Pu Hawla’n lalṭhutthleng a kian em?

Lal Thanhawla hian MNF hruaitute kha a lalṭhutthleng kianin a insawi fo va, a dawt sawi hi i lo fiah teh ang.

India sawrkar leh MNF khan inremna thu an ziak a. State sawrkar an hawn hma leh, UT hun a tawp tawh inkar kha hun awl a awm ta a, chu chu interim period tih a ni.

India sawrkar leh Laldenga khan interim period-a sawrkar lem din dan tur an ngaihtuah a, lailawk sawrkar lemah chuan Laldenga Chief Minister-ah awm se. Lal Thanhawla chu Deputy Chief Mi­nister-ah awm se. Congress-in Minister 4 ruat se. MNF chuan pathum ruat se tiin an rel a, an rel ang chuan sawrkar lailawk an siam ta a.

He sawrkar lai­lawk hi UT sawrkar a ni lova, state sawrkar pawh a ni lo. State sawrkara inthlan hmaa sawrkar lem an siam chawp mai mai a ni. He mi chungchangah hian Lal Thanhawla ngaihdan an zawt miah lo. Thu pakhat mah a nei ve lo.

Lal­denga leh Rajiv Gandhi te pahnih rawt chawp mai mai a ni a, Lal Thanhawla hian a dinhmun kiana insawi fo hi thu belhchian dawl lo a ni.

A UT sawrkar pawh kha Lalduhawma Cong­ress President-in London-a Laldenga’n video-a a thusawi an campaign pui avanga tling mai mai an ni.

Bairabi tuikhuah tur kha Union Mi­nister Ghami Khan Chaudhuri khan, Chief Minister Brig. T. Sailo hunlai khan a lungphum a phum a. Lal Thanhawla a lo sawrkar khan a chhunzawm duh lo va, chhunzawm se chuan kan hman sen loh Power Supply kan nei tawh ang. Engtin nge Lal Thanhawla’n a sawi. “Ṭhenphunga damlai lung ka phunsak duh lo” - Lal Thanhawla.

MNF a sawrkar khan Chief Minister Zoramthanga khan Laldenga’n Bairabi tuikhuahna atana pawimawh sawrkar laipui aṭanga phalna chi hrang hrang zingah pakhat lak tur a la awm kha a zu la fel a. A tui khuaptu tur vai hausa tawntaw a zawng a, vai hausa pakhat chu a sawm thlu a. Khuah tuma an han enfel meuh chuan Lal Thanhawla’n a sawrkar chhung khan tuikhuahin a chim tur ram chu an mi leh sate an lo inpe zo vek a. Compensation pek hnua tui khuah leh chuan hlawkna a awm dawn lo tih a hria a, an ṭhulh ta rih a ni. Khuah ni se chuan kan hman sen loh power supply kan nei tawh tur.

Laldenga Airport, Lengpui bulah khan Congress ho chu compensation-in an lo intihausa tawh. Mizo mipui ṭhatna duh lovin pocket money an duh zawk alawm.

- Thianghlima Liannghawr