Kang ṭhelh motor ṭha bik nuai 46 chuang man pathum lei thar kha!

Phuhchhuak na bik: Hei le, tun hnaiah Fire Department hman tur Kangṭhelh motor ṭha bik 'High Pressure Pump Fire Tender' chu nikum khan pathum lai lei thar a ni. Hei hi kum 2021 September thlaa Assembly Se­ssion zawhna Pu Lal­chamliana, Minister, i/c Home Dept., DM&R Dept. etc. chhanna a ni.

Pakhat hi Rs. 46,50,000/- man ṭheuh a ni a, pathum neih thar a ni e.

Thu belh: Kumin Republic Day February ni 26-ah khan chhun pachangah Hunthar Veng Aizawlah kangmei a chhuak a. Pi Rosiami in Assam Type chu a kang ral a nih kha!

Fire & Emergency Services Director (Director office, F&ES Hqrs. hi Hunthar Venga awm a ni) Pu C. Lalthanmawia chuan thuchhuah siam vatin, mipui laka hmaiphih leh thiamthu sawina lam, 'social media' lam thuthang chu dik lo zawk anga rawn cho nghal deuh phânin thu a chhuah a nih kha.

Hunthara Fire hmun pui ber Head­quarters chu, "Stanby in Fire Tender park nana hman a ni chauh zawk a ni," tiin F&ES Director hian a ziak.

Mipui hian Fire hmunpui bera Fire Tender ding ṭhep ṭhup leh Fireman an awm nual tih kan hriat bakah, a hmunpui ber lakah hian beiseina kan nei sâng a ni. Hei vang tak hian Director thu leh hla hi kan pawm lo deuh ṭhum mai niin a lang.

Heti zawng hian: Mipuiin kan beisei ang a lo nih tak lovah chuan, 'social media' lama thu leh hlate do nghala insawifiah nghal ngawt lo khan; F&E S Director lakah khan beiseina kan nei sang hle a ni, tih hriat a ṭha awm e.

Hunthar, an hmun­pui ber pawh ṭha zawka 'function' tir an tum tawh tur thute kan beisei, hei mai bakah hmasawnna kan hmuh chhoh zel tur thute kan beisei a ni ber mai. Chulam ni hauh lova fiah si lova insawifiah tum hi chu a tam zozai ta mah mah a ni e.

A minute rawn tarlante leh video thlalatute thlalak hun leh a taka hretute a inkalh nasa mai bawk si. Thiam thu ni lovin, insiamṭhatna atana 'chona thar' thu hi kan Fire lama min thlamuantute aṭang hian kan beisei tawh e, hmasawnna tura hmalakna turte kan hre chak.

Hunthar pawh Fire Station anga kalpui a har lovang. Chu chu kan duh.

- Zoa Tlau