DELHI AṬANGIN A LANG CHIANG A LAWM LE!

India ram pawnah Mizo 500 vel leh India ram laili lamah 6000 bawr Lockdown-in a dan beh tangkhang kan awm mek a. India ram state zingah Mizoram leh Sikkim hi tangkhang nei tlem kan ni. 

India ram pawn Singapore, Macau, Dubai lam nen kan in au chel chul a. India sawrkarin India mi leh sa ram pawna hnathawk lo haw duhte phurh haw vek a tum a. UAE -Dubai aṭang ringawt hian haw duh 2,00,000 chuang thlawhna leh lawngin phurh haw an ngai a. Mizo pawh 20 chuang rawn tel turah beisei ang. 

Khawvel ram hrang hrang aṭanga India citizen te phurh haw hi namai lo tak a ni. Mizoram Health Minister, Dr R.Lalthangliana'n India ram pawna Mizo tangkhang 500 chuang lo haw theih nana sawrkar laipui ṭanpuina a ngen tih ka lo hria, ka lawm hle. 

India ram chhung, mahni state pawna hnathawk Migrant Workers, Students leh damlo, tourists etc nuai tel takmeuh hla tak tak aṭangin bus 200/300 hmangin an han inthiar haw chur chur a. A khirh lutuk e, tiin Telengana state leh Jharkhand state sawrkar chuan remruatin train an hmang ta thawr a. Train chhuah hnu aṭanga darkar khatah sawrkar laipui pawhin Special Train Service a phal thu order a chhuah ta a ni. 

Hman deuh khan "NE state CM dangten Mizoram CM Pu Zoramthanga hi an chung en” tih kha PR te ka hmu a. Han sawi zuia lo fak emaw hnial pawh kha a ṭul lo, "A va lawmawm ve” tih kha ka lo comment theih tawk a nia. NE-ah tunge CM ṭha leh ṭha lo chu a lang chiang tulh tulh chu a nih hi! 

Khawvel ram leh hnam tin tan International Exodus, India ram chhungah pawh National State Exodus a thleng mek a. NE state 8 zinga 7 chuan rel leh bus hmangin state pawna an mi leh sa hruai haw dan tur ruahman felin, central sawrkarah report leh rawtna an thehlut vek tawh a, rel pawhin an inthiar haw ṭan ta. NE Chief Minister 7 ten an chung en ber Mizoram CM Pu Zoramthanga chuan Mizo lo haw turte chu, rel chuan man 15 % mimal intum turin a sawi a. Central lama NE lam ngaihtuahtute aṭangin Mizoram chuan Report an la thehlut lo tiin min hrilh. Mizoram sawrkar chak tak erawh a la hmanhmawh lo a ni ang e. 

India ram pawn leh chhunga Mizo awmte hi Coronavirus tan "Wanted dead or alive" kan ni. Coronavirus hian min zawng huai huai. Mahse, chunglam venna hnuaiah min la hmu lo hlauh hlawm a, min hmu lek lek ṭhin. A chhan chu central leh states sawrkarte hian ni 50 zet Lockdown chhung aṭanga tal chhuah a, mipui ralmuanna hnuaia nunphung pangngai chhunzawm a, mipui leh mimal tin fimkhur a, Coronavirus do hneh an tum tawh zawk a. Vaiho zingah zalenna hmang thiam lo chin Coronavirus kui ṭiaktu/ tidarhtu an awm nual dawnin a lang. A darh chum chum vaih chuan Mizote tan bihruk him reng a harsa ang. 

Khawvel pumah services sector lam sum hmuhna leh thawhchhuah a hniam nasa zel dawn. Hotel, restaurant, Hollywood, Bollywood, Music concert, Football bazar, Cricket bazar a sawng te nasa chho hle zel ang. Himachal Pradesh hian state sum lakluh thawh chhuah, tourism aṭangin 7 % GSDP a hawlh phak a, tourism lam chhawr ber an ni. April aṭanga June hi an vanglai a ni ṭhin; tunah tourist an nei lo, Hotel zawng zawng a ruak tih a ni. Kerala, Tamil Nadu te hi India ram pawna hnathawk kal chhuak tam an ni, 80% aia tam lo haw tura ngaih an ni. 

Mizote tan Kristiante Pathian a ṭha, Jharkhand state a Mizo tangkhang 50 bawr chu Mizo Officer (IAS) hnathawk hmalaknain Jharkhand state sawrkar senso vekin bus-in an thawn haw mek a. Chennai lama aṭanga 400 bawrte pawh Mizo Officer (IAS) Mizo Welfare te hmalaknain Tamil Nadu sawrkar senso bawkin rawn thawn haw an ni dawn tih media lamah a lo lang a, a ropuiin a va lawmawm tak em. 

Chutihruala a zawn chhuah ram pahnihna Zoram ka thlirin, Assam CM Sonowal leh Minister Himanta Biswa Sarma hnenah hian "Coronavirus hripui len chhung chu, Assam District pakhatah min khung tel leh mai teh u” tih mai hi a 

ṭul dawnin ka hria.