah chuan inkhawm loh zan apiang hian Kulikawn pa ṭhenkhatte chu HK Dohnuna (HK Bawichhuaka pa) inah Pathian thu hmangin an inpawlho ṭhin a. Biakinpui atan thawhlawmte pawh an khawn ve ṭhin a ni.

An inpawlhona hmasa ber chu May 7,1915 (Zir­tawpni) zan a ni a. Hei hi Kulikawn Kohhran din ṭan ni-ah an pawm leh ta zawk a ni. Tichuan, 2015 khan Centenary an hmang ta a, mak ve angreng takin Diamond Jubilee aṭanga kum 3 naah kum 100 na an lawm tihna a ni.

January 21,1972 a Mizo district chu Union Territory a hlan kai a nih rual rual khan i-he lovin district office zawng zawngte chu directorate emaw departmentah emaw an chhoh dual nghal hi a rinawm loh. Hmuh theih chinah Mizoram UT a puanna dan tlawh chhan Government of Union Territories Act, 1963 para ṭhenkhatah Mizoram chungchang sawi lan a ni a. Sorkar inrelbawl dan tur chipchiar taka tarlanna a awm lo. Northeastern Reorganisation Act, 1971 ah pawh District office te, Directorate status-ah chhoh tir nghalna tarlan a awm lo bawk. UT puanna lehkha pawimawhte, department hrang hrang din chhoh dan sorkar notification te chu a awm ngei a rinawm. Heng lehkha pawimawhte hi Mizoram archive-ah pawh hmuh tur a awm lova, GAD hian an la kawl ṭha mial mahna.

Commissioner S Das leh Chief Secretary hmasa ber RM Agrawal te chuan January 21 aṭangin office an luah nghal chat a. Hun inthlakthleng inlumleh lai a ni a, Secretariat pawh phuahchawp ang reng takin a kal ve a ni. He mite kaihhruaina hnuaiah hian Legislative Assembly din dan tur te, sorkar inrelbawlna tur pawimawh zual hmasate chu chak taka bawhzui a ni.

MLA inthlan hmasa ber April 18 ah neih a ni a. Seat 30 ah Mizo Union chuan seat 21 la in hneh taka thlan tling an ni. April 24, 1972 ah Lt. Governor hmasa ber SP Mukherjee a lo chhuak a, Commissioner hi a rawn thlak a ni. Bawrhsap Bangla pawh Raj Niwas tih a ni nghal. Department pawimawh zual hmasate chu a tahtawlin Directorate-ah puan chhunzawm niin a lang a, Director tur pawh lak zui zel an ni a. District Information and Public Relations Office pawh Directorate of Information, Public Relations and Tourism tia thlakin Special Officer ni mek Pu RL Thanzawna chuan May 1, 1972 ah office a luah chhunzawm a ni.

He mi ni hi DIPR&T pian nia ngaih tur a ni ang. Ch Chhunga ministry May 3, 1972 (Nilaini) ah Theatre Hall a lakluh chu DIPR&T anga official coverage neih hmasak berna a ni nghe nghe.

DIPR&T hian bul a ṭan phat aṭangin Government Press, Art and Culture leh Protocol hna zawng zawng a kut ken nghal vek a. 1980 a Printing and Stationery hming chawia indang ta te, 1987 a Tourism indang leh 1989 a Education Depart­ment aṭanga indang, Art and Culture leh Protocol Department te pawh hian an in chhut let tak tak chuan an chhulchhuahna DIPRT pian kum hi an ṭawm tur ni mai awmin a ngaih theih bawk.

He department pian leh murna tak tak zawk chu Assam Public Service Commission kaltlanga District Information and Publicity Officer atana lak Pu SR Vala hna zawm ni April 1, 1960 a ni. 1963 ah Information and Publicity tih chu Information and Public Relations a thlak a nih dan te, Sub Divisional officer/ District Officer a Pu Denghnuna bul ṭan chhoh dan te, 1968 a Deputy Director Shillong-a a chhuk leh hnua Special Officer tura Pu RL Thanzawna 1970 a a lo chhoh dan leh chumi hnu zela he department ṭhan chhoh dan zawng zawng hi a chipchiara tarlan vek seng a ni rih lo.

Rambuai pik laia an ṭangkaizia te, a tel lo chuan sorkar a kal thei lo ang an tih ṭhin dan te bakah I&PR hmanlai leh tunlai khaikhinna te chu hun dang remchanga sawi atan khek rih ila.

Department dang Agri­culture chu UT puan a nih rual hian khatih lai Development Commi­ssioner Gurunga khan a hmui lailawk a. November 25, 1972 a Director hmasa ber NC Bhatacharjee awm aṭangin AH& Vety, Forest, Soil & Water Conservation, Fishery, Horticulture te khaikhawm vekin Direc­torate putlingin a kal (function) zui ta a ni.

Education Department pawh hi an Director hmasa ber Dr GN Chatterjee, July/ August vel 1972 aṭanga a awm hnuah Directorate ang tak tak chuan inrelbawl chho chauh an ni.

Mahni birthday hre chiang Mizoram Legislative Assembly chuan session ni hmasa ber champha May 10 ah Golden Jubilee an lawm dawn a, MJA pawhin an pianni March 23 hian lawm turin mei hial an det tan tawh a. Kum kalta lam daih aṭang khan an lo intintuah tawh reng a ni.

I&PR pawhin February thla, a ni pawh la chiang lo ah hian Golden Jubilee lawm tumin an in puahchah mek a ni. Hemi pual Souvenir an buatsaih turah thuziak ve tura sawmna zahawm tak ka dawn rualin he ngaihdan tlang tak hi a piang ta zawk a. Chuvangin, heti zawng hian thuziak a ṭul ta a ni.

- Zothankunga