Engnge kan thlan ang Parte? (Aw, nang lo chu!)

Mizoram inthlanpui chu kan hnaih leh ta hle; a ni leh thla la hre lo mah ila kumin kum tawplam hi chu a ni dawn chiang. Political party kan hmelhriat thinte leh a thar, rawn khel thar an awm ta nual a. Thlan tur ber hriat a har ṭan ta; mi thar an lo lang nghal bawk a. BJP meuh pawhin ralpui phiarin tun tum inthlan chu beih an tum niin a lang. Kan political party neih mek leh an hruaitute hi bihchiang dawn teh ang.

Congress Pary: An hotupa hi hmana mi kha a la ni reng a. Ama chanpual department hi hneh taka enkawl emaw, a department chan te'n Mizoram tan nasa takin hma an la a, hmasawnna a thlen tih hi sawi tur a vang hle. Hotu a ni a, hma hruaitu chu a ni lo. An sorkar apiangin Chakma minister kan nei ziah hi party dang nen an danglamna a ni.

An sorkar chhan NLUP kha dawt aṭanga intan a nih vangin hlawhtling tia chhal theih a ni lo. PM Special package a ni ang, mizoram budget sum sathek lova pekchhuah a ni ang an ti a. Dawt vek a lo ni si. Mualpuiah Sonia Gandhi a lo tum a, PM special package anga pek a ni ang a ti a; dawt vek a lo ni si. Sorkar tuka sem tum kha kum li hnu 2011 ah an sem a. Serthlum te pawh a hlawhtling hle tiin kum 2015 khan Media Cell ten press conference an kova; kum 4 chhunga serthlum hi hlawhtlinpuina hun a awm lo. A ṭiak kan sem kha an phun nung ṭha hle tih a nih loh chuan. Kan kawngpui hi a ṭha tawk tia kawngpuia chirh leh tuihawk luankawr hmuh kan thei ṭhiauin min kaihruai a. Zu zawrh, phul lem phah leh sikul ṭan hma hi an hnathawh langsarte an ni.

MNF Party : Anni hi, "Congress hi mipuiin an ning tawh a: Tin, term thum sorkar hi thil harsa tak a ni a. Keini lo chu sorkar tur an awm lo" tih changchawia sorkarna chang mai tura inngai mek leh, chutiang anga hun hmang mek chu an ni.

Sorkar leh tur chu anni chauh hi nia an inngaih avangin beiseina sang tak nen an leng a; anmahni lama lungleng tak tak te, pensioner leh neutral tia chhiar theih ang chi ho huikhawm hna an thawk lem lo. An hotupa hi an sorkar hmasaka mi ang tho khan "tha thawh lova; thu leh hla hmanga thil chinfel leh hmalak tum ang" a nihna hi a la kalsan lo tih tunhnaia a thusawi aṭang hian a hriat. Tin, an hotu lawk ṭhenkhat hian 'thuneihna chelh an chak luatah, an tih theih loh tur emaw Mizoram tana ṭha tur ni si loa thu tawp siama thu an tiam nghal zel hian' thlan tlin leh an huphurhawm riauin a hriat.

An manifesto SEDP hi an sawiri tlem ta deuh bawk a, Mizoram pum huap ang chi-ah sikul ṭan tlaitir leh zu khap chungchang bak intiamna emaw hmachhawp emaw an nei tam lo.

ZPM : ZNP, MPC, ZEM leh pawl dang awm khawmna an ni a. Sorkarna la chelh lo an nih bakah an zia tak tak kan la hre lo a tih theih awm e. Pensioner leh sakhaw puithiamten an bawh deuh a; ngaihtuahna fim hmang thiam chin an niin a lang. Congress leh MNF ni lo sorkarna siam ngei ṭul ti an ni a, kuthnathawktute tan sawhthing, hmunphiah leh thlai thar dangte man man zawka leisak an intiam a. Sum sem an sawimawi lova, mipuite chu an kutkawih ngeia hlawhtlintir an tum tih an sawi. Kuthnathawktu tam takin anmahni chhanchhuaktu ni turin an thlir deuh niin a lang. "Anni pawh engmah an ni dawn chuang lo, ram siamṭhat aia lalna duh vanga politics khel an ni" tih chu lehlam pawl ngaihdan a ni ve tho.

PRISM : PRISM hi hlepruk leh hlem­hletna do ṭhintu an ni a; political party-ah an inlet a ni. Anni hian sorkar inrelbawlna (system) thlak danglam an duh a, chutiang a nih loh chuan Mizoram tan kawl a eng lo telh telh niin an sawi. Administrative reforms an tum ber a, dik leh huai taka hmalak an tum tih an sawi chiang. An la ṭhalai rual bawk a, an ruahmanna siam pawh a rintlak hmel ber zel mai.

BJP : BJP hmachhawp lian ber chu India ram aṭanga Congress nuaibo a ni mai a. Ram mipui tana hmachhawp lian tham min tiam an nei meuh lo. Central lama an hotute hmachhuana ṭawng lian ve deuh tak an ni fur. An party chhung chiri reng hian enge an dinhmun ni zel dawn a hriat loh. Chakma leh Tuikuk tamna bialah MLA an nei ve mial tura ngaih a ni.

A chunga political party hrang hrang bakah hian Zoram Thar pawl pawhin inthlanpuiah hian chuh ve ngei an tum niin a lang. Kumin inthlanpui tur chu party mal tinte hi chapo thei miah loin MLA hi intheisem diat diat sela ka ti ngawt mai. Mi tam takin 'tu pawh thlang ila, an pumpui leh party bak an ngaihtuah lo. Ram tan engmah an ngaihtuah tak tak hman lo.

Vote thlak ka peih vel lo' ti an awm ṭhin. Ni e, thlan tur ber hi hriat thiam a har ṭhin a. Lalzova hla "Enge kan thlan ang Parte; Aw, nang lo chu" tih ang mai hian kan duh emaw duh lo emaw kan political party neih tu emaw ber hi kan thlang tling leh dawn a ni. Thlan tur ka hrilh thei lo che; ngun takin ngaihtuah la, vote thlak ang che.

- Lallianzuala Fanai