MAHARASTRA IN MLC 9 THLANG DAWN

Hun rei tak an buai hnu leh MLA ni lo Chief Minister Udhav Thackeray chu India ram state hausa ber, Financial Centre an tih ṭhin, Maharastra Chief Minister aṭanga tun thla tawp lama bang mai tura ngaih hman hial Maharastra chuan ni 21.5.2020 hian MLC an thlang dawn ta nge nge. Maharastra MLC thlan tur kan sawi hma hian kan ramin a neih ve loh avanga kan ngaihsak vak loh MLC hi han sawi daih ila. 

India independent hlima state lian deuh zawng zawngin an neih Member of Legislative Council (MLC) hi Parliament-a Rajjya Sabha ang deuh, state a Upper House a ni. 

Mipuiin direct-a an thlan tlin Lower House kan tih zawka ṭhu MLA-te hian hnawk an tih fo avang leh state sum senso a tlem zawk nan India independent tirha state lian tam berten an neih Upper House chu state tam zawk chuan an nuai bo tawh a. State ṭhenkhat chuan an ṭhiat a, an din leh a, an ṭhiat leh bawk a. Tunàh hian India ram state 27 zingah hian state 5- U.P, Bihar, Maharastra, Andra Pradesh leh Karnataka chauhin an nei tawh a.

Mahni state-a MLC ṭhiat tawh zingah hian Assam, W.Bengal, UP, Bihar, Tamil Nadu leh Madhya Pradesh pawh an tel. Kan sawi tum tak Maharastra MLC thlan turah khan lut tawh ila. 

Maharastra hian MLC Seat 78 a nei a, chung zinga 66 chu thlan tur an ni a, 12 chu Governor-in mi bik a ruat tur, Governor quota a ni. MLC seat 66 zinga 30 chu MLA te thlan tur an ni. Tunah hian MLA te thlan tur 30 zinga 9 ruak chu May 21 a an thlan tur hi a ni. A ruak lo, MLC ni lai zinga seat an neih zat chu: Ṭangrual M.V.A (NCP, Shiv Sena leh Congress hian MLC 12 ṭheuh an nei) hian an party bik MLC bakah anmahni puitu Party tenau leh Independent member nen MLC 41 an nei a; NDA lam hian anmahni Party MLC bakah anmahni puitute nen MLC u24 an nei thung. 

A thlangtu tur sitting MLA an neih zat aṭanga chhut chuan M.V.A. hian seat 5, NDA hian seat 3 chang chiang tur an ni a, seat 1 la bang hi inchuh tur a ni. NCP leh Shiv Sena chuan seat 2 ve ve chang ila Congres-in seat 1 chang se, July thla a Governor quota ruak turah hian Congress-in seat 1 chang chuang se. Seat 1 inchuh tur hi BJP in chuh loin chang mai se an ti a. Tichuan, inthlan ngai loin MLC 9 hi uncontest a tihfel vek ni mai se an ti a ni. 

Hei hi BJP chuan ṭha an tih laiin Congress hian seat chang tlem bik nih an duh lo zet a. Mahse an ṭhianten an hmin thei dawnin a lang.He MLC Election hian pawimawh danglamna tak a nei a. Central Election Commission hian Covid'19 avangin India  ram pum election reng reng a khap vek a. Chuvàngin, Thackeray hi ni 27 May, 2020 thlenga MLC tal a nih loh chuan CM a nihna chu 28 May thla hmaa a ban a ngai dawn a. He thil pumpelh tur hian Maharastra Cabinet chuan Maharastra Governor hian a quota seat 2 ruaka seat 1-ah hian Uddhav Thackeray hi MLC-ah ruat mai se tiin vawi 2 an passed a. Mahse Governor hian Legal Expert Opinion ka la dawn tiin a tikhawtlai zel a. A tawpkhawkah Election Commision chu Maharastra bika MLC inthlan phal turin an ngen ta a ni. 

Ni khat pawh pen­ding lovin Election Commission chuan MLC Election chu Maharastra bik atan a puang ta a ni.