Eiruk thubuai tih kha

The Frontier Despatch - Mizo Investigative Weekly chuan July 30, 2018 khan thu thin ṭhawng tak mai a chhuah a, he chanchinbu hi Mizorama chanchinbu (weelky) ṭha bera tun hnai mimal taka ka ngaih a ni a, a copy a la darh zau tawk loh avangin sawi zui a hlawh vak lo a nih pawhin a thu rawn chhuah Pu Zoramthanga leh midang pathum chungchanga Special Judge-in thu buai a siam hi Mizo mipuite hian eng thil nge a nih kan hriat chian a ngai a, kan Chief Minister hlui hi an puh chhe mai mai a ni nge ni lo? An puhna hi a lo dik reng zawk em? tih hi kan hriat a ṭha khawp mai.

Chanchinbu thuziak chu hetiang hi a ni a:

"The Frontier Despatch tarlan dan chuan Eiruk Dona Dan, Prevention of Corruption Act (PC Act) chungchanga roreltu, Court of Special Judge, Mizoramin kar kalta Nilaini (July 25) khan Chief Minister hlui Zoramthanga leh midang pathum lakah eiruk thubuai a siam a, thubuai hi ngaihtuah chhunzawm a ni ang a, thiam loh chantir an nih chuan kum sarih thleng lung in tan tir theih an ni ang.

Zoramthanga bakah hian Lalhuapzauva, Law Minister hlui H Rammawi leh Mizoram Venus Bamboo Private Limited Managing Director ṭhin, Krishna Kumar Shah, KK Shah ti-a hriat bawk lakah mipui sum cheng nuai 218.5 tihchingpen thubuai siam a ni.

Kumin June thla tir lama TFD-in a lo tarlan tawh angin, 2009-a Anti-Corruption Bureau-in thubuai a ziahluh tawh si-ah hian May thla tawp thleng khan Zoramthanga leh midang lakah hian charge frame a la ni lo leh court hniam zawk rorel dan a chiri lutuk avangin Gauhati High Court, Aizawl Bench chu Court of Special Judge chungah hian a lungawi lo hle a.

Court of Special Judge leh lehlam lehlam ukil te chu he thubuai an hmanhmawh pui loh lutuk avanga zilhhau in, HC chuan thubuai hi a dik emaw, a dik lo emaw thu ah engmah sawi tur a neih loh laiin court hniam zawk chu dan ang leh fimkhur takin thubuai hi ngaihtuah chhunzawm turin thu a pe a. HC thupek bawhzui hian Court of Special Judge hian thubuai hi a ngaihtuah chhunzawm leh ta a, Zoramthanga leh midang pali lakah hian charge a frame ta reng bawk a ni.

Zoramthanga hi sum tihchingpenna chi hrang hrang pali-ah puhmawh a ni a. Pakhatnaah chuan, Venus Bamboo Private Limited Managing Director ni ṭhin KK Shah hnenah Lalhuapzauva nen mipui sum cheng nuai 50 pe-a puhmawh an nihnaah thubuai siamsak an ni a.

Pahnihnaah chuan, Zoram­thanga, Lalhuapzauva leh H Rammawi te chu mipui sum cheng nuai 83, Champhai Grape Growers' Society hnenah pe-a puhmawh an nihna leh, cheng nuai 83 tho, Hnahlan Grape Growers' Society hnenah pe-a puhmawh an nihnaah thubuai siamsak an ni bawk a.

Tin, anni pathum tho hi Mizoram Organic Producer Company hnenah cheng nuai 2.5 pe-a puhmawh an nihnaah thubuai siamsak an ni bawk.

Heng zawng zawngah hian an pali in a huhova dan bawhchhiatna thubuai awrhtir an nih bakah, dik lo taka sorkar sum hmang leh mahni leh midang hlawkna siamsak thubuai awrhtir an ni.

Zoramthanga chuan amah puhmawhnaah te hian tihsual a nei lo tiin court hnenah a thehlut a, hei vang hian thubuai hi ngaihtuah a ni ang," tiin a inziak.

Hei hi kan Chief Minister hlui chungchanga thil kal mek a ni a, Congress sorkar hian kan MNF President hi tihhming­chhiat tumin hman deuha mi thu mu tawh an kai tho mai mai em ni? tih zawhna a lo piang nghal a, inthlan lo awm tura MNF vuak chhiat tumna mai mai a nih chuan Congress thil tih dan demawm tak a ni ang.

He mi lehlamah hian thil dik tak tak a nih chuan hman deuha eiruk pawh eiruk a ni a, hman deuha sum tihchingpen pawh tihchingpen a la ni reng a, Mizoram mipui hnenah hian court kal tlang hian thu dik puan ni ngei se a ṭha a, hei hian Mizo mipuite thudik hriatna kawngah min hruai thei dawn a lo ni zawk si.

- Lalrinzuala (Marina)