HRINGNUN HI - 10

Kum 2000 khan mobile phone ka khawih tawh a, rit deuh bel bul hi a ni. Tunah chuan smart tak tak a tam ta.

Mark Zuckerberg khan Feb. 4, 2004 a Facebook a tlangzarh khan hetiang em ema Mizo ṭhalaiten kan luhchilh lawm ang tih hi a suangtuah phak hi ka ring lo. Kan hman ṭangkai dan sawi tur a tam rualin kan chhiatpui dan pawh sawi tur a tam.

Facebook pian aṭanga kum 5 na 4 Feb, 2009 ah WhatsApp a awm ve leh a, Fb aiin kan hmang ṭangkai lehzual. Thlalak leh Video in thawn a lo awlsam zawk em em a, hmun hla tak taka awm te nen pawh kan inhnaih leh zual sawt a - video call ala theih zel a.

Kum 2009 vel khan ka thianpa hian minutes 40 vel phone a hmang a, hmang rei hi ka ti khawp a, eng em em nge in sawi a? ka ti hial a, nimahsela keimah ngei pawh chuan tlaivar var te chuan phone ka han hmang ve ta fo mai a, enge kan sawi pawh tun hnua ka ngaihtuah leh pawh hian ka hre tawh lo.

Ka lungngaih thu leh ka hlim thu thlengin ka pho chhuak ṭhin a, ka tan chuan Facebook leh WhatsApp te chu hmangraw ṭangkai tak ang mai a ni.

Nimahsela, chu­tianga social media ka hman tangkaina chuan keimah tak chuan hlawkpuina ka neih chiam pawh ka hre lem lo a, ka hlawkpuina lah chu a ṭha lam ai mahin a chhe lamah a ni fo mai. Cell phone tel loa nun har ka ti tlat mai a, mit a ti khamin ngaihtuahna ṭha lo tak tak ka neih phah a, ka nun a ti danglam ta hle mai. A chang phei chuan bengvar bera tan te ka han tum a, bengvar lutuk pawh mi ṭhenkhat tan a lo huatthlala leh bawk si.

Chutianga keimaha thuk tak maia hmun a chang chu dikin ka hre lo a, ṭha ka ti hek lo a, Facebook leh WhatsApp khawih loa awm thei lo hiala ka inngai chu ka duh ta lo a. Ni thum lai ka off a, ka khua chu a har ngei mai a, nimahsela keimah hna mai bak­ah mut dawnah pawh lehkhabu chhiar­na hun thawl ka neih theih phah a. Ngaihtuahna fim tak hmangin lehkha ka ziak thei ta a, mi ka biak duh leh an inah ka kal mai a, dik tak chuan phone aṭanga inbiak aiin hmaichhan ngeia inbiak chu a lo hlu daih zawk. Tun thleng hian off zauh zauh chang ka nei ta fo mai.

Amaherawh chu eizawnna lamah loh theih loha phone call leh WhatsApp hman ngaihna a lo awm a, ka ti nung leh ta a. Nimahsela, keimah lam chu ka in thunun thei a, WhatsApp group 60 chuang ka awm ve na aṭangin a pawimawh bik chauh chu ka en ṭhin.

Mi tam tak chu social media hian min chim buai mek a, a ṭhenin rilru zawng zawng phawrhna hmun atan an hmang a, fimkhur thiam a va ngai em. A chin tawk hria ila, kan hun hlu tam tak min laksak theih avangin a tel loa awm theih tum ila, loh theih loha khawih a ngai a nih pawhin thiam takin social media hi i hmang ang u.

He hringnun hlu tak leh hlimawm tak social media-in a tihchhiat mai mai atan chuan a uihawm lu hrat a ni.

- Mahmuaka Chhakchhuak