Duhamna versus Dikna

Tuna Champhai lam issue hian Mizo zingah hian Duhamna leh Dikna indona lian tak a rawn tar chhuak a, he indonaah hian a taka tel an awm a, rilru leh thinlunga (in spirit) tel kan awm bawk. Kan ramah hian dikna tak tak hi kan duh nge duh lo tih bukin a awm a, khawi lam zawk nge i nih ve dawn le unau?

Dikna chuan "ni chu ni, ni lo chu ni lo," a ti mai. Bible thua, "I lum leh lum la, i vawh leh vawt rawh," a tih kha tuna kan ram hian hriat chian a mamawh hle a ni. A chhan chu dan dik lova a ruka Assam Rifles leh Custom duty tlan chhiat sana kuhva sumdawnna hi chu kan Bible hian dik a ti ngai lovang.

Chu chu tunah chuan khaw en laiin camera hmaah ngei a diklohna an hriat loh thu an au pui ta a, tuna kuhva sumdawnnaa tel zingah hian Pathian rawngbawltu pawh an awm tlat a ni.

Kohhrana nihna sang tak tak chelh, YMA hialah pawh nihna nei leh a ṭhen chu sorkar sikul zirtirtu ni chunga kuhva sumdawnna luh chilh an awm an ti a, dikna an ṭan dawn chuan an tawp san ngei a ngai.

Duhawm leh eiru tur hian officer leh politician nih kher a ngai lova, duham avanga ram dan leh Pathian duh loh thila inhnamhnawih tur hian ramria dan lova sumdawnnaa tel loh ngam a ngai tihna a nih chu.

Kuhva sumdawn­na a ruka ti reng chung sia rawng­bawl­tu nih te, khaw­tlang hruaitu nihte hi a zahthlak a, jail tan theihna sual an khawih reng tih an in hriat a ṭha khawp mai. Dikna leh duhamna a indo chho zel a ni. Hei tak hi kan hre chiang duh lova, a theih ve tho tiin dan kan kuai kul a, kan ram hian a la tuar dawn a ni.

Ram danin a phal loh ram pawn aṭanga kan lalut dawn a nih rau rau chuan kan ram kawngpui rap chhe ve lo, a ken pawh awlsam zawk rangkachak te, state danga hralh leh tur a nih chuan silaite pawh chu smuggle lut law law ta ila.

Tuna kan smuggle luh kuhva hi chuan kan kawngpui an rap chhia a, Mamit leh Kolasib District lama kuhvaa eizawng, hah taka kuthna­thawktute ei bel a tibaw tel bawk si a ni. Tunah hian Duhamna versus Dikna a indo a mek a ni Mizoramah hian.

- Zothanmawia