Kawmthlang pa chu thei bik nulh nulh ngei mai

Kan nau pakhat chu chhungte tlawhin Shillong-ah a zin a. A zin hun te a tawp tawh avangin 29th January, 2022 khan lo haw tumin a inbuatsaih a. Vairengte check gate-a inhawlh pass hlauha buai ai chuan tiin ni 28th January, 2022 khan NEIGRIHMS, Shillong-ah RT-PCR hmangin a in test a. A tukah chuan result a lo chhuak a, a lo Covid ve tlat mai. Rawn haw chu a theih loh nghal.

A positive thu chu NEIGRIHMS aṭangin message a dawng a, a hnuah phone-in an rawn umzui bawk a. Harsatna a neih leh neih loh te zawtin lo in khung hrang turin an hrilh nghal a. An ngaihsak ngang mai. A tir lama Pastor pakhat kan buaipui kha rilruah a lo lang hial. A ni phei chuan min call zing lutuk a, ka ning ṭep zawk te a rawn ti fiam hial. Harsatna a neih leh neih loh te an zawt reng a, Sunday-ah medical team-in an visit tur thu te an hrilh a ni.

Sunday a lo ni a, an sawi ang ngei chuan Medical team chuan an va tlawh a. A room-ah Nurse pahnih an lut a, PEP thuam full pawhin an inthuam lo. Patient Self Monitoring Chart an siam sak a, a BP te an check a, Oxygen level te an check bak­ah harsatna dang a neih leh neih loh an zawt dil chhut hle bawk. Chutia a ṭul zawng zawng an tih vek hnu chuan, heti hi a lo ni ta, a mak lutuk, a rin loh lutuk thil pek a dawng. A mamawh tur damdawi an pe vek a, chumai pawh ni lovin Home Isolation Kit an pe bawk. A dawn zawng chu- Thermometer, Oximeter, surgical mask, hand sanitizer, nachhawkna, Corivir 12, multi vitamin, Vitamin C, Steam Capsul.

Patient Self-Monitoring Chart hi nitin a fillup ang a, a va thawn ṭhin ang. Hei bakah hian harsatna a nei a nih chuan call thuai thuai turin an hrilh a, a call-na tur emergency no an pe nghal bawk.

A chhungte Home Quarantine a ngai lova, harsatna an lo nei ve a nih chuan in test nachang hre turin an hrilh thung.

Tlai lamah team dang (Covid Care) aṭangin call a dawng leh a. Medical team in an tlawh leh tlawh loh an zawh bakah a chunga a thil thlawn pek dawn zozai khi a dawn leh dawn loh an zawt fiah bawk a. Tin, emergency call no an pe leh bawk.

Heti taka an lo ngaih­sak takah chuan a lo haw hmaa in test nachang a hria chu ti fuh hi a inti em em mai a. Covid-19 avanga room hrana khung hran e ti lo chuan a hlim em em mai a. A tira a positive kan hriat hlima kan ngaihtuah tehreng nen, keini aia mi thiam zawkten an ngaihsak em em leh a mamawh zawng zawng an han pe vek chu kan dam huai huai a ni ber a, a nin symptom a lo nei lo bawk nen.

Meghalaya sorkar chu fak loh rual a ni lo. Ama khua leh tui pawh ni lo, mikhual chambang ve mai mai heti taka a lo ngaihsak chu dam sawng sawngna tham a ni hial.

- Darthakunga, Ramhlun Venglai